Pogawaꞌ 32

Ong Nati Sapiꞌ nog Bulawan

Na pagga miobon pokodiksun si tidu sog bontud, mitonop ong mga tow. Dadi mikpuduk ilon mangoy dituꞌ ni , bangka nilon taluoy, “Pogbuwata, imungoy nu ami nok tuhan-tuhan nong mongulu dinami, poꞌ diꞌ nami na kosunan bug miolo si Musa, ok tow kituꞌ nong mikpoluwas dinita tidu sog bonuwa .”

2 Miktaluꞌ si Harun dinilon, “Podalioy niyu monangsuꞌ ong mga ponampong bulawan nok pinolug nong mga kolibunan niyu bug gumbataꞌ niyu libun-laki, bangka niyu oyit dini dinakon.” 3 Dadi pigdaliꞌ-dalian monangsuꞌ nok kotanan nok tow ong mga ponampong nilon nog bulawan, bangka nilon oyitoy dituꞌ ni Harun. 4 Tinabuk ni Harun ong mga ponampong nilon bangka nin tunagoy bu sinonsalin nong nati sapiꞌ. Doksuꞌ miktaluꞌ ilon, “U mga tow , yonin kini ok tuhan ta niyu, ong mikpoluwas dinita tidu sog bonuwa Misir!”

5 Dangan mitongow koyon ni Harun, migimung yanin nok sog gunahan nok sapiꞌ koyon, bangka pokposun, taluꞌ in, “Lomaꞌ mokpokoradjaan ita niyu para sok Tuhan Pogbayaꞌ-bayaꞌ.” 6 Dadi poglomaꞌ migbuwat ong mga tow nong mosompun bangka ilon pogoyit nong mga potubuon. Tubus mikkurban ilon nok bug poksulut-sulut. Doksuꞌ kinuman bu miginum ilon, bu miglabi-labi ok poglami-lami nilon.

7 Miktaluꞌ ok Tuhan diyon ni Musa, “Diksun ka sok piktowanan nu, ok piluwas nu tidu sog bonuwa Misir, poꞌ linaat nilon og ginawa-baran nilon. 8 Podaliꞌ da nilon tinolikudan ok suguan ku dinilon. Migimung ilon nong nati sapiꞌ bulawan para sog ginawa nilon, bangka nilon sumbahoy bu pikkurbanan nilon bangka poktaluꞌ, ‘U mga tow Israel, yonin kini ok tuhan ta niyu, ong mikpoluwas dinita sog bonuwa Misir.’ ” 9 Miktaluꞌ pa ok Tuhan ni Musa, “Mitongowu ong mga tow kini nong mokotogas og gulu nilon. 10 Saan na potiyangan nu akon nok papason ku ilon poꞌ milingitu tokodoy dinilon. Ika na bug mga ponupuꞌ nu og imungon ku nog bangsa mosolag.”

11 Sugaid si Musa mikpokilolat tokodoy sok Tuhan, taluꞌ in, “U Tuhan Pogbayaꞌ-bayaꞌ, diꞌ nu papason biyan sog lingit nu ong mga piktowan nu, og inoyit nu mawaꞌ song Misir tidu sok pagas nok kowasa nu. 12 Na bilaꞌ papason nu, olo na ong motaluꞌ nong mga tow Misir? Sunoy motaluꞌ nilon nog inalap nu ong mga piktowan nu sog bonuwa Misir bangka nu ilon patoyoy sok kobukidan bagun mobolong na ilon sog dunya. Anduꞌ, diꞌ nu na ilon kolingitan, bu diꞌ nu na ilon pogmulkaan. 13 Pondom nu ong mga sosuguon nu nok siloꞌ , bu si Yaꞌkub. Bakasa jinumanjiꞌ dinilon nok podakolon nu ong mga ponupuꞌ nilon mamaꞌ nog dakol nog bitun sog langit, bu bogoyon nu song mga ponupuꞌ nilon og lupaꞌ nok soliyan nilon pogonong-onongan nong moangkon nilon soumulan.” 14 Dadi ondaꞌ podayunoy papason nok Tuhan ong mga piktowanin.

15 Doksuꞌ dinumiksun si Musa tidu sog bontud dunut duwaꞌ buk batu lokpiꞌ sok komotin nok sobolaꞌ-posobolaꞌ sinulatan nok saraꞌ nok Tuhan. 16 Og duwaꞌ buk nog batu koyon, inimung nok Tuhan. Ok Tuhan tokodoy ok sinumulat dun sog duwaꞌ batu koyon.

17 Soliyan ni Musa dumiksun bug duma nin nok si Yussa, midongog ni Yussa og gekes nong mga tow nong miglosikan, bu miktaluꞌ yanin diyon ni Musa, “Ongon og gekes nok pogbunuꞌ sok pigonongan ta.” 18 Ok tabal ni Musa, “Kanaꞌ koyon og gekes nong mimondag atawa gekes nog dinag, sugaid ong midongogu, og gekes nong mikkolangan.”

