Mga Saraꞌ pasal song mga Ginang bug Hukuman nong Mologdong
23
Mikparman puliꞌ ok Tuhan,
“Ondiꞌ amu mokposampoy nok kanaꞌ motud.
Ondiꞌ amu tumabang song mga tow nong mikodusa biyan sok poksaksiꞌ nong mga loput.
2 Ondiꞌ amu mogunut sog ginang molaat nok kodakolan.
Bilaꞌ sumaksiꞌ amu,
ondiꞌ niyu pindahon ok kosobonnalan bagun tibuwa mounut ok kolegan nok kodakolan.
3 Ondiꞌ niyu sugutan ong miskinan sog dusa nin sowkat na miskinan yanin.
4 Bilaꞌ motongow niyu nong miboluy ok sapiꞌ atawa kudaꞌ himar nog banta niyu,
sumboy ulion niyu kini diyanin.
5 Bilaꞌ motongow niyu ok kudaꞌ himar nok tow nong migdumut diniyu mibuksak sabap sok kobogat nog lulanin,
ondiꞌ niyu potiyangan.
Apit amu bangka niyu yanin tabangoy mokpobuwat dun!
6 Tantu niyu nok kobogoyan ong mga miskinan nog hukuman mologdong bilaꞌ ongon ok parkala dinilon.
7 Ondiꞌ amu mongintom nong molaat nok kanaꞌ motud bisan sok sima towoy.
Ondiꞌ niyu patoyon ok solokotow nog daꞌdun og dusa nin,
poꞌ siksaon ku og bisan sima nong moginang nini.
8 Ondiꞌ amu tumabuk nok tindan poꞌ ok tindan mokobuta sok tow boyaan kodungmaan ok kosobonnalan nok tow nog daꞌdun og dusa nin.
9 Ondiꞌ niyu daugdaugon ong mga tow langyow nog diyon diniyu.
Pondom niyu nog amu sooy sibon mga langyow sog bonuwa Misir!”
Ong mga Saraꞌ pasal sok Tahun bu pasal sog Gondow Pogogulali
10 Migdayun pa ok Tuhan nok taluꞌ in,
“Sog diyalom nom tahun mogimula amu diyon sog lupaꞌ niyu bu gumani nok songkuꞌ in.
11 Sugaid sog ikopitu tahun,
naꞌ niyu pa pomulahan,
poulali niyu og lupaꞌ.
Potiyangoy niyu pongalapon nong mga miskinan ok kan diyon,
bu ok samaꞌ sop nilon potiyangan niyu na kanon nong mga binatang talun.
Maꞌ niyon da sop og inangon niyu song mga pomulan niyu nog anggul bug jaytun.a
12 Poginang amu sog diyalom nom ondow,
sugaid sog ikopitu ondow ulali amu bagun mokulali da sop ong mga sapiꞌ bug mga kudaꞌ himar,
bu lumasig puliꞌ ong mga gulipon bug mga tow langyow nong migonong duma diniyu.
13 Unut niyu mahatul ok kotanan nok suguan ku diniyu.
Ondiꞌ amu mongoni-ngoni song mga tuhan-tuhan atawa bisan dona sumabbut song mga ngalan nilon.”
Ong mga Suguan nok Tuhan pasal sok Tolubuk Halilaya kada Tahun
14 “Tolu kali sotahun sumboy moghalilaya amu pokpotas para dinakon.
15 Poksaut nog bulan Abib,
jamu niyu og Halilaya nok Pan nog Daꞌdun ok Posuligin mamaꞌ nok sinuguꞌ u diniyu.
Sok pitu ondow koyon kuman amu nok pan nog daꞌdun posuligin poꞌ sog waktu koyon mikawaꞌ amu song Misir.
Na ong monolokotow mogoyit dinakon nok kurban sog waktu koyon.
16 Jamu niyu da sop og Halilaya Pongganib biyan sok pogoyit niyu dinakon nong mikuna songkuꞌ nog guma niyu.
Tubus jamu niyu da sop og Halilaya nok Kodoksuan nok Pongganic sok kodoksuan nok tahun,
bilaꞌ mokopulun amu na nok songkuꞌ nog guma niyu.
