Pogawaꞌ 16

Ok Kan nog Binogoy nok Tuhan

Na tidu sog Elim, dimayun na ong mga tow , bu midopot nilon og nog iningalanan nok Sin sog lot nog Elim bug Sinay. Minatong ilon diyon sog ikosopuluꞌ bu lima sobang sog ikoduwaꞌ bulan tidu sok kawaꞌ nilon song . 2 Na ong mga tow Israel mikumong-umong diyon ni bu ni sog ginlupaan mimala, 3 taluꞌ nilon, “Mobais bosiya pitiyangan ami na nok Tuhan matoy dituꞌ song Misir. Dituꞌ mokopoduhul ami kuman nok sinumbaliꞌ bu olo-olo kolegan nami kanon. Sugaid inoyit niyu ami dini sog ginlupaan mimala kini bagun ok kotanan nami momatoy nog gutom dini.”

4 Tubus miktaluꞌ ok Tuhan diyon ni Musa, “Podupian ku amu nok kan tidu sog langit. Dadi lumuwas ong mga tow gondow-gondow bangka pongalap nok kan nok kogunahan nilon sog gondow koyon. Tidu diyon kosuloyan ku ilon. Tontongon ku bug unuton taꞌ nilon ok suguan ku atawa ondiꞌ. 5 Tibuwa sog ikonom ondow, sumboy duwaꞌ kalihon nilon og dakol nok kan koyon alapon nilon, bangka nilon usibaoy.”

6 Dadi tinaluan ni Musa bu ni Harun ong mga tow Israel kotanan, “Poksindop nog gondow, kosunan niyu na ok Tuhan ong migoyit diniyu lumuwas tidu song Misir. 7 Bu poglomaꞌ sisolom motongow niyu na ok nok kotas nok Tuhan, poꞌ midongogin ok pokumong-umong niyu diyanin. Poꞌ sima ami buwan nok pikkumong-umongan niyu?” 8 Taluꞌ ni Musa, “Poksindop nog gondow, bogoyan amu nok Tuhan nok sosumbalion nong mokan niyu, bu poksisolom ongon ok kan taman sok kolegan niyu poꞌ midongog nok Tuhan ok pokumong-umong niyu diyanin. Poꞌ sima ami buwan? Song motudin, ok pokumong-umong niyu kanaꞌ dinami, sugaid sok Tuhan.”

9 Taluꞌ ni Musa diyon ni Harun, “Taluan nu ong mga tow Israel nong mokpolani ilon madap sok Tuhan, poꞌ midongogin ong mga pokumong-umong nilon.” 10 Na soliyan ni Harun moktaluꞌ song mga tow Israel, tinumontong ilon sog ginlupaan mimala, bu sunoy pa mitongow nilon ok sahaya nok kotas nok Tuhan linumuwas tidu sog gabun. 11 Miktaluꞌ ok Tuhan diyon ni Musa, taluꞌ in, 12 “Midongogu ong mga pokumong-umong nong mga tow Israel. Taluan nu ilon, ‘Poksindop nog gondow mokokan amu nok sosumbalion, bu poksisolom, mokokan amu nok kan gantiꞌ nok pan taman sok kolegan niyu. Dadi kosunan niyu nog akon ok Pogbayaꞌ-bayaꞌ ok Tuhan niyu.’ ”

13 Dangan sinumindop na og gondow, milokop ok pigbonuwahan nilon nong mga manuk-manuk pokpitow, dadi mikokan ilon dun. Poksisolom sop, mibasaꞌ og lumibut nok pigonongan nilon nong namug. 14 Dangan mibolong ong namug, mitongow nilon sog dibabow nog lupaꞌ ong mokonipis mamaꞌ nok sapal sog liwag nog lupaꞌ koyon. 15 Na dangan mitongow kini nong mga tow , miksak-sinakoy ilon, taluꞌ nilon, “Olo niyon?” Poꞌ diꞌ nilon kosunan bug olo kituꞌ.

Miktaluꞌ si Musa, “Yonin koyon ok kan gantiꞌ nok pan nog binogoy nok Tuhan diniyu. 16 Mamaꞌ nini ok suguan diniyu nok Tuhan: Kokoniya diniyu mongalap na nok kan koyon ayin-ayin na ong motipot niyu. Malap amu sotopong omer song monolokotow sog diyalom niyu.”

