Ok Poksarang-sukul ni Nabi Musa sok Tuhan
15
Doksuꞌ nituꞌ mikkolangan si Musa sampoy ong mga tow Israel nok pokpudji sok Tuhan,
kini ok kinolangan nilon,
“Kolanganan ku ok Tuhan,
poꞌ mokosobuꞌ-sobuꞌ ok kopomondagin,
linonodin sog dagat ok kudaꞌ bug mingudaꞌ.
2 Ok Tuhan ok kopagasu bug tamingu.
Yanin ong Mogogawon dinakon.
Yanin ok Tuhan ku
nok pudjihon ku,
ok Tuhan nok pingapuꞌ u
nok potason ku.
3 Ok Tuhan Mokowasa,
mokosobuꞌ-sobuꞌ ok pomunuꞌ in,
diꞌ in popomondagon ong mga banta nin,
ok Tuhan ok solama-lama ongon ong ngalanin.
4 Ong mga korumata bug sundalu nok Pirꞌawn,
linonod nok Tuhan sog dagat,
milomos ong mga mobantug nok kounutan
sog Dagat Pula kotanan.
5 Kidungmaan ilon
nong mosolag nong nabok,
milonod ilon sok kodaloman,
mamaꞌ nog batu.
6 U Tuhan,
mokosobuꞌ-sobuꞌ ok kowasa nu,
ok komot nu nog lintu,
lumupot-lupot song mga banta nu.
7 Tidu song mokosobuꞌ-sobuꞌ nok kowasa nu,
dinag nu ong mga mingatu dinika.
Mamaꞌ nog gapuy miksuliyab og lingit nu,
bu mamaꞌ ilon nog lugami tinutung nu.
8 Og ginawa nu nong mopagas,
ok tubig miinatin.
Minindog ong nabok mamaꞌ nog donding,
ok tubig sog diyalom dagat,
pitogasin.
9 Og banta nu migabbu,
‘Gonaton ta ilon
bagun mosaut ta,
Bahagion ta ong mga gartaꞌ nilon.
Alapon ta
ok kotanan nok konapsuhan ta.
Bigdason ta ok kalis ta,
ladakon ta ilon biyan sok komot ta.’
10 Tibuwa minoyupa hadja,
U Tuhan,
bangka ilon kodungmaoy nog dagat.
Milonod ilon mamaꞌ nok tinggaꞌ,
kidigbunan ilon nong mopagas nong nabok.
11 U Tuhan,
daꞌdun ok kobatuk nu song mga tuhan-tuhan.
Daꞌdun mamaꞌ dinika nong mopatut sanglitan,
Mahasutsi,
Mokowasa bu
mokoinang nong mga mokosobuꞌ-sobuꞌ.
12 Dangan ininat nu ok komot nu sok tas,
inuglon ilon nog lupaꞌ.
Ondaꞌ ilon pokoginawa,
milomos na dodaꞌ.
13 Pasal sog diꞌ mogboluba ok kolasa-kololat nu,
inoyit nu ami,
ong mga tow nog linokat nu.
Potontulan nu ami biyan sok kowasa nu
song mosutsi nok pogonongan nu.
14 Mongongkog ong mga len bangsa
nong mokodongog pasal nini.
Solodon tokodoy nog gondok ong mga tow Pilistin.
15 Kondokan ong mga datuꞌ sog bonuwa Edom.
Mongongkog nog gondok ong mga kounutan sog bonuwa Moab.
Kobolongan nog limukud ok kotanan nok tow sog bonuwa Kanaan.
16 Koiglanan bu kondokan ong mga len nog bangsa
pasal sog landuꞌ nok kowasa nu,
U Tuhan.
Diꞌ ilon mokolilow mamaꞌ nog batu
toktob mokobiyan ami,
ok piktowan nu nok pinuwas nu.
17 Oyiton nu ami bu ibadat sok pomulan,
pomulahon nu sog bontud nu,
og bonuwa nog ininang nu nok pogonongan nu,
U Tuhan,
bu inimung nu nong mosutsi nok poksosombahayangan.
18 U Tuhan,
ok solama-lama ongon,
ok pogbayaꞌ nu,
daꞌdun ok kodoksuanin.”
19 Mikkolangan og bangsa Israel nong mamaꞌ niyon,
poꞌ mikobiyan ilon sok titongaꞌ nog dagat nong mimala.
Sugaid dangan ginonat ilon nong mga sundalu nok Pirꞌawn dunut mga korumata bug mga kudaꞌ nilon,
pitakmuꞌ puliꞌ nok Tuhan dinilon ok tubig sog dagat.
Ok Poksarang-sukul ni Miriam
20 Na si Miriam og gilug ni Musa bu ni Harun nog libun,
nabi yanin.
Minalap yanin nong mamaꞌ nok kiling-kilinga,
bu ok kotanan nong mga kolibunan minalap da sop nong mga kiling-kiling nilon bangka pogunut diyanin mongigal.
21 Kinolanganan ilon ni Miriam,
“Kolanganan ta ok Tuhan,
poꞌ mokosobuꞌ-sobuꞌ ok kopomondagin,
ok kudaꞌ bug mingudaꞌ
sog dagat linonodin.”
Ok Tubig Mopet
22 Na inoyit ni Musa og bangsa Israel mawaꞌ tidu sog Dagat Pula,
bu sinumolod ilon sog ginlupaan mimala nok pogingalanan nok Sur.
Sog bon nok tolu ondow nok kopanow nilon sog ginlupaan koyon,
daꞌdun ong mibalak nilon nok tubig.
23 Dangan mikodatong ilon sog bonuwa Marah,
mikobalak ilon nok tubig,
sugaid diꞌ ilon mokinum dun poꞌ mopet.
Saan na iningalanan og bonuwa koyon nong Marah.b
24 Mikumong-umong ong mga tow Israel dituꞌ ni Musa,
taluꞌ nilon,
“Olo og inumon nami?”
25 Na mingoni-ngoni si Musa sok Tuhan,
bu pitongow nok Tuhan diyanin ok soputuk kayu.
Dadi tinikpuꞌ ni Musa sok tubig,
doksuꞌ miawaꞌ ok kopet nok tubig koyon.
Diyon sok tubig Marah sinuloyan nok Tuhan ok kotombaꞌ nilon,
bu binogoyanin ilon nok saraꞌ kini,
26 taluꞌ in,
“Bilaꞌ monginongog amu dinakon,
ok Tuhan niyu,
bu inangon niyu ong mologdong sok ponontongu,
bu bilaꞌ tombaan niyu ok kolegan ku,
bu unuton niyu ok kotanan nok suguan ku,
na diꞌ u amu podatongan nok saki mamaꞌ nok pidatongu song mga tow Misir,
poꞌ akon ok Tuhan,
ok polomulung niyu.”
27 Puwas nituꞌ mikangoy ilon sog Elim,
og bonuwa nok taga sopuluꞌ bu duwaꞌ buk tubud bu pitu puluꞌ pun nog hulma.
Diyon ilon migonong-onong soliyan molani sok tubig.