Tinabuk nong mga Tow Israel ok Pigjanjian nilon bug Tuhan
24
Na tinaluan na sop nok Tuhan si Musa,
“Tukada dini dinakon dunut niloꞌ Harun,
Nadab,
Abihu bug pitu puluꞌ kotow nong migmokogulang sog Israel.
Sudjud amu dinakon nog diyon amu pa sok kolayuan.
2 Sala-sala nu hadja ong mokpolani dinakon,
sugaid ong mga duma nu ondiꞌ.
Ong mga duma sop ondiꞌ mogdadi mogunut dinika tumukad sog bontud.”
3 Dadi inangoy ni Musa taluoy ong mga tow pasal sok kotanan nok taluꞌ bug suguan nok Tuhan.
Migdongan tumabal og lam nilon,
“Inangon nami ok kotanan nok tinaluꞌ kituꞌ nok Tuhan.”
4 Dadi sinulat ni Musa ok kotanan nok tinaluꞌ nok Tuhan sok Kitab.
Migbuwat yanin nog doliꞌ-ondow,
bangka pokpotindog nok pokkurbanan sok pun bontud.
Migbotang da sop yanin diyon nok sopuluꞌ bu duwaꞌ mokosolag nog batu pomondoman sok sopuluꞌ bu duwaꞌ pangkatan nog bangsa Israel.
5 Doksuꞌ miksuguꞌ yanin song mga kosubulan nong moksumbaliꞌ ilon nok potubuon moimung kurban tutung bug mga sapiꞌ laki para kurban poksulut-sulut nilon sok Tuhan.
6 Minalap si Musa nok sotongaꞌ nog duguꞌ nong mga kurban kituꞌ,
bu binotangin song mga polonggana,
bu ok sotongaꞌ pimisikin sok pokkurbanan.
7 Tubus inalapin ok kitaba nok sinulatan nok pigjanjian bangka nin ponamaloy mogbasta sog gadapan nong mga tow.
Bu migdongan ilon tumabal,
“Tombaan bu inangon nami ok kotanan nok sinuguꞌ nok Tuhan.”
8 Doksuꞌ inalap ni Musa og duguꞌ tidu song mga polonggana bangka nin pisikoy song mga tow.
Miktaluꞌ yanin,
“Yonin kini og duguꞌ nok sinumaksi sok pigjanjian nog inimung nok Tuhan dinita sok pogbogoyin nok kotanan nok suguanin kini.”
Doksuꞌ nituꞌ,
tinaluan nok Tuhan si Musa nok tumukad-tukad yanin sog bontud dunut mga migmokogulang koyon.
Dituꞌ nilon mitongow ok Tuhan nog Israel.
Ok pigindoganin mamaꞌ molingkat nok kumalaꞌ sapirb nog bilu bu mosinow mamaꞌ nog langit.
Sugaid bisan diyon ong mga migmokogulang,
ondaꞌ ilon olohoy nok Tuhan.
Diyon ilon kinuman sog gadapan nok Tuhan,
og gindanan nok pigjanjian nilon.
Doksuꞌ tinumukad na si Musa dunut sosuguonin nok si Yussa sog bontud song molani nok Tuhan sog bon nok pat puluꞌ ondow.
Miktaluꞌ ok Tuhan ni Musa nong mga suguan bu pokposampoy nok taluꞌ in song mga tow Israel.c