Pogawaꞌ 21

Ong mga Suguan pasal song mga Gulipon

Miktaluꞌ ok Tuhan diyon ni , “Yonin kini ong mga saraꞌ nok suguon nu song mga tow nog unuton nilon: 2 Bilaꞌ sumaluy amu nog salu bangsa niyu , moktolagad yanin diniyu sog diyalom nom tahun. Sugaid sok tolipunan nog ikopitu tahun moluhaya na yanin mawaꞌ nog daꞌdun og bayadanin. 3 Bilaꞌ sog waktu kosaluy niyu dun subul pa yanin, sala nin da ong mokawaꞌ pogdatong nok pitu tahun. Sugaid bilaꞌ taga libun na yanin sog waktu nok sinaluy niyu yanin, mokawaꞌ da sop sampoy og libunin. 4 Tibuwa bilaꞌ pilibunan yanin nog gamu nin bu mikobataꞌ ilon nog libun atawa laki, moluhaya na yanin mawaꞌ sog ikopitu tahun, sugaid og libun bu mga gumbataꞌ in mokpobagak sog gamu nin. 5 Sugaid bilaꞌ mangkon tokodoy og gulipon koyon nok kolasahanin og gamu nin, og libunin bu mga gumbataꞌ in, bu ondiꞌ yanin meleg moluhaya mawaꞌ, 6 oyiton yanin nog gamu nin madap sok Tuhan, bu dituꞌ sog bongowan nog , tukon nog gamu nin ok tolinga nin, bu moimung yanin nog gulipon sog bonin totubuꞌ.

7 Na bilaꞌ soupama dagangon nok solokotow laki og bataꞌ in nog libun moimung nog gulipon bagun poglibunon, ondiꞌ moluhaya mawaꞌ og gulipon libun koyon sog ikopitu tahun mamaꞌ nog gulipon laki. 8 Bilaꞌ ondaꞌ kosulutoy diyanin og gamu nok sinumaluy dun para poglibunonin, sumboy kumboyon yanin nog gamu nin lokaton nog gusba-warisin. Sugaid ondiꞌ yanin mogdadi dagangon nog gamu nin dituꞌ song mga tow langyow, poꞌ ondaꞌ in bologbogoy og janjiꞌ in sog libun koyon. 9 Tibuwa bilaꞌ soupama ok kolegan nog gamu podinsamaonin og libun gulipon koyon sog bataꞌ in nog laki, sumboy ok kopogoyitin dun mamaꞌ nog bataꞌ in tokodoy. 10 Bilaꞌ ongon og gamu nok poglibunonin og guliponin, sugaid moglibun pa tokodoy yanin puliꞌ, sumboy podayunonin pa bogoyan og libun gulipon koyon nok kan, mga ponapot bu diꞌ yanin koawaan nok kopatut sog laki nin. 11 Tibuwa bilaꞌ ondiꞌ in mobogoy ok tolubuk koyon, moluhaya na mawaꞌ og libun koyon nog daꞌdun og bayadanin.”

Ong mga Saraꞌ nok Tuhan pasal song mga Ginang nong Mokomula

12 “Sima-sima ong mominasa bu momunuꞌ nok tow, sumboy patoyon da sop yanin. 13 Sugaid bilaꞌ ondaꞌ in tuudoy, bu diꞌ u pogondian nong mokobiyan, mokpodinsamaꞌ u nok poksolobunihan bagun ondiꞌ yanin mogdadi gonaton nong mga meleg sumuliꞌ diyanin. 14 Tibuwa bilaꞌ pinikil bu tinuud nok tow ok pokpatoy, bisan pa diyon yanin sok ku, alap niyu yanin bangka patoyoy.

15 Sima-sima ong mominasa sog gommaꞌ bu ginaꞌ in, sumboy patoyon yanin.

16 Sima-sima ong mongidnap nong manusiyaꞌ sumboy patoyon, bisan pa misaluy na nog len tow ok kinidnapin koyon atawa diyon pa sok kongkomanin.

17 Sima-sima ong monuknaꞌ sog gommaꞌ atawa ginaꞌ in, sumboy patoyon.

18 Na soupama moksuwal og duwaꞌ kotow. Tubus suntukon nok solokotow og duma nin atawa bombalonin nog batu, tibuwa ondaꞌ da patoy, ondiꞌ hadja mokobuwat, 19 na diꞌ na siksaon ong miminasa bilaꞌ kulian na og bininasa nin bangka pokopanow-panow na bisan moktungkud. Tibuwa sumboy tokodoy bayadanin og waktu nong migasta sog bon milongkoꞌ ok tow kituꞌ, bu ipatonin kini sampoy sok kulian tokodoy.

