Pogawaꞌ 18

Binontow ni Yetro si Nabi Musa

Na midongog ni Yetro nok tinabangan nok Tuhan si Musa bug piktowanin nok tow mawaꞌ tidu song . Si Yetro kini, ok ponugangan ni Musa bu gimam sog bonuwa Midiyan 2-3 Sok tagnaꞌ pa kituꞌ piuliꞌ ni Musa si Sipura, og libunin bu og duwaꞌ kotow nog bataꞌ in nog laki dituꞌ ni Yetro, ok ponuganganin. Ong ngalan nog gulang bataꞌ si Gersom, poꞌ dangan binataꞌ, tinaluꞌ ni Musa, “Midoksaꞌ u sog len bonuwa.” 4 Og ikoduwaꞌ, ngalanin si Elieser, poꞌ tinaluꞌ ni Musa, “Ok Tuhan nok pingapuꞌ u, ok tinumabang dinakon. Tinabanganin akon tidu sok , ong meleg munuꞌ dinakon.”

5 Inoyit ni Yetro og libun ni Musa bug duwaꞌ kotow bataꞌ nilon, bu minatong ilon dituꞌ sog sok pigonong-onongan niloꞌ Musa, molani sog bontud nok Tuhan. 6 Asal na mingintugun si Yetro dituꞌ ni Musa nong matong yanin dunut ni Sipura bug duwaꞌ kotow gumbataꞌ nilon. 7 Dadi linumpak ni Musa ok ponuganganin, bangka yanin sudjud, og gindanan nok pogaddatin, bu inalokanin si Yetro. Tubus miksinak-sinakoy ilon bug moolo-olo na ilon, bangka ilon solod sog ni Musa. 8 Na miksuksug na si Musa sok ponuganganin pasal sok kotanan nok pidatong nok Tuhan sok bug mga tow Misir pasal song mga tow Israel. Sinuksuganin da sop si Yetro pasal song mga kosigpitan nok kibiyanan nong mga tow Israel sok panow nilon, bu pasal bug poynoy ok pokpuwas nok Tuhan dinilon. 9 Linoliyag si Yetro dangan midongogin ong mga kobaisan nog ininang nok Tuhan song mga tow Israel, nok pinuwasin ilon sok kongkoman nong mga tow Misir. 10 Taluꞌ ni Yetro, “Pudjihon ok Tuhan, ong mikpuwas diniyu tidu sok kongkoman nok Pirꞌawn bu song mga tow Misir nong mingulipon diniyu. 11 Na ningkomun kiosunan ku na nong mopagas pa ok Tuhan tidu sok kotanan nok tuhan-tuhan nong mga tow, poꞌ pinuwasin ong mga tow Israel tidu song mga tow Misir sok pogdaugdaug dinilon.”

12 Minalap si Yetro nok potubuon para kurban tutungon bu mga len pa bangka nin kurbanoy posunguꞌ sok Tuhan. Si bug kotanan nong mga migmokogulang nong mga tow Israel miksalu-salu da sop kuman ni Yetro, gantaꞌ pokpotas nilon sok Tuhan.

Ok Pokpiliꞌ nong mga Monghuhukum

13 Poggondow solobuk, miningkud si Musa monghukum sok sima-sima og ongon ok parkalaꞌ in. Dadi miglumpuk ong mga tow diyon tidu sok sisolom mangoy sog gobi. 14 Dangan mitongow ni Yetro nong modakol og ginang ni Musa, tinaluanin, “Olo og ininang nu koyon song mga tow? Manu sala nu da ma ong miginang niyon? Miglumpuk ok kotanan nok tow mogbagad dinika tidu sok sisolom posunguꞌ sog gobi.”

15 Na tinumabal si Musa sok ponuganganin, “Ininangu kini poꞌ mokpolani ong mga tow dinakon moksak nok pasal sok kolegan nok Tuhan dinilon. 16 Bilaꞌ ongon ok poksuwal nilon, mogdangat ilon dinakon. Doksuꞌ hukumon ku ilon, bangka u potampaloy dinilon ok suguan bug saraꞌ nok Tuhan.”

17 Taluꞌ nok ponuganganin, “Ondaꞌ kosugat og ginang nu koyon. 18 Molossahi a tokodoy dun sampoy ong mga tow. Landuꞌ kobogat dinika og ginang koyon, bu ondiꞌ nu koyon mogaga nok sala nu da. 19 Ponginongoga dinakon! Pituwahan ta ika, bu mura-murahan tabangan ka nok Tuhan. Ika ong madap sok Tuhan para song mga tow, bu ika ong mogoyit nong mga parkalaꞌ nilon dituꞌ diyanin. 20 Ika da sop ong moktonduꞌ dinilon nong mga saraꞌ bug suguan nok Tuhan, bu sumboy da sop tonduan nu ilon nog dalan mologdong bug mga ginang nok sumboy inangon nilon. 21 Sugaid momiliꞌ a pahatul nong mokopandoy nok kolakihan, mga migogondok sok Tuhan, mga kopongandolan bug mga diꞌ kobayadan. Imung nu ilon nok kounutan song mga tow nong nginibuhan, ginatusan, lilima puluan, bu sosopuluan. 22 Ilon na og imung nu nong monghukum song mga tow gondow-gondow. Ong mokosolag nong mga parkalaꞌ, oyiton nilon dinika, sugaid bug mga mokobikaꞌ da, ilon na og humukum dun. Song mamaꞌ niyon nok pobiyan, kobogan-boganan ka, poꞌ kotabangan ka nilon. 23 Bilaꞌ koyon og unuton nu, bu yonin ok suguan dinika nok Tuhan, diꞌ a tantu koboloyan, bu mokuliꞌ ok kotanan nok tow koyon sog nilon nong mosannang.”

24 Na ininongogan bu tinombaan ni Musa ok kotanan nok pinintuluꞌ nok ponuganganin. 25 Mimiliꞌ na yanin song mga tow nong mga mokobologbog sog ginang koyon bangka nin imungoy nok kounutan song nginibuhan, og duma sog ginatusan, lilima puluan bug sosopuluan. 26 Ilon na ong monghukum song mga tow bisan olo waktuhoy dun. Ong mga mokolomu nok parkalaꞌ, ilon da og humukum dun, sugaid ong mokologon, oyiton nilon dituꞌ ni Musa.

27 Doksuꞌ nituꞌ mimuhun na si Yetro diyon ni Musa bangka yanin uliꞌ sog bonuwa nin.