17 Inunut nong mga tow Israel ok suguan dinilon. Og duma modakol og inalap nilon bu og duma sop mikaan da. 18 Dangan tinopong nilon ong mga kan nong mialap nilon, ong mga tow nong mingalap nong modakol, daꞌ da poglabi, bu ong mingalap nong mikaan, daꞌ da sop poglokulang. Topot-topot sok kogunahan nilon og inalap nong monolokotow dinilon. 19 Dadi tinaluan ilon ni Musa, “Diꞌ amu moksamaꞌ nok kan koyon sok sisolom.”

20 Sugaid og duma, daꞌ ilon tombaꞌ ni Musa. Miksamaꞌ da ilon nok kan koyon sok sisolom, sugaid ong misamaꞌ koyon mionglos, inulod bu mioduꞌ. Dadi milingit si Musa dinilon.

21 Na kada sisolom mongalap ong mga tow Israel nong mokan nilon topot song motipot nilon sog gondow koyon. Tibuwa bilaꞌ minit na og gondow, motunag na ong misamaꞌ sog lupaꞌ. 22 Sog ikonom ondow mingalap ilon duwaꞌ kalihon og dakol nong mokan nilon sondow. Dadi ok kotanan nok kounutan nong mga tow Israel minangoy dituꞌ ni Musa, miksuksug nok pasal nini. 23 Miktaluꞌ si Musa dinilon, “Mamaꞌ nini ok suguan nok Tuhan: Lomaꞌ og gondow nok pogogulali, og gondow nok pokpotas sok Tuhan. Saan na lagaꞌ niyu na ok kolegan niyu lagaon, bu polutuꞌ niyu na ok kolegan niyu polutuon. Ong mosamaꞌ, taguꞌ niyu para lomaꞌ.”

24 Dadi inunut nilon ok taluꞌ in. Tinaguꞌ nilon ong mga samaꞌ nok kan sampoy sok sisolom, sugaid ondaꞌ na ulodoy bu daꞌ konglos. 25 Ok taluꞌ ni Musa dinilon, “Kan niyu koyon sog gondow kini, poꞌ gondow kini gondow nok pogogulali bug pokpotas sok Tuhan. Sog gondow kini daꞌdun ong motongow niyu nong mokan sog luwasan. 26 Mongalap amu gondow-gondow nong mokan niyu song nom ondow. Tibuwa sog ikopitu nog gondow, daꞌdun ok kan nong mobalak niyu sog luwasan, poꞌ yonin koyon og gondow nok pogogulali.”

27 Na bisan mamaꞌ nituꞌ og duma nok tow linumuwas da sog ikopitu ondow monontong nong mokan, sugaid daꞌdun da ong mibalak nilon. 28 Doksuꞌ tinaluan si Musa nok Tuhan, “Ayin taman ok ponaggaꞌ nog bangsa Israel sok suguan bug saraꞌ u? 29 Pondom niyu nog akon ok Tuhan, ong migbogoy diniyu nog . Saan na sog ikonom ondow bogoyan ku amu nong mokan niyu para sog duwaꞌ ondow. Sumboy daꞌdun lumuwas mongalap nok kan sog ikopitu ondow.” 30 Dadi mulali ong mga tow sog ikopitu ondow.

31 Na iningalanan nong mga tow Israel ok kan koyon nong . Ong manna kini, mamaꞌ nog boyaan nong mobeteꞌ bu moputiꞌ, ong nanamin mamaꞌ nog bangbang monipis nok taga tonob. 32 Taluꞌ ni Musa, “Yonin kini ok suguan nok Tuhan, ‘Poktaguꞌ amu nok soomer nong manna para song mga ponupuꞌ niyu bagun motongow nilon ok piokan ku diniyu sog ginlupaan mimala dangan inoyitu amu mawaꞌ tidu sog bonuwa Misir.’ ”

33 Tinaluan ni Musa si Harun, “Alapa solobuk banggaꞌ, bangka nu ungodoy soomer nong manna. Doksuꞌ botang nu sog gadapan nok Tuhan bagun mopondom nong mga ponupuꞌ ta niyu pangkat-momangkat.” 34 Inunut ni Harun ok sinuguꞌ nok Tuhan dituꞌ ni Musa, binotangin ong sog gadapan nok sopuluꞌ suguan sog diyalom nok Kaban Pigjanjian bagun motaguꞌ. 35 Sog bon nok pat puluꞌ tahun, ong manna ok pongonganon nong mga tow Israel, sampoy mikosaut ilon sok . 36 Og ginamit nilon tagnaꞌ sok poktopongan nong manna, og “omer”. Bu ok sopuluꞌ “omer” batuk sok solobuk “epa”, og ginisan sop nok poktopongan nilon.