Ok Pononggiꞌ pasal sok Pogjamu nok Sultan
22
Tubus tinaluan na sop ilon ni Isa biyan sok pononggiꞌ,
longin,
2 “Ok Pomarinta nok Tuhan mopononggiꞌ sok solobuk sultan nong mikpojamu para sok kawing nog bataꞌ in nog laki.
3 Dangan miandam na,
sinuguꞌ in ong mga sosuguonin nok tawagon na ong mga tow nok piosunan lumuduk sok pokkawingan,
sugaid lam nilon diꞌ meleg.
4 Miksuguꞌ na sop yanin nong mga len sosuguonin,
taluꞌ in,
‘Taluan niyu ong mga piosunan kituꞌ nong miandam na ok pokoradjaan ku.
Misumbaliꞌ na ok sapiꞌ u bug mga natiꞌ u kituꞌ nok pisubuk,
bu sagad na og lam nituꞌ.
Angoy amu na dini sok pokoradjaan nok pokkawingan!’
5 Tibuwa daꞌ da koyon bilangoy nong mga piosunan kituꞌ.
Ok solokotow minangoy sog guma nin,
bu ok solokotow sop minangoy sok pigusaha nin.
6 Bu og duma,
sinaggow nilon ong mga sosuguonin,
bininsanaꞌ nilon bangka nilon pomatoyoy.
7 Dadi milingit tokodoy ok sultan,
sinuguꞌ in ong mga sundalu nin nok patoyon sop ong mga tow nong mikpatoy nong mga sosuguonin bangka tutungoy ok siyudad nilon.
8 Doksuꞌ tinaluanin ong mga sosuguonin,
‘Miandam na ok pokkawingan,
sugaid ong mga piosunan kituꞌ kanaꞌ daitan tumuwaꞌ.
9 Dadi angoy amu sok kodalan-dalanan,
onggat niyu mangoy dini sok pokoradjaan ta nok pokkawingan og lam nong mobalak niyu.’
10 Na minangoy ong mga sosuguon koyon sok kodalan-dalanan bangka nilon limudoy og lam nong mibalak nilon,
mahatul bug molaat,
dadi miponuꞌ og baloy pokkawingan koyon.
11 Dangan sinumolod diyon ok sultan,
mitongowin ok solokotow nog daꞌ poksolug nok ponapot nok pongluduk sok kawing.
12 Taluꞌ nok sultan sok tow koyon,
‘Pali,
ponoy ok kosolod nu dini nog daꞌ a ma poksolug nok ponapot para kawinga?’
Sugaid daꞌ poglogonek ok tow koyon.
13 Tubus tinaluan nok sultan koyon ong mga sosuguonin,
‘Ikotan niyu ok komot bug botisin,
bangka niyu yanin pilak sok kodoloman.
Dituꞌ mogaduy ilon,
bu mongolongot ong ngisi nilon.’ ”
14 Doksuꞌ miktaluꞌ si Isa,
“Modakol og inonggat nok Tuhan,
sugaid mikaan da ok piniliꞌ.”
Ok Sak pasal sok Pogbayad nog Buwis
15 Dadi minawaꞌ ong mga Parisi,
bangka ilon pogisun bug ponoy ok poksaggow nilon ni Isa tidu sok ponaluonin.
16 Piangoy nilon dituꞌ ni Isa ong mga mulid nilon dunut mga piktowan ni Datuꞌ Herodb,
taluꞌ nilon,
“Tuwan Guru,
kiosunan nami nong motud ong mga ponaluon nu,
bu diꞌ a momiliꞌ nok tow bisan ponoy ok kowasa nin,
sugaid mosobonnal ok ponintuluꞌ nu nog dalan posunguꞌ sok Tuhan.
17 Na taluan nu ami,
bilaꞌ ika,
kumboy taꞌ sok saraꞌ ta mga Yahudi mogbayad nog buwis dituꞌ sok sultan nog bangsa Rum atawa kanaꞌ?”
18 Sugaid kiosunan ni Isa ok kolaat nilon,
dadi taluꞌ in dinilon,
“Amu mga mokpobaluꞌ-baluꞌ,
manu suloyan niyu ma akon?
19 Potongowan niyu akon nok sin pogbayad nog buwis.”
Dadi inoyitan nilon yanin nok sodinari.
20 Tubus sinakan ilon ni Isa,
“Sima ok pattaꞌ bug ngalan sok sin kini?”
21 Ok tabal nilon,
“Ok sultan sog bonuwa Rum.”
Taluꞌ in dinilon,
“Pagga maꞌ niyon,
bogoy niyu sok sultan ok sukuꞌ in,
bu bogoy niyu sop sok Tuhan og olo-olo nok sukuꞌ in.”
22 Dangan midongog nilon koyon,
misobuꞌ ilon.
Tubus ginonatan nilon si Isa bangka ilon panow.
