Sumboy diꞌ ita Monallaꞌ
7
Diꞌ amu monallaꞌ,
bagun diꞌ amu sallaon.
2 Poꞌ bug ponoy ponallaꞌ niyu sok pokasi niyu,
maꞌ nituꞌ da sop ok koponallaꞌ diniyu.
Bug ponoy ok kopoghukum niyu sog duma niyu,
na mamaꞌ da sop nituꞌ ok poghukum nok Tuhan diniyu.
3 Manu lilingon niyu ma pahatul ong mikaan nok puling nok pokasi niyu,
sokaliꞌ diꞌ niyu mobatik ok puling niyu nong mamaꞌ kosolag nok torusu?
4 Na ponoy ma kotaluꞌ niyu dun sok pokasi niyu nog,
‘Awaon ta ok puling nu,’
sokaliꞌ ongon da sop ok puling song mata niyu nong mamaꞌ kosolag nok torusu?
5 Mokpotongow-tongow amu nong mahatul!
Awaꞌ niyu poguna ong mosolag nok puling niyu bagun amu mokotongow mahatul mongawaꞌ nok puling nog duma niyu.
6 Ong mga sutsi nok tidu sok Tuhan,
diꞌ niyu bogoyon song mga tow nog daꞌdun ok pikilan nilon dun,
poꞌ mamaꞌ ilon nog gayam nog gumonat diniyu bangka amu ugditoy.
Bu ok suksugan niyu mohalgaꞌ nong mamaꞌ nong mutiyaꞌ,
diꞌ niyu posampoyon sok tow nog daꞌdun og gaddat nilon dun,
poꞌ mamaꞌ ilon nong mga babuy,
pogdidjakan tibuwa nilon,
mamaꞌ nog daꞌdun og halgaꞌ in.
Pasal sok Pongoni-ngoni
7 Pongoni amu sok Tuhan bu kobogoyan amu,
ponontong amu,
bu mokobalak amu da,
pokibukaꞌ amu bu kobukaan amu da.
8 Poꞌ sima-sima ong mongoni,
kobogoyan,
bu sima-sima ong monontong,
mokobalak da,
bu sima-sima ong mokibukaꞌ nog bongowan,
kobukaan da yanin.
9 Ongon taꞌ diyon diniyu ong mga gommaꞌ nog bilaꞌ pongonihan nog bataꞌ in nok pan,
bogoyanin nog batu?
10 Atawa bilaꞌ pongonihan yanin nok sodaꞌ,
bogoyanin taꞌ nong mamak?
11 Na bisan amu mga baldusa,
mokosun amu da mogbogoy nong mobais song mga gumbataꞌ niyu.
Labi na tokodoy og Gommaꞌ niyu Tuhan sok surgaꞌ,
ong mogbogoy nok kobaisan sok sima-sima ong mongoni diyanin.
12 Dadi olo-olo ok kolegan niyu inangon diniyu nok pokasi niyu manusiyaꞌ,
inang niyu da sop dinilon,
poꞌ yonin koyon ong maksud sok Kitab Tawrat bu sok pononduꞌ nong mga konabi-nabihan.
Pasal sog Bongowan sok Surgaꞌ
13 Solod amu song mosikut nog bongowan nok posunguꞌ sok kongkoman nok Tuhan!
Poꞌ og bongowan nok posunguꞌ sok kosiksaan moliwag,
bu molomu og dalanin,
bu modakol ok sumolod dun.
14 Sugaid og bongowan posunguꞌ sok kosannangan mosikut,
bu mologon og dalanin,
bu mikaan da ong mokobalak dun.
Og Gindanan nog Baluꞌ-baluꞌ Nabi
15 Poghalliꞌ amu song mga mokpobaluꞌ-baluꞌ nong nabi nong mangoy diniyu.
Poꞌ og bayuꞌ-bayuꞌ nilon mahatul mamaꞌ nog bilibili,
sugaid ong motudin og gaddat nilon mamaꞌ nog gayam talun.
16 Kosunan niyu ilon tidu song mga ginang nilon,
mamaꞌ nok kayu nok kolilahan niyu tidu sog bunga nin.
Daꞌdun ong moupuꞌ nog buwahan tidu sog bonganga atawa ong mompallam tidu sok kayu dugihon.
17 Dadi ok kayu nong mobais mogbunga nong mobais,
tibuwa ong molaton nok kayu mogbunga sop nong molaton.
18 Ong mobais nok kayu,
diꞌ sop mogbunga nong molaton.
Bu ong molaton nok kayu,
diꞌ sop mogbunga nong mobais.
19 Dadi sosuku nok kayu nog diꞌ mogbunga nong mobais,
pagaon bangka tikpuoy sog gapuy.
20 Na mamaꞌ nini ong mga mokpobaluꞌ-baluꞌ nong nabi,
kosunan niyu tidu sog ginang nilon.
21 Kanaꞌ og lam nok tow nong moktawag dinakon nog,
‘Panghuꞌ,’
mosukuꞌ sok Pomarinta nok Tuhan,
sugaid ong monginang nok kolegan nog Gommaꞌ u dituꞌ sok surgaꞌ.
22 Sog gondow nok poghukum,
modakol na ong moktaluꞌ dinakon,
‘U Panghuꞌ,
kanaꞌ taꞌ ami mikposampoy nog olo-olo tidu sok Tuhan biyan song ngalan nu,
bu binugow nami ong mga soytana biyan song ngalan nu?
Bu kanaꞌ taꞌ modakol ong miinang nami nong mokosobuꞌ-sobuꞌ sok kowasa nong ngalan nu?’
23 Na ok tabalon ku dinilon,
‘Ondiꞌ u amu kindanan,
pokpolayuꞌ amu dinakon mga minginang nok kolaatan.’
Ok Pononggiꞌ pasal sok Polomandoy nog Baloy
24 Sima-sima ong moginongog dinakon bangka nin unutoy,
na yanin na kituꞌ ong mopandoy.
Mamaꞌ yanin nok pandoy nong migimung nog baloy sog lupaꞌ motogas.
Kinukutanin nong modalom bangka nin tambakoy nog batu og gugdokin.
25 Mogdupiꞌ sooy bu mogbaꞌ bangka poglogaluꞌ nong mopagas posunguꞌ sog baloy koyon,
diꞌ da moladak,
poꞌ mopagon og batu nok pikpotindogan dun.
26 Tibuwa sima-sima ong moginongog nong mga ponintuluꞌ u kini sokaliꞌ diꞌ in unuton,
mamaꞌ ilon nok tow babbal nong migimung nog baloyin sog dibabow nok pontad.
27 Bilaꞌ ongon og dupiꞌ nong molandos bu mogbaꞌ bangka biyanoy nog galuꞌ mopagas,
mobuksak og baloy koyon,
bu moladak na dodaꞌ.”