Si Panghuꞌ Isa bu si Yahiya Mongliliguꞌ
11
Na dangan midoksuꞌ si Isa mokpituwa sok sopuluꞌ bu duwaꞌ nong mga mulidin bug olo og inangon nilon,
minangoy yanin mongnasihat song mga lungsud sog Jalil.
2 Sog waktu koyon,
mipirisu si Yahiya Mongliliguꞌ.
Dangan midongogin ok pinginang nog Al-Masih,
mikpoyit yanin nog lapal song mga mulidin diyon ni Isa,
3 bangka poksak diyanin,
“Ika na taꞌ og dinodamahan nami nong matong,
atawa mogbagad ami pa nog len?”
4 Tinabal ilon ni Isa,
“Pokpuliꞌ amu,
bu suksugoy niyu si Yahiya song midongog bug mitongow niyu.
5 Ong mga tow buta mokotongow na,
ong mga daday mokopanow na,
ong mga ginipul kiulian na,
ong mga bongol mokodongog na,
ong mga tow minatoy mipotubuꞌ na,
bu ong Mobais nok Suksugan pisampoy na song mga miskinan.
6 Bu mobarakat ok tow nog diꞌ tumolikud dinakon.”
7 Dangan ginumonat na ong mga mulid ni Nabi Yahiya,
tinaluan ni Isa ok tumpukan nong mga tow pasal ni Yahiya,
longin,
“Olo og inangoy niyu tontongoy sok talunan sog waktu nog diyon si Yahiya?
Ok parang taꞌ nok pikpalid-palid nog galuꞌ?
Kanaꞌ na dodaꞌ.
8 Minangoy amu taꞌ tumontong nok tow mimonapot nong mohalgaꞌ?
Na kanaꞌ!
Poꞌ ong mga mimonapot nong mokohalgaꞌ,
dituꞌ da sog gastanaꞌ nok sultan.
9 Olo buwan og inangoy niyu tontongoy dituꞌ sok talunan?
Ong nabi taꞌ?
Motud.
Taluan ku amu,
ong mitongow niyu dituꞌ ong nabi nong motas pa tidu sog len nong mga nabi.a
10 Yanin ok pigbinaan sosuguon nong misulat sok Kitab,
taluꞌ nok Tuhan,
‘Pounahon ku dinika ok sosuguon ku
mokpodinsamaꞌ nog biyanan nu.’b
11 Na taluan ku amu,
ong motudin,
daꞌdun ok pimataꞌ nok kolibunan nong motas pa ni Yahiya Mongliliguꞌ,
sugaid ningkomun ok kinobabaan nong minampuꞌ sok Pomarinta nok Tuhan,
motas pa yanin tidu ni Yahiya.
12 Tidu sog waktu ni Yahiya Mongliliguꞌ sampoy ningkomun,
migmuhut-muhut ong mga tow mokampuꞌ sok Pomarinta nok Tuhan.
13 Poꞌ og lam nok konabihan bug saraꞌ,
miktaluꞌ nok pasal sok sosungun toktob song masa ni Nabi Yahiya.
14 Bu bilaꞌ tolimaon niyu da,
mosabut niyu nog yanin koyon og ginollalan nong Nabi Elyas nok pidinsamaꞌ kituꞌ tumaluꞌ sok Kitab nong matong moguna sog Al-Masih.c
15 Na sima-sima ong mikodongog,
sabut niyu pahatul.
16 Ayin ku pobatukoy ong mga tow sok timpu kini?
Mamaꞌ ilon nog gumbataꞌ migingkud moglomot sog loma-lomahan bangka poktawag song mga kodumahan nilon,
17 taluꞌ nilon,
‘Miksuling ami diniyu,
sugaid daꞌ amu da pongigal,
migluguꞌ ami nog luguꞌ patoy,
sugaid daꞌ amu da pokkorukkaan.’
