Ok Tubig tidu sog Batu
17
Dadi tidu sog ginlupaan mimala nog bonuwa Sin,
migdayun ong mga tow Israel nok panow nilon.
Miglatun-latun ilon song mga bonuwa mounut sok suguan nok Tuhan dinilon.
Doksuꞌ mikodopot ilon sog Repidim,
bu dituꞌ ilon migonong-onong.
Tibuwa daꞌdun moinum nilon nok tubig dituꞌ.
2 Dadi sinusunan nilon si Musa,
taluꞌ nilon,
“Bogoyoy nu ami nok tubig nong moinum nami.”
Ok tabal ni Musa,
“Manu susunan niyu ma akon?
Manu sinuloyan niyu ma ok kobais nok Tuhan?”
3 Sugaid kimalahan tokodoy ok tiloꞌ nilon,
dadi pikkumong-umongan nilon si Musa,
taluꞌ nilon,
“Inoyit nu taꞌ ami mawaꞌ tidu song Misir dunut nong mga gumbataꞌ bug potubuon nami bagun matoy nok kuwow?”
4 Dadi mingoni-ngoni si Musa sok Tuhan,
taluꞌ in,
“U Tuhan ku,
olo na og inangon ku song mga tow kini?
Agon na nilon akon batuhon.”
5 Na miktaluꞌ ok Tuhan dituꞌ ni Musa,
“Oyit nu ok tungkod nu nok pigbombal nu sok Subaꞌ Nil,
bu podunut nu og duma migmokogulang nong mga tow Israel,
bangka a poguna dinilon.
6 Mindogu sog gadapan nu dituꞌ sog batu sog Horeb.
Doksuꞌ bombal nu nok tungkod og batu,
dadi lumuwas ok tubig bagun mokinum ong mga tow.”
Na ininang ni Musa,
bu kisaksian koyon nong mga migmokogulang nong mga tow Israel.
7 Iningalanan ni Musa og bonuwa koyon Meriba bug Massa,a
pasal sok pokkumong-umong nong mga tow Israel,
bu poksuloy nilon sok Tuhan dangan tinaluꞌ nilon nog,
“Migunut taꞌ dinita ok Tuhan atawa ondaꞌ?”
Mimunuꞌ ong mga Tow Amalek sok Tow Israel
8 Dangan dituꞌ ong mga tow Israel sog bonuwa Repidim,
binunuꞌ ilon nog bangsa Amalek.
9 Na tinaluan ni Musa si Yussa,
“Pomiliꞌ a para dinita nong mga laki mangoy mongatu mogbunuꞌ song mga tow Amalek.
Lomaꞌ tumukadu sok tas bontud,
bu dituꞌ u indog dunut tungkod nok Tuhan.”
10 Dadi inunut ni Yussa ok sinuguꞌ ni Musa diyanin,
bu mingatu ilon mogbunuꞌ song mga tow Amalek.
Si Musa,
si Harun bu si Hur tinumukad ilon sok tas nog bontud.
11 Sog bon nog ininat ni Musa ok komotin,
mimondag ong mga tow Israel,
sugaid bilaꞌ pobabaonin ok komot in,
ong mga tow Amalek na sop ong momondag.
12 Dangan kiboloyan na ok komot ni Musa,
minalap si Harun bu si Hur nog batu,
bangka nilon poingkudoy si Musa.
Tubus minindog ilon song mansing kilid ni Musa,
bu ininat nilon sok tas og duwaꞌ bolaꞌ nok komot ni Musa sampoy nok poksindop nog gondow.
13 Dadi dinag niloꞌ Yussa og bangsa Amalek.
14 Na miktaluꞌ ok Tuhan diyon ni Musa,
“Sulat nu ong mga ginang kini sok kitab gantaꞌ pomondoman para diniyu,
bu basta nu ni Yussa,
poꞌ papason ku tokodoy ong mga tow Amalek sog dibabow dunya.”