Ong mga Saraꞌ nok Tuhan pasal sog Gartaꞌ
22
Miktaluꞌ pa ok Tuhan,
“Bilaꞌ ok solokotow monakow nok sapiꞌ atawa bilibili,
tubus sinumbaliꞌ in atawa dinagangin,
sumboy mogbayad yanin.
Sok solobuk sapiꞌ nog dinakowin,
gantianin nog lima buk sapiꞌ.
Bu sok solobuk bilibili nog dinakowin,
gantianin nok pat buk bilibili.
2-4 Sumboy tokodoy mogbayad yanin nog dinakowin.
Sugaid bilaꞌ daꞌdun ok pogbayadin,
sumboy dagangon yanin mamaꞌ nog gulipon bagun kobayadan og dinakowin.
Bilaꞌ og dinakowin nok sapiꞌ,
kudaꞌ himar,
atawa bilibili motongow nok totubuꞌ pa diyon diyanin,
bayadanin kini nog duwaꞌ kali.
Bilaꞌ monakow ok solokotow sog gobi bangka kosaut,
doksuꞌ binombal yanin,
bangka patoy,
daꞌdun da og dusa nong mikopatoy koyon.
Sugaid bilaꞌ miinang koyon sog waktu nog gondow,
na moitung da nok taga dusa yanin.
5 Bilaꞌ ok potubuon posoksabon bu boluyon nog gapuꞌ in sog guma atawa sog anggulan nog len tow,
sumboy bayadanin ong miokan nok potubuonin koyon.
Ok pogbayadin,
og landuꞌ kobais nok songkuꞌ bug bunga anggul tidu sog gumanin.
6 Bilaꞌ ongon ok tow nong migdoksul,
tubus minanap og gapuy song mga sigbot bu mga pomulan nog len tow,
na sumboy bayadan nong migdoksul kituꞌ ong mga pomulan nong mitutung.
7 Soupama mikpotaguꞌ ok solokotow nok sinin atawa gartaꞌ in dituꞌ sok kilani baloyin,
tubus dinakow ok pitaguꞌ in koyon,
bilaꞌ mosaggow ong minakow,
sumboy bayadanin nog duwaꞌ kali.
8 Tibuwa bilaꞌ ondiꞌ mosaggow ong minakow,
sumboy oyiton og winakilan kituꞌ nog gartaꞌ song mga moghuhukum bagun sapahanin sok Tuhan Mahatinggi bilaꞌ ongon taꞌ og gampuꞌ in dun atawa kanaꞌ.
9 Soupama ongon duwaꞌ kotow moksuwal sabap sog gartaꞌ nong mibolong mamaꞌ na nog bilibili,
kudaꞌ himar,
sapiꞌ,
dogdoy,
atawa bisan olo na,
sokaliꞌ angkonon nok solokotow,
na sumboy madap ilon sok Tuhan.
Ok tow mosugat nog hukuman nok Tuhan,
sumboy bayadanin og gapuꞌ nong mga gartaꞌ koyon duwaꞌ kali.
10 Soupama,
piipat nok solokotow ok kudaꞌ himarin,
sapiꞌ,
bilibili,
atawa bisan olo potubuonin dituꞌ sok kilani baloyin.
Sokaliꞌ minatoy,
atawa miangol,
mibolong,
atawa inalap nog daꞌdun ong mikotongow dun,
11 ong migipat dun sumboy madap song mga moghuhukum bu sumapa sok Tuhan Mahatinggi nog daꞌdun og dusa nin niyon.
Na sumboy tumud dun og gapuꞌ in,
bu ondiꞌ in kini pobayadon.
12 Sugaid bilaꞌ dinakow ok potubuon,
sumboy mogbayad ong mogogipat dituꞌ sog gapuꞌ in.
13 Bilaꞌ pinatoy ok potubuon nong mga binatang talun,
na sumboy oyiton nong migipat ok samaꞌ-samaꞌ nok potubuon koyon gantaꞌ saksiꞌ in,
bu ondiꞌ in na sumboy bayadan.