Ok Sak pasal song mga Tow Minatoy Motubuꞌ Mokpuliꞌ
23 Na sog gondow da sop nituꞌ,
minangoy ni Isa ong mga Sadduki.
Ong mga towanan kini ondiꞌ tumombaꞌ nog ongon ok kotubuꞌ pogdoksuꞌ nok kopatoy.
Sinakan nilon yanin,
24 taluꞌ nilon,
“Tuwan Guru,
taluꞌ ni Nabi Musa nog bilaꞌ og laki mokopoglibun,
doksuꞌ matoy yanin nog daꞌdun og bataꞌ in,
na sumboy poglibunon nok sunud gilugin ong mibalu.
Dadi bilaꞌ mokopogbataꞌ ilon,
moitung og bataꞌ koyon nog bataꞌ nog gilug kituꞌ nong minatoy.
25 Na ongon ok pitu kotow nog laki mogilug diyon dinami.
Miglibun og gulang bataꞌ nilon,
sugaid minatoy nog daꞌ pokobataꞌ.
Tubus piglibun nog gilugin og balu nin.
26 Minatoy da sop og gilugin kituꞌ.
Dadi miksunud-sunud ilon miglibun dun mangoy sog ikopitu nog gilug nilon,
bu minatoy og lam nilon nog daꞌ ilon pokobataꞌ.
27 Sok kodoksuanin,
minatoy da sop og libun kituꞌ.
28 Dadi bilaꞌ motubuꞌ puliꞌ ong mga manusiyaꞌ sog Gondow Kiyamat,
sima na bayuꞌ in og laki nog libun kituꞌ poꞌ mipoglibun ma yanin nog lam nilon mogilug?”
29 Ok tabal ni Isa dinilon,
“Misayup amu,
poꞌ daꞌ niyu kosunoy ong misulat sog diyalom Kitab bu ok kowasa nok Tuhan.
30 Poꞌ sog waktu nok potubuon na mokpuliꞌ ong mga tow tidu sok kopatoy,
diꞌ na ilon moglibun bu moglaki,
mamaꞌ na ilon nong mga malaikat sok surgaꞌ.
31 Na pasal sop sok kotubuꞌ puliꞌ nong mga minatoy,
daꞌ niyu taꞌ kobasta sok Kitab ok tinaluꞌ diniyu nok Tuhan?
32 Taluꞌ in,
‘Akon ok Tuhan niloꞌ Ibrahim,
Isahak bu Yaꞌkub.’ ”c
Na taluꞌ pa ni Isa,
“Song masa koyon minatoy na ilon,
dadi motampal nog ongon ok kotubuꞌ puliꞌ pogdoksuꞌ nok kopatoy poꞌ kanaꞌ yanin ok Tuhan nong mga tow patoy,
sugaid song mga tow totubuꞌ.”
33 Na dangan midongog koyon nok tumpukan nok tow diyon,
misobuꞌ ilon sok ponintuluꞌ in.
Ong Motas sog Lam nok Suguan
34 Pogdongog nong mga Parisi nong mihinok ong mga Sadduki sok taluꞌ ni Isa,
na piglumpukan nilon yanin.
35 Ongon ok solokotow dinilon,
og guru saraꞌ agama nong miksak ni Isa nok ponuloy diyanin,
36 taluꞌ in,
“Tuwan Guru,
ayin song mga suguan nok Tuhan ong motas?”
37 Ok tabal ni Isa diyanin,
“Lasa niyu ok Pogbayaꞌ-bayaꞌ,
ok Tuhan niyu nog ikhlas sog diyalom pongatoyan bug nyawa niyu bu sok pomikil niyu.d
38 Yonin koyon ong motas bu muna-muna nok suguan.
39 Og ikoduwaꞌ nok suguan mamaꞌ da sop niyon,
kolasahoy niyu ok kodumahan niyu mamaꞌ nok poglasa niyu sog ginawa-baran niyu.e
40 Og duwaꞌ buk suguan kini ok pun nog lam nok saraꞌ bug mga pononduꞌ nong mga konabihan.”
Ok Sak pasal sog Al-Masih
41 Na soliyan nong mga Parisi moktopuk,
sinakan ilon ni Isa,
42 taluꞌ in,
“Olo ok pikilan niyu pasal sog Al-Masih?
Sima yanin ponupuꞌ dun?”
Ok tabal nilon,
“Ok ponupuꞌ ni Sultan Daud.”
43 Taluꞌ ni Isa dinilon,
“Dadi manu buwan tinawag ma ni Sultan Daud og Al-Masih ok Panghuꞌ dangan mitaluꞌ in kini biyan sog Ruh nok Tuhan,
44 ‘Miktaluꞌ ok Pogbayaꞌ-bayaꞌ sok Panghuꞌ u,
“Ingkuda dini sog dapit lintu u
toktob dagon ku ong mga banta nu dinika,
bu moimung ilon mamaꞌ nog gontudan nog botis nu.” ’f