Mikpotongow ok Tuhan song mga Tow Israel sog Bontud Sinay
19
1-2 Pogdoksuꞌ minawaꞌ na ong mga tow Israel sog Repidim,
migdayun ilon mopanow sampoy midopot ilon sog ginlupaan mimala sog bonuwa Sinay.
Minatong ilon dituꞌ sog ikosolobuk sobang sog ikotolu bulan tidu sok koawaꞌ nilon song Misir.
Dituꞌ ilon migonong-onong sog gadapan nog Bontud Sinay.
3 Na tinumukad si Musa sok tas bontud dituꞌ sok Tuhan.
Tubus miktaluꞌ ok Tuhan dituꞌ ni Musa tidu sok tas bontud,
taluꞌ in,
“Yonin kini ok posampoyon nu song mga tow Israel,
ong mga ponupuꞌ ni Yaꞌkuba:
4 ‘Mitongow niyu na bug olo og ininangu song mga tow Misir,
bu inolo u amu pogoyit posunguꞌ dini dinakon mamaꞌ sopantun nok pokpis sok pokpak nog banug.b
5 Dadi bilaꞌ tombaan niyu da ong mga suguan ku,
bu bologbogan niyu ok pogjanjian ta niyu,
amu na ok piktowan ku tidu sok kotanan nog bangsa.
Dinakon ok koliwagan nog dunya,
6 sugaid amu ok polenon ku.
Imungon ku amu nong mosutsi nog bangsa para dinakon,
ok Tuhan Mahatinggi,
bu ok tumpukan nok koimaman nong mokpotas dinakon.’
Na yonin koyon ok posampoyon nu song mga tow Israel.”
7 Doksuꞌ nituꞌ dinumiksun na si Musa bangka nin potawagoy ong mga migmokogulang nong mga tow Israel.
Pogdatong nilon,
pisampoyin dinilon ok taluꞌ nok Tuhan nok sinuguꞌ diyanin mokposampoy.
8 Migbatuk ok tabal nong mga tow kotanan,
taluꞌ nilon,
“Inangon nami ok kotanan nok sinuguꞌ nok Tuhan.”
Pisampoy ni Musa sok Tuhan ok tabal nilon.
9 Miktaluꞌ ok Tuhan dituꞌ ni Musa,
“Posunguꞌ u moktaluꞌ dinika tidu song modikpol nog gabun bagun modongog nong mga tow ok poktaluꞌ u dinika,
bu bagun ilon mongandol dinika sampoy soumul-tahun.”
Pogdoksuꞌ ni Musa suksugoy sok Tuhan ok tabal nong mga tow,
10 tinaluan yanin nok Tuhan,
“Angoya pokposampoy song mga tow nok sutsihon nilon og ginawa-baran nilon sog gondow kini bug lomaꞌ,
bu sumboy nilon doktakan ong mga ponapot nilon.
11 Pogdatong sog ikotolu ondow sumboy togama na ilon,
poꞌ sog gondow niyon monogu sog dibabow nog Bontud Sinay bu motongow nok kotanan nok tow.
12-13 Botangan nu nok toktoban og lumibut nog bontud bagun diꞌ mokoliyu ong mga tow.
Podinsamaoy nu ilon nog diꞌ tumukad sog bontud atawa kumimal dun.
Sima-sima og dumidjak sog bontud kini,
tantu matoy yanin,
manusiyaꞌ taꞌ atawa binatang.
Sumboy yanin batuhon,
atawa panaon nog daꞌdun ong mongonggayd dun.
Diꞌ na yanin motubuꞌ.
Sumboy mokpolayuꞌ ong mga tow sog bontud toktob song modongog nilon ok tingog nok tombuli,
bangka pa pokopolani sog bontud kini.”
14 Pogdoksuꞌ nok taluꞌ nok Tuhan,
dinumiksun si Musa tidu sok tas bontud,
bangka nin suguoy ong mga tow nok sutsihon nilon og ginawa-baran nilon.
Dadi minoktak da sop ilon nok ponapot nilon.
15 Taluꞌ pa ni Musa song mga tow,
“Sumboy amu moktogama sog ikotolu ondow,
bu diꞌ pa sokaliꞌ mokpolani og laki sog libunin.”
16 Poksisolom nog ikotolu ondow sunoy pa miglugung na bug mikkilat.
Ongon ong modikpol nog gabun sok tas nog bontud,
bu midongog og goyup nok tombuli nog landuꞌ kopagas.
Dadi mingongkog ok kotanan nong mga tow.
17 Na inoyit na ilon ni Musa lumuwas sok pigonongan nilon bagun madap sok Tuhan.
Diyon minindog ong mga tow sok silung nog bontud.
18 Miputus na nog bol og bontud Sinay poꞌ minonog na diyon ok Tuhan mikpobayuꞌ-bayuꞌ nog gapuy.
Dinumikpol og bol sok tas mamaꞌ nong mosolag nok tutung,
bu mingongkog tokodoy og liwag nog bontud.
19 Miksipagas tokodoy ok tingog nok tombuli.
Na tinumaluꞌ si Musa,
bu tinumabal ok Tuhan diyanin biyan song mopagas nok tingog mamaꞌ nog lugung.
20 Minonog ok Tuhan sog dibabow nog bontud Sinay bangka nin tawagoy si Musa mangoy dituꞌ diyanin.
Dadi tinumukad si Musa sok tas bontud.
21 Bu tinaluan yanin nok Tuhan,
“Diksun ka puliꞌ bangka nu pohallioy ong mga tow bagun diꞌ ilon tokodoy lumiyu sok toktoban tumontong dinakon.
Poꞌ bilaꞌ inangon nilon kini,
modakol dinilon ong matoy.
22 Bisan ong mga gimam,
sumboy moksutsi da ilon,
bilaꞌ mokpolani ilon dinakon,
bagun diꞌ u ilon podatongan nok kosiksaan.”
23 Miktaluꞌ si Musa sok Tuhan,
“Diꞌ mokotukad ong mga tow sog bontud Sinay,
poꞌ ika tokodoy ong mikpodinsamaꞌ tumaluꞌ dinami nog inimung nu nok sutsi og bontud kini bu diꞌ mogdadi lumiyu ong mga tow sok toktoban.”