Ok Sopuluꞌ Suguan
20
Mikparman ok Tuhan nog lam nong mga suguan kini,
taluꞌ in,
2 “Akon ok Tuhan niyu,
ok Pogbayaꞌ-bayaꞌ nong migoyit diniyu mawaꞌ tidu song Misir,
og bonuwa nong mingulipon diniyu.
3 Diꞌ amu sumumba sog len nok tuhan muwal dinakon.
4 Diꞌ amu mogimung nok tuhan-tuhan sog bayuꞌ-bayuꞌ nog bisan olo na sok tas langit,
sog lupaꞌ,
atawa sog diyalom nok kotubigan.
5 Diꞌ amu sumudjud atawa moktolagad dinilon,
poꞌ akon ok Pogbayaꞌ-bayaꞌ,
ok Tuhan niyu,
bu sukangu tokodoy bilaꞌ sumumba amu sok tuhan-tuhan.
Podatongan ku nok kosiksaan ong mga tow nong mikodusa bu sinumaggaꞌ dinakon sampoy song mga ponupuꞌ nilon nog ikotolu mangoy sog ikopat pangkatan.
6 Sugaid og lam nong molasa dinakon bu mogunut song mga suguan ku,
potongowon ku dinilon og lasa-kololatu sampoy song mga ponupuꞌ nilon nong ngibuhan pangkat-momangkat.
7 Diꞌ niyu sabbuton nok sumolap ong ngalan ku,
poꞌ akon ok Pogbayaꞌ-bayaꞌ,
ok Tuhan niyu.
Siksaon ku sima-sima og gumamit nong ngalan ku nog daꞌ kosugat.
8 Pondom niyu og Gondow Pogogulali,
bu poselen niyu og gondow koyon nok sutsi para dinakon.
9 Nom ondow amu moginang bu mogusaha.
10 Sugaid og ikopitu ondow,
og gondow pogogulali,
yonin na og gondow sutsi pokpotas niyu dinakon,
ok Tuhan niyu.
Sog gondow koyon sumboy daꞌdun ong moginang diniyu,
amu,
gumbataanan niyu libun-laki,
mga gulipon niyu libun-laki,
mga potubuon niyu bug mga tow tidu sog len bonuwa nong migonong diyon sog bonuwa niyu.
Sumboy tokodoy mulali amu moginang.
11 Poꞌ sog diyalom nong nom ondow inimungu og langit bug lupaꞌ,
dagat bug lam nituꞌ.
Tibuwa sog ikopitu ondow,
daꞌ u poginanga.
Saan na piduwoyu og ikopitu ondow,
bu binarakatan ku moimung sutsi.
12 Pogaddatoy niyu og gommaꞌ bug ginaꞌ niyu bagun mopayat og gumul niyu sog bonuwa nog bogoyon ku diniyu.
13 Diꞌ amu momunuꞌ.
14 Diꞌ amu mogjina.
15 Diꞌ amu monakow.
16 Diꞌ amu sumaksiꞌ nog loput sok pokasi niyu.
17 Diꞌ amu mognapsu sog baloy nok pokasi niyu.
Diꞌ amu mognapsu sog libunin,
song mga sosuguonin libun-laki,
atawa sapiꞌ in,
sok kudaꞌ himarin,
atawa olo-olo na nituꞌ nog diyanin dun.”
Og Gondok nong mga Tow
18 Na dangan midongog nong mga tow og lugung bu ok tingog nok tombuli,
bu dangan mitongow nilon ok kilat bu og bontud nong migbol,
mingongkog ilon nog gondok,
bu migindog ilon sok kolayuan.
19 Taluꞌ nilon diyon ni Musa,
“Ika na ong moktaluꞌ dinami,
bu tumombaꞌ ami da sog lam nok tinaluꞌ nok Tuhan dinika.
Sugaid diꞌ nu na potaluon ok Tuhan dinami,
poꞌ insunoy matoy ami dun.”
20 Miktaluꞌ si Musa song mga tow,
“Diꞌ amu mondok,
poꞌ sinuloyan amu nok Tuhan.
Koleganin nog yanin hadja ok kondokan niyu,
bagun diꞌ amu mokodusa.”
21 Dadi dituꞌ da migindog ong mga tow sok kolayuan,
bu si Musa ong mikpolani sok Tuhan song modikpol nog bol koyon.
Ong mga Saraꞌ pasal sok Pokkurban
22 Na tinaluan si Musa nok Tuhan,
“Taluꞌ nu song mga tow Israel,
‘Kisaksian niyu nog inabit-abitu amu tidu sog langit.
23 Diꞌ amu mogimung nok tuhan-tuhan tidu sok silber atawa sog bulawan nok sumbahon niyu dunut dinakon.
24 Pogimung amu para dinakon nok pokkurbanan tidu sog lupaꞌ.
Diyon niyu sumbalioy ong mga bilibili,
kambing bug sapiꞌ niyu moimung kurban tutung bug kurban poksulut-sulut.
Sok sosuku nog bonuwa nog inimungu gantaꞌ pokpondom niyu dinakon,
diyon ku amu polanihoy bu barakatoy.
25 Bilaꞌ ong mga batu og imungon niyu nok pokkurbanan,
sumboy diꞌ niyu pindahon og bayuꞌ-bayuꞌ in.
Poꞌ bilaꞌ sinsilon niyu,
kanaꞌ na koyon mosutsi para dinakon.
26 Bu diꞌ niyu imungan nog gugdan ok pokkurbanan bagun diꞌ amu kosolipan dun bilaꞌ monek amu.’ ”