Matiyu 18

Ong Motas sok

Na sog waktu koyon, minangoy ong mga mulid ni diyon diyanin bangka poksak, “Sima ok kinotasan sok Pomarinta nok Tuhan?” 2 Dadi tinawag ni Isa og bataꞌ bangka nin botangoy sok titongaꞌ nilon. 3 Ok taluꞌ in, “Taluan ku amu, ong motudin, bilaꞌ diꞌ amu mopinda bu moimung mamaꞌ nog gumbataꞌ, na diꞌ amu mokampuꞌ sok Pomarinta nok Tuhan. 4 Saan na sima-sima ong mokpobabaꞌ nog goyitanin mamaꞌ nog bataꞌ kini, na yanin ok kinotasan sok Pomarinta nok Tuhan. 5 Bu sima-sima ok tumabuk mamaꞌ nog bataꞌ kini sabap dinakon, tinabukin da sop akon.

Ong Mogoyit nog Duma nin Mogdusa

6 Tibuwa sima-sima ong mogoyit-oyit nog song mga tinumombaꞌ dinakon mamaꞌ nok solobuk song mga gumbataꞌ kini, golom pa diyanin nog ikotan og ligin nong mosolag nog batu bangka lomosoy sok titongaꞌ nog dagat.

7 Mokondok-ondok ok koposunguan nong mga manusiyaꞌ pongdunya. Ondiꞌ na kotangkisan ong mga sassat poꞌ ongon na dodaꞌ ong mga sassat matong, sugaid mokondok-ondok ok koposunguan nok tow nong mogoyit-oyit nog dusa sog duma nin. 8 Dadi bilaꞌ ok komot atawa og botis niyu mokoyit diniyu sok kodusahan, na putuk niyu bangka niyu pilak. Golom pa mokosolod amu sok kosannangan sok nong mopungkul, gabaꞌ sog jukup nog botis bug komot niyu, sugaid tikpuon amu da sog gapuy nog daꞌdun ok kodoksuanin. 9 Bilaꞌ ong mata niyu ong mokoyit diniyu sok kodusahan, lugit niyu bangka niyu pilak. Golom pa mokosolod amu sok kosannangan sok surgaꞌ nok solobuk da ong mata niyu, gabaꞌ sog duwaꞌ buk ong mata, sugaid tikpuon amu da song narkaꞌ.

Ok Pononggiꞌ pasal sog nong Mibolong

10 Hallian niyu nog diꞌ niyu pobabaꞌ-babaon og bisan sima song mga mogogunut dinakon mamaꞌ nong mga gumbataꞌ kini, poꞌ ong motudin, ong mga nok Tuhan nong mogipat dinilon, diyon lolayun sog gadapan nog u sok surgaꞌ. 11 Poꞌ akon, og , minangoy dini sog dunya bagun monontong bu mogawon song mga tow nong mibolong sog dalan posunguꞌ sok Tuhan.

12 Na pikil niyu ba kini, bilaꞌ ongon ok tow nok taga sogatus buk nog bilibili, doksuꞌ mibolong ok solobuk, kanaꞌ taꞌ nog bagakonin ok siyam puluꞌ bu siyam sog bukid bangka nin ponontongoy ok solobuk kituꞌ nong mibolong? 13 Taluan ku amu, ong motudin, bilaꞌ mobalakin na kituꞌ, mogloliyag tokodoy yanin sok solobuk koyon gabaꞌ sok siyam puluꞌ bu siyam kituꞌ nog daꞌ kobolong. 14 Domikkiyan da sop og Gommaꞌ niyu sok surgaꞌ. Diꞌ yanin meleg nong mobolong og bisan dona solobuk song mga sukuꞌ in kini.