14 Bilaꞌ mongodam ok solokotow nok potubuon sog duma nin,
tubus miangol bu minatoy nog ondaꞌ diyon og gapuꞌ in,
na sumboy bayadan nong mingodam kituꞌ.
15 Sugaid bilaꞌ diyon solabu og gapuꞌ in,
ong mingodam,
ondiꞌ na mogbayad.
Bilaꞌ sop inabangan ok potubuon koyon,
ok sin nok pigabang dun,
yonin na kituꞌ og bayad sog gangol atawa kopatoy nok potubuon koyon.”
Og Duma pa nong mga Saraꞌ
16 “Bilaꞌ mongdupang og laki sok solobuk budjang nog ondaꞌ pa pogdaakoy sampoy mooyitin moguboy,
sumboy mogbayad yanin nok sunggudan bangka nin poglibunoy.
17 Tibuwa bilaꞌ ondiꞌ tokodoy meleg og gommaꞌ nog libun pokawing og bataꞌ in sog laki koyon,
mogbayad da sop og laki sog halgaꞌ nog batuk sok sunggudan nok para sog budjang.
18 Na pasal song mga monginang-inang,
diꞌ niyu ilon kumboyon motubuꞌ.
19 Sima-sima ong mogjina sog binatang,
sumboy patoyon.
20 Sima-sima ong mokkurban dituꞌ sog len tuhan liyu dinakon,
sumboy tokodoy papason.
21 Ondiꞌ niyu daugdaugon bu pobabaꞌ-babaon ong mga tow langyow.
Pondom niyu nog amu sooy mga langyow da sop sog bonuwa Misir!
22 Diꞌ niyu poglaugan ong mga balu libun bug mga bataꞌ ilu.
23 Bilaꞌ inangon niyu kini,
bu mokpotabang ilon dinakon,
tantu tokodoy tabangan ku ilon.
24 Dadi molingitu tokodoy diniyu bu patoyon ku amu sog bunuꞌ.
Na mobalu ong mga libun niyu,
bu mobataꞌ ilu ong mga gumbataꞌ niyu.
25 Bilaꞌ mokpodam amu nok sin sog bisan sima nok piktowan ku nong miskinan,
ondiꞌ niyu na potubuan mamaꞌ nok poginangon nong mga mokpopodam nok sin.
26 Bilaꞌ alapon niyu og juba nok pokasi niyu tow gantaꞌ sandaꞌ sog inutangin dinika,
na uliꞌ nu diyanin sog ondiꞌ pa sumindop og gondow.
27 Poꞌ yonin koyon ok pokkumutin bilaꞌ motulug na yanin sog gobi.
Olo ma ok pogdungmaꞌ in sog lawasin bilaꞌ ondiꞌ niyu koyon ulion?
Na bilaꞌ mokitabang yanin dinakon,
tabangan ku yanin poꞌ molilolatoyu.
28 Ondiꞌ niyu ponglaatan ok Tuhan,
bu diꞌ niyu sop suknaan ong mga kounutan niyu.
29 Ondiꞌ niyu inobosana mogbogoy nong mga sodokka dinakon tidu song mga songkuꞌ nok pomulan niyu bug tubig anggul bug lana jaytun.
Wakil niyu dinakon ong mga gumbataꞌ niyu nog laki gulang bataꞌb.
30 Kurban niyu dinakon ong mga mikuna bataꞌ laki nong mga sapiꞌ,
bilibili bug kambing niyu.
Ondiꞌ niyu suwoyon sog ginaꞌ in ok potubuon koyon sog bon nok pitu ondow.
Sugaid sog ikowalu ondow sumboy kurbanon niyu na dinakon.
31 Amu ok piktowan ku nok piselen ku moimung nok sutsi nok sukuꞌ u,
dadi ondiꞌ amu kuman nog binatang nok pinatoy nong mga binatang talun.
Pokan niyu na hadja koyon song mga gayam.”