17 Tolu kali sotahun sumboy tumuwaꞌ ok kotanan nok kolakihan song mga Halilaya kini moksumba dinakon,
ok Tuhan Pogbayaꞌ-bayaꞌ.
18 Ondiꞌ niyu kurbanon dinakon og duguꞌ nok potubuon dunut nok pan taga posulig.
Bu sumboy ondiꞌ kosisoloman ok subuk nok kinurban niyu.
19 Oyit niyu sog Langgal nok Tuhan ok kinobaisan nok tagnaꞌ bunga nok pimula niyu.
Bu bilaꞌ moksumbaliꞌ amu nong nati kambing,
diꞌ niyu polutuon sog gatas nog ginaꞌ in.”
Migjanjiꞌ ok Tuhan nok Podunutonin ong Malaikatin sok Piktowanin
20 “Ningkomun,
mokpoyitu nong malaikat mogipat diniyu sok kopanow niyu bagun potontulonin amu sog bonuwa nok pidinsamaꞌ u diniyu.
21 Ponginongog amu diyanin,
bu unut niyu ok taluonin.
Ondiꞌ amu sumaggaꞌ diyanin poꞌ ondiꞌ in ampunon ok pogdugtul niyu poꞌ diyon diyanin ong ngalan ku.
22 Bilaꞌ moginongog amu mahatul sok taluꞌ in bu inangon niyu og lam nok suguan ku,
bantahon ku ong mga mogdumut diniyu,
sugutan ku amu song mga mongatu diniyu.
23 Moguna diniyu ong malaikatu,
bu oyitonin amu dituꞌ sog lupaꞌ nong mga tow,
Amur,
Hit,
Peris,
Kanaan,
Hib bug Yebus,
bu papason ku ilon.
24 Diꞌ amu sumumba atawa moktolagad song mga tuhan-tuhan nilon,
atawa mogunut sog ginang nilon.
Ladak niyu nok tantu ong mga tuhan-tuhan nilon,
bu lubu niyu ong mga gugdok batu nilon.
25 Akon da ok Pogbayaꞌ-bayaꞌ,
ok Tuhan niyu,
ok sumbahon niyu.
Bilaꞌ tombaan niyu akon,
barakatan ku ok kan bug tubig niyu,
bu daꞌdun og longkoan nong monanam niyu,
26 bu daꞌdun og libun kapasan atawa moimung nog baug diyon sog lupaꞌ niyu.
Popayaton ku og gumul niyu.
27 Pongondokon ku ong mga tow nok kodatongan niyu,
bu sasowon ku ok pomikilan nilon bagun ilon momolaguy mawaꞌ diniyu.
28 Mokpoyitu nong mga tiyukand nong moguna diniyu,
bu bugowon nilon ong mga tow Hib,
Kanaan,
bu mga tow Hit.
29 Sugaid diꞌ u ilon bugowon sog bon nok sotahun bagun ondiꞌ moimung gulangan og lupaꞌ bu ondiꞌ dumakol og binatang talun dituꞌ nong mokosaggaꞌ diniyu.
30 Bugowon ku ilon nong mayaꞌ-mayaꞌ sampoy sog dumakol amu bu moagow niyu na og lupaꞌ.
31 Ok toktoban nog lupaꞌ niyu moktidu sog Dagat Pula mangoy sog Dagat Meditera,
bu tidu sog ginlupaan mimala mangoy sok subaꞌ Alpurati.
Wakilon ku diniyu ong mga tow nong migonong sog lupaꞌ koyon,
bu bugowon niyu ilon.
32 Ondiꞌ amu mogimung nok pogjanjian dinilon atawa song mga tuhan-tuhan nilon.
33 Ondiꞌ niyu ilon kumboyon mogonong sog lupaꞌ niyu poꞌ sunoy ilon ok sabapan nong mogdusa amu dinakon.
Poꞌ bilaꞌ mogdogiling amu sumumba sok tuhan-tuhan nilon,
tantu moimung koyon nog giman diniyu.”