Olo og Inangon bilaꞌ Mokodusa ok Pigilugan niyu sok Kotombaꞌ

15 Bilaꞌ ongon ok pigilugan niyu sok kotombaꞌ nong mikodusa sok solokotow diniyu, angoy niyu yanin taluoy nog amu-amu hadja. Na bilaꞌ inongoganin amu, moksulut amu na, bu mokpuliꞌ na ok kopogilug niyu. 16 Tibuwa bilaꞌ diꞌ yanin monginongog, pogoyit amu nok solokotow atawa duwaꞌ kotow, bagun ok sosuku nok taluꞌ kosaksian nog duwaꞌ atawa tolu kotow. 17 Bilaꞌ diꞌ pa yanin monginongog, suksug niyu sog nong mga . Na bilaꞌ diꞌ pa lungkan yanin monginongog, niyat niyu na yanin nog ondaꞌ pogunut sok Tuhan atawa mamaꞌ nong molimbung nok polongabat nog .

18 Taluan ku amu, ong motudin, olo-olo ok pogondion niyu dini sog dunya, asal na pigondiꞌ dituꞌ sok , bu olo-olo ok kumboyon niyu dini sog dunya, asal da kinumboy dituꞌ sok surgaꞌ. 19 Taluan ku da sop amu, ong motudin, bilaꞌ og duwaꞌ kotow diniyu moksolobuk nok pasal sog olo-olo ok pongonihon niyu, na duhulon da diniyu nog u sok surgaꞌ. 20 Poꞌ bilaꞌ ongon og duwaꞌ atawa tolu kotow moglimud kobalan sok pongandol nilon dinakon, na diyon ku da sop sog ginongaan nilon.”

Ok Pononggiꞌ pasal sok Tow nog diꞌ Mongampun

21 Tubus minangoy si diyanin bangka poksak, “Panghuꞌ, sanu kali u ampunon ok pigilugan ku bilaꞌ mokodusa dinakon? Pitu kali taꞌ?”

22 Ok tabal ni Isa diyanin, “Daꞌ u poktaluꞌ dinika nok pitu kali, sugaid pitu puluꞌ kali nu ok pitu kali.

23 Poꞌ ok mopononggiꞌ sok solobuk sultan nong meleg mogusoy bug mga sosuguonin pasal sog gutang nilon. 24 Dangan miktagnaꞌ na yanin mongabat, inoyit diyanin ok solokotow nong mikutang diyanin nong milyon-milyon. 25 Na pagga diꞌ na yanin mokobayad, miksuguꞌ ok sultan koyon nok pogdagang yanin dunut nog libun-bataꞌ in sampoy og lam nog ongon diyanin dun, bagun mokobayad yanin. 26 Dadi sinumudjud ok sosuguon sog gunahan nok sultan bangka pokpokilolat, taluꞌ in, ‘Tuwan, potanggu nu pa akon, bayadan ku da ika nog lam nituꞌ.’ 27 Dadi limolat ok sultan sok sosuguon kini, saan na inampunin bu pinuwasin yanin sog gutangin koyon bangka nin poluwasoy.

28 Dangan limuwas na ok sosuguon kini, milumpakin ok kobatukin nok sosuguon nong mikutang diyanin nok sanu ngibu da. Dinanggutin bangka longokoy bu tinaluanin, ‘Bayadan nu og gutang nu!’ 29 Dadi sinumudjud ok kobatukin nok sosuguon kini bangka pokpokilolat diyanin, taluꞌ in, ‘Potanggu nu pa akon, bayadan ku da ika.’ 30 Tibuwa daꞌ yanin koleg, bu pipirisu nin ok kobatukin sosuguon koyon toktob song mokobayad nog gutangin.

31 Na dangan mitongow koyon nong mga duma nin sosuguon, misusa tokodoy ilon dun. Minangoy ilon moksuksug sok sultan nilon ok pasal sog lam niyon. 32 Tubus pitawag nok sultan ok sosuguon kituꞌ bangka nin taluoy, ‘Molaata nok sosuguon! Pinuwasu ika sog lam nog gutang nu poꞌ mikpokilolata dinakon. 33 Kanaꞌ taꞌ sumboya sop mololat sog duma nu sosuguon mamaꞌ nog lolatu dinika?’ 34 Tubus pasal sog lingit nok sultan kini, pipirisu nin ok sosuguon koyon bagun mobinasa sog bon nog diꞌ yanin mokobayad nog gutangin. 35 Na maꞌ niyon da sop og inangon diniyu nog u sok surgaꞌ bilaꞌ diꞌ niyu ampunon nog ikhlas ong mga pokasi niyu.”