Ok Paduhan nok Tuhan diyon ni Musa
33
Doksuꞌ miktaluꞌ ok Tuhan diyon ni Musa,
“Awaꞌ a sog bonuwa kini dunut nong mga tow nog inoyit nu tidu sog bonuwa Misir,
bangka amu angoy sog lupaꞌ nog jinanjiꞌ u niloꞌ Ibrahim,
Isahak bu ni Yaꞌkuba nog bogoyon ku song mga ponupuꞌ nilon.
2 Punahon ku diniyu ong malaikat,
bangka u pawaoy ong mga bangsa Kanaan,
Amur,
Hit,
Peris,
Hib bug Yebus.
3 Angoy amu sog bonuwa kituꞌ,
bug ayin sumongkuꞌ ong mga pomulan bu jumatu ong mga potubuon.
Sugaid ondiꞌ u na amu dumahan,
bagun ondiꞌ u amu mopatoy sog dalan,
poꞌ mokotogas pa sop og gulu niyu.”
4 Dangan midongog nong mga tow ok tinaluꞌ nok Tuhan koyon,
mikkorukkaan ilon,
bu daꞌ na nilon solugoy ong mga pomulawan bug mokolingkat nok ponapot nilon.
5 Poꞌ asal na miktaluꞌ ok Tuhan dituꞌ ni Musa,
“Taluꞌ nu song mga tow Israel,
‘Amu ong mga tow nong mokotogas og gulu niyu.
Dadi bilaꞌ kodumahan ku amu bisan hadja podaliꞌ,
insunoy mopatoyu amu.
Saan na pongluwas niyu ong mga pomulawan bug mokolingkat nok ponapot niyu bagun kosunan ku bug olo og inangon ku diniyu.’ ”
6 Dadi pingluwas nong mga tow Israel ong mga pomulawan bug mokolingkat nok ponapot nilon sog Bontud Sinay,
bu ondaꞌ nilon na gamitoy.
Og Lokow-lokow Pogbalakan
7 Kilayaman ni Musa mokpotindog nog lokow-lokow molayuꞌ-layuꞌ tidu sok pogonongan nilon,
bu iningalananin,
“Og Lokow-lokow Pogbalakan.”
Sima-sima ong meleg mongongosun sok kolegan nok Tuhan,
mangoy dituꞌ sog lokow-lokow koyon sog luwasan nok pogonongan nilon.
8 Na kada mangoy si Musa sog lokow-lokow,
mokpongindog og lam nong mga tow sok pintuan nog lokow-lokow nilon bangka pogbantoy sampoy sumolod na yanin sog diyalom.
9 Bilaꞌ dituꞌ na si Musa sog diyalom nog lokow-lokow,
og gabun koyon nong mamaꞌ nog gugdok mokpobabaꞌ sok pintuan nog lokow-lokow,
bu oyiton nok Tuhan mokpadu si Musa.
10 Puun pa motongow nong mga tow og gabun nong mamaꞌ nog gugdok minindog sog bongowan nog lokow-lokow,
mokpongindog og lam nilon sog bongowan nong mga lokow-lokow nilon bangka ilon sudjud.
11 Bilaꞌ ok Tuhan mogoyit mokpadu diyon ni Musa,
mogadap ilon mamaꞌ nok pokpadu nok tow sok supali nin.
Na bilaꞌ sop modoksuꞌ ilon mokpadu,
mokpuliꞌ na si Musa sok pogononganin.
Tibuwa ok sosuguonin nong mobataꞌ pa,
yonin na si Yussa,
og bataꞌ ni Nun,
diꞌ da mawaꞌ sog lokow-lokow.
Mikpotongow ok Tuhan nok Sahaya nok Kotasin diyon ni Nabi Musa
12 Miktaluꞌ si Musa sok Tuhan,
“Tinaluan nu akon nog akon ong moglokounutan song mga tow bagun mangoy dituꞌ sog lupaꞌ nog jinanjiꞌ nu,
sugaid daꞌ nu pa akon posunoy bug sima ok podunuton nu dinakon.
Miktaluꞌ a pa nok kolilahan nu tokodoy akon,
bu kisuatan ka dinakon.
13 Dadi bilaꞌ kisuatan ka dinakon,
pongonihon ku tokodoy dinika nok tonduoy nu akon nong mga kolegan nu bagun kolilahan ku tokodoy ika,
bu bagun lolayun ka da sop kosuatan dinakon.
Pondom nu og bangsa kini,
ok piktowan nu.”
14 Ok tabal nok Tuhan diyon ni Musa,
“Unutan ku ika,
bu bogoyan ku ika nok kosannangan.”
15 Ok taluꞌ ni Musa diyanin,
“Bilaꞌ diꞌ a mogunut dinami,
golom pa nog diꞌ nu ami pawaon tidu dini.
16 Poynoy pokkosun nog duma nok kisuatan ka dinakon,
akon bug mga piktowan nu bilaꞌ diꞌ nu ami unutan?
Diꞌ nilon kosunan nok piselen nu ami sok kotanan nog bangsa dini sog dunya bilaꞌ ondiꞌ a mogunut dinami.”
17 Taluꞌ nok Tuhan diyon ni Musa,
“Inangon ku ok tinaluꞌ nu koyon,
poꞌ kisuatan ku dinika,
bu kolilahan ku tokodoy ika.”
18 Ok taluꞌ pa ni Musa,
“U Tuhan,
bung mayan potongow nu dinakon ok sahaya nok kotas nu.”
19 Ok tabal nok Tuhan diyon ni Musa,
“Miyan ku sog gadapan nu.
Potongowon ku dinika ok kotanan nok kobaisu,
bu taluon ku ong ngalan kub sog gadapan nu.
Molasa bu mololatu sok sima-sima ok kolasahan bu kololatan ku.”
20 Sugaid ok taluꞌ pa nok Tuhan,
“Ondiꞌ mogdadi nong motongow nu og bayuꞌ-bayuꞌ u,
poꞌ daꞌdun ong motubuꞌ bug sima ong mokotongow dun.”
21 Na taluꞌ nok Tuhan,
“Tontonga,
ongon dini song molani u og batu mosolag,
indoga diyon.
22 Dadi soliyan ku miyan dunut nok sahaya nok kotasu,
potilungan ku ika sog diyalom sonip nog batu,
bu dungmaan ku ika nok paladu sampoy nong mokobiyan ku.
23 Bilaꞌ mokoliyu u na,
bangka u pa awaoy ok komotu bagun motongow nu ok tolintingu,
sugaid og bayuꞌ-bayuꞌ u,
diꞌ nu motongow.”