18 Ong mga tow song ningkomun kini mamaꞌ nong mga gumbataꞌ koyon nong mologon suluton,
poꞌ minatong si Yahiya,
mokpopuwasa yanin bu ondiꞌ moginum,
sugaid taluꞌ nilon,
‘Sinolodan yanin nok soytan.’
19 Doksuꞌ minatong og Bataꞌ nong Manusiyaꞌ,
kuman bu minum,
sugaid taluꞌ nilon,
‘Tontong niyu ba,
ok tow koyon gibogon bu mogoginum bu ok supali nong mga mogogalap nog buwis bug mga baldusa!’ ”
Sugaid taluꞌ ni Isa,
“Ok kokosun nok Tuhan,
motongow nong mologdong song mga tow nong mogunut dun.”d
Pasal song mga tow nog ondiꞌ Moktowbat
20 Na pigbinaan ni Isa ong mga tow song mga lungsud nog ininanganin nong modakol nong mokosobuꞌ-sobuꞌ,
poꞌ daꞌ ilon poktowbat.
21 Taluꞌ in,
“Amu mga tow Kurasin bug Betsayda,
mokondok-ondok ok koposunguan niyu.
Poꞌ bilaꞌ ong mga ginang nong mokosobuꞌ-sobuꞌ nog ininangu diniyu,
dituꞌ u bosiya ininang sog bonuwa Tirus bug Sidon,
miobon na ilon bosiya moktowbat.
Migdogdoy ilon na bosiya nok kadut bangka ingkud sog gabu,
og gindanan nok piksusunan na nilon ong mga dusa nilon.
22 Dadi taluan ku amu,
sog Gondow Poghukum,
mobogan pa og hukuman nok Tirus bug Sidon gabaꞌ diniyu.
23 Amu sop mga tow Kapernaum,
migniyat amu taꞌ nok potason amu toktob sok surgaꞌ?
Na kanaꞌ,
tibuwa pobabaon amu song narkaꞌ.
Poꞌ bilaꞌ ong mga ginang kituꞌ nong mokosobuꞌ-sobuꞌ dituꞌ ininang sok Sodom,e
diyon pa bosiya og bonuwa kituꞌ.
24 Dadi taluan ku amu,
sog Gondow Poghukum mobogan pa og hukuman song mga tow Sodom gabaꞌ diniyu.”
Si Panghuꞌ Isa ok Pun nok Kosannangan
25 Na sog waktu nituꞌ,
mingoni-ngoni si Isa,
taluꞌ in,
“U Ommaꞌ,
ok Pogbayaꞌ-bayaꞌ sog langit bug lupaꞌ,
moksukulu dinika nok pitongow nu ok kosobonnalan koyon song mga tow nok kulang kokosun nilon mamaꞌ nog gumbataꞌ,
sugaid ondaꞌ nu potampaloy song mga modalom ok pomikil bu motas ok pongadjiꞌ nilon.
26 U Ommaꞌ,
moksukulu dinika poꞌ yonin koyon ok kolegan nu.”
27 Bu miktaluꞌ pa si Isa,
“Inuwakil dinakon nok Tuhan,
Gommaꞌ u og lam nituꞌ.
Daꞌdun ong mokokilala tokodoy dinakon,
luwal sog Gommaꞌ u.
Daꞌdun da sop mokokilala tokodoy nog Gommaꞌ u,
luwal dinakon,
og Bataꞌ in,
bu ok sosuku nok tow nok kolegan ku potampalan dun.
28 Angoy amu dini nakon,
amu mga mitiksaꞌ bug kibogatan nog olo-olo,
poꞌ pulalihon ku amu.
29 Poganad amu dinakon bangka niyu tombaoy ong mga tintuluan ku,
poꞌ molunuk ok pongatoyan ku,
bu mobabaꞌ og goyitan ku.
Biyan dun mokobalak amu nok kosannangan nong nyawa niyu.
30 Poꞌ ok ponintuluꞌ u molomu unuton,
bu ondiꞌ amu da kobogatan dun.”f