20 Bilaꞌ lakposon nog gamu og guliponin, libun atawa laki nong moimung sabap nong matoy og koyon dun, sumboy sulian yanin. 21 Sugaid bilaꞌ kulian da og gulipon koyon pogbiyan nok sondow atawa duwaꞌ ondow, ondiꞌ siksaon og gamu koyon poꞌ yanin og gapuꞌ nog gulipon koyon.

22 Na soupama ongon ong moksuwal, doksuꞌ mosugat nilon ok solobuk libun bodos bangka koapasoy, sugaid ondaꞌ da pogmula og libun koyon, na sumboy salaon ong mikosugat koyon sog halgaꞌ nok pongonihon nog laki nin bu mounut sok kinumboy nong mga moghuhukum. 23 Sugaid bilaꞌ mongmula og libun, sumboy pobatukon og hukuman nong mikomula song mingmula. Dadi ok kotubuꞌ, gantian sop nok kotubuꞌ, 24 ong mokobuta, butahon sop, ong mokopangag, pangagon sop, ong mokobaliꞌ nok komot atawa botis, balion da sop ok komot atawa botisin, 25 ong mokopasuꞌ, pasuon sop, bu ong mokobanog, banogon sop.

26 Bilaꞌ suntukon nog gamu og guliponin laki atawa libun song mata, bangka kobutaꞌ, sumboy poluwasonin na og gulipon koyon gantiꞌ nong mata nin koyon. 27 Bu bilaꞌ suntukon nog gamu og babaꞌ nog guliponin laki atawa libun bangka kolupuꞌ ong ngisi nin, sumboy poluwasonin na og guliponin koyon gantiꞌ nong ngisi kituꞌ nong milupuꞌ.

28 Bilaꞌ ongon turu sapiꞌ nong mikosungag nok tow, laki taꞌ atawa libun bangka patoy, sumboy batuhon ok sapiꞌ sampoy matoy, bu ondiꞌ kanon og gungodin. Sugaid og gapuꞌ nok sapiꞌ daꞌdun og nin. 29 Tibuwa soupama milayam ok sapiꞌ koyon monungag nok tow bu pidinsamaan na og gapuꞌ in pasal dun, sugaid pitiyanganin da, na sumboy batuhon ok sapiꞌ koyon, bu patoyon da sop og gapuꞌ in. 30 Sugaid bilaꞌ pobayadon tibuwa og gapuꞌ sapiꞌ bagun diꞌ na yanin patoyon, sumboy mogbayad yanin nog halgaꞌ nok pongonihon diyanin. 31 Yonin da sop kini ok saraꞌ nog unuton bilaꞌ mokosungag ok sapiꞌ nog bataꞌ, laki taꞌ atawa libun.

32 Bilaꞌ mokosungag ok sapiꞌ nog gulipon, laki atawa libun, sumboy mogbayad og gapuꞌ in tolupuluꞌ tibuk sog gamu nog gulipon koyon, bu sumboy batuhon ok sapiꞌ sampoy matoy. 33 Soupama, ongon ok tow nog diꞌ in tutupan ok timbaꞌ in, atawa mogimung nok timbaꞌ, sokaliꞌ daꞌ in tutupoy, bu ongon milabuꞌ nok sapiꞌ atawa diyon, 34 na sumboy bayadan nog gapuꞌ timbaꞌ og gapuꞌ nok potubuon, bu diyanin na dun ok potubuon nong minatoy.

35 Bilaꞌ ok sapiꞌ nok tow mikopatoy nok sapiꞌ nog len tow, sumboy dagangon nilon ok sapiꞌ nok totubuꞌ bangka tongaoy og bayadin. Bahagion nilon da sop og gungod nok sapiꞌ minatoy. 36 Sugaid bilaꞌ kiosunan na asal nong milayam na monungag ok sapiꞌ koyon, sokaliꞌ ondaꞌ da ipatoy nog gapuꞌ in, na sumboy gantianin, bu diyanin na ok sapiꞌ kituꞌ nong minatoy.”