Ong mga Sodokka para Pogimung nog Langgal
25
Tinaluan nok Tuhan si Musa,
2 “Taluoy nu ong mga tow Israel nong mogbogoy ilon nok sodokka dinakon.
Tabuk nu og bogoyon nilon tidu sog ikhlas nok pongatoyan nilon.
3 Maꞌ nini ong mga panyapan nok tabukon nu tidu dinilon:
Bulawan,
silber bug tumbaga,
4 bolohibu nog bilibili nok tininaan nog bilu,
taluka bug pula,
tubus kokanaꞌ putiꞌ nong molingkat,
bolohibu nok kambing,
5 panit nog bilibili laki nok tininaan nok pula,
bu mga mokolingkat nog len panit nog binatang bug kayu akasya.
6 Tabukon nu da sop og lana para song mga politaan bug pokpomut ampuon sog lana pongsutsi bu sok komanyan,
7 tubus kumalaꞌ batu oniks bu og duma nong mga batu mohalgaꞌ nok podokoton sok ponapot nok solugon nok kinotasan nog gimam bu sog bulusa sog digdobin.b
8 Pogdoksuꞌ,
suguon nu ilon nog imungan nilon akon nog baloy sutsi bagun diyon ku diniyu.
9 Unuton nu tokodoy ok pogimung nog Langgal koyon bu ok kotanan nok kolangkapin nog botangon nu sog diyalomin mamaꞌ nok posunguꞌ u taluon dinika.”
Doksuꞌ piksunuꞌ-sunuꞌ nok Tuhan diyon ni Musa bug ponoy ok pogimung nog lam nituꞌ.