19 Dangan miksilani na si Musa bu si Yussa sok pigonongan nilon, mitongow ni Musa ong nati sapiꞌ bulawan koyon bu ong mga tow sop nong mingigal, dadi landuꞌ tokodoy og lingitin. Tinibagin ong mga batu lokpiꞌ kituꞌ sok pun nog bontud bangka kobogbag. 20 Tubus inalap ni Musa ong nati sapiꞌ nog inimung nilon, bangka nin tutungoy sog gapuy. Doksuꞌ linupotin nong mopinu bangka kanatoy sog dibabow tubig, bu piinumin song mga tow .

21 Doksuꞌ miktaluꞌ si Musa diyon ni Harun, “Olo og ininang nong mga tow kini dinika nong mioyit nu ilon sog mosolag?” 22 Na tinumabal si Harun, “Diꞌ a molingit dinakon, tuwan. Asal nu na kiosunan ong mga tow koyon nong modaliꞌ da monginang nok kolaatan. 23 Miksuguꞌ ilon dinakon nog imungan ku ilon nok tuhan-tuhan nong mongulu dinilon, poꞌ diꞌ nilon na kosunan bug miolo a na, ok tow kituꞌ nong mikpoluwas dinilon tidu sog bonuwa Misir. 24 Tinaluan ku ilon nok sima-sima dinilon ok taga bulawan, podalion nilon ponangsuon. Dadi binogoy nilon dinakon, bangka u tikpuoy sog gapuy. Poktikpuꞌ u dun, miimung nong nati sapiꞌ.”

25 Na mitongow ni Musa nog diꞌ na kosaggaan ong napsu nong mga tow, bu mokosipog-sipog na ilon song mga banta nilon poꞌ pisagadan hadja ilon ni Harun. 26 Dadi minindog si Musa sog bongowan nok pikkampuhan nilon, bu miktaluꞌ yanin nong monamal, “Sima-sima diniyu ong mogunut sok Tuhan, pokpolani amu dinakon!” Na ong mga ponupuꞌ ni , miktopuk ilon kotanan posunguꞌ dituꞌ ni Musa. 27 Tinaluan ilon ni Musa, “Miktaluꞌ ok Tuhan nong mga tow Israel, ‘Ok sosolokotow diniyu moktakos nok kalisin, bangka niyu libutoy ok pogonongan ta, bu patoy niyu ok kotanan nong mikodusa sok Tuhan bisan pa og gilug niyu, supali, atawa ok kilani baloy niyu.’ ” 28 Dadi inunut nong mga ponupuꞌ ni Lebi ong mga suguan dinilon ni Musa. Ongon tolu ngibu kotow ong minatoy sog gondow niyon. 29 Dadi tinaluan ni Musa ong mga ponupuꞌ ni , “Sog gondow kini winakil niyu og ginawa-baran niyu moginang para sok Tuhan, poꞌ tinumombaꞌ amu sok suguan nok Tuhan diniyu. Pinatoy niyu ong mga tow nok taga dusa bisan pa og bataꞌ niyu atawa ok pigilugan niyu. Dadi sog gondow kini, binarakatan amu nok Tuhan.”

30 Poglomaꞌ miktaluꞌ si Musa song mga tow, “Landuꞌ kosolag og dusa niyu, dadi mokpuliꞌ u sok Tuhan dituꞌ sok tas bontud. Sunoy mokopongoni u nok koampunan nong mga dusa niyu.”

31 Dadi mikpuliꞌ si Musa sok Tuhan, taluꞌ in, “Anduꞌ Tuhan, landuꞌ kosolag og dusa nong mga tow kini, poꞌ migimung ilon nok tuhan-tuhan bulawan para sumbahon nilon. 32 Anduꞌ, bung mayan ampunon nu ong mga dusa nilon! Sugaid bilaꞌ diꞌ nu na moampun, na pongonihon ku dinika awaꞌ nu na ong ngalan ku sok Kitab nok sinulatan nu nong ngalan nong mga tow sukuꞌ nu.”

33 Na tinumabal ok Tuhan dituꞌ ni Musa, “Sima-sima ong migdusa dinakon, yanin da og awaon ku sok Kitab. 34 Angoya na dituꞌ, unutoy nu ong mga tow posunguꞌ sog bonuwa nok tinaluꞌ u dinika. Koyon da ong malaikatu, moguna yanin dinika. Sugaid matong da og waktu nok siksaon ku ilon pasal sog dusa nilon.”

35 Dadi pidatongan nok Tuhan ong mga tow nog balaꞌ, poꞌ piimung nilon si Harun nong nati sapiꞌ bulawan.