Ok Poktolipag sog Dagat Pula
14
Doksuꞌ nituꞌ tinaluan na sop nok Tuhan si Musa,
2 “Taluan nu ong mga tow Israel nog lumikoꞌ ilon,
bu polihanon nu ilon sog gadapan nog bonuwa nok Pi Hahirot sok pigolotan nong Migdul bug Dagat Pula,
molani sog Baal Sepon.
3 Dadi mogniyat ok Pirꞌawn nong mibolong amu,
bu diꞌ niyu na kosunan og luwasan niyu sog ginlupaan mimala.
4 Potogason ku ok pongatoyan nok Pirꞌawn,
bu gonatonin amu.
Sugaid dagon da ok Pirꞌawn bug mga sundalu nin,
bu mokobogoy koyon dinakon nok kotas.
Tidu diyon kosunan nong mga tow Misir nog akon tokodoy ok Tuhan Pogbayaꞌ-bayaꞌ.”
Inunut nong mga tow Israel ok suguan nok Tuhan.
5 Dangan piosun sok Pirꞌawn nong milaguy na ong mga tow Israel,
mipinda ok pikilan nok Pirꞌawn bug mga ponindogin.
Taluꞌ nilon,
“Olo og ininang ta kituꞌ?
Manu kinumboy ta ma mawaꞌ ong mga tow Israel.
Kibolongan ita niyu na nog gulipon moginang dinita.”
6 Na pidinsamaꞌ nok Pirꞌawn ok kudaꞌ bug korumata nin nog bobunuan,
bu inoyitin ong mga sundalu nin.
7 Pidunutin da sop ong mga kounutan nok sundalu nin bu nom gatus buk kinobaisan nok korumata bobunuan bug lam nog duma korumata song Misir.
Kada solobuk korumata,
ongon ok kounutanin.
8 Pitogas nok Tuhan ok pongatoyan nok Pirꞌawn,
ok sultan song Misir,
dadi ginonatin ong mga tow Israel nong miktowakkal mawaꞌ song Misir.
9 Ginonat ilon nok kosundaluhan nong Misir sampoy mga kounutan nong mingudaꞌ bu sinumakoy song mga korumata nilon.
Misaut nilon ong mga tow Israel sog bonuwa nok piglihanan nilon sok kilid dagat molani sok Pi Hahirot bug Baal Sepon.
10 Dangan mitongow nong mga tow Israel nok posunguꞌ na diyon dinilon ok Pirꞌawn bug mga sundalu nin,
na miondok ilon tokodoy,
bu mikilolat ilon sok Tuhan.
11 Taluꞌ nilon ni Musa,
“Inoyit nu ta ami dini sog ginlupaan mimala bagun matoy?
Daꞌdun taꞌ buwan ok pongubulan song Misir?
Na tontong nu bug olo og ininang nu sok pokpoluwas nu dinami song Misir.
12 Song masa nog dituꞌ ita pa song Misir,
miktaluꞌ ami le bosiya dinika nok potiyangan nu na ami uliponon nong mga tow Misir.
Golom ami pa mokpoulipon dinilon tidu song matoy sog ginlupaan mimala.”
13 Na ok tabal ni Musa dinilon,
“Diꞌ amu mondok,
popagon niyu ok pongatoyan niyu.
Motongow niyu da sog gondow kini bug poynoy ok poktabang nok Tuhan diniyu.
Ong mga tow Misir nong mitongow niyu sog gondow kini,
diꞌ niyu na motongow mokpuliꞌ sampoy soumul-tahun.
14 Ok Tuhan da ong munuꞌ dinilon para diniyu,
dadi pokpotonaꞌ amu tibuwa.”
15 Na tinaluan nok Tuhan si Musa,
“Manu mokilolata pa ma dinakon?
Potolipag nu na ong mga tow Israel.
16 Inat nu na ok tungkod nu posunguꞌ sog dagat.
Na mobahagiꞌ og dagat bagun mokobiyan ong mga tow Israel song mimala nog lupaꞌ posunguꞌ sog dipag.
17 Potogason ku ok pongatoyan nong mga tow Misir bu gonaton nilon amu.
Tibuwa ok sumugat niloꞌ Pirꞌawn bug mga sundalu nin nong mingudaꞌ bu sinumakoy sok korumata,
mokobogoy nok kotas dinakon.
18 Kosunan nong mga tow Misir nog akon ok Tuhan,
ong Mokowasa sog waktu nog dagon ku ok Pirꞌawn bug mga sundalu nin.”
19 Dadi ong malaikat nok Tuhan nong miguna song mga tow Israel,
mikpinda sog binayaan nilon.
Bu og gabun nong minindog mamaꞌ nog gugdok sog gunan nilon,
mikpinda da sop sog binayaan nilon.
20 Minindog og gabun koyon dituꞌ sog lot nog bangsa Israel bug mga sundalu nong Misir.
Sog gobi niyon pidolom nog gabun koyon song mga tow Misir,
sugaid pisahayanin song mga tow Israel.
Dadi sog gobi niyon ondaꞌ pokopolani ong mga sundalu Misir song mga tow Israel.
21 Sog gobi da sop niyon pisunguꞌ ni Musa ok tungkodin sog dagat.
Poginatin dun,
pioyit nok Tuhan ong mopagas nog galuꞌ tidu sok silangan nong minoyup sumogobi.
Dadi mibolaꞌ tongaꞌ og dagat,
sampoy nong mimala og lupaꞌ sok pigolotanin.
22 Mipanow ong mga tow Israel sog dagat nong mimala,
bu og dagat miimung donding sog lintu-bibang nog biniyanan nilon.
23 Na ong mga sundalu nok Pirꞌawn bug mga mingudaꞌ bu sinumakoy nong mga korumata bobunuan koyon,
ginonat nilon ong mga tow Israel sog ginongaan nog dagat.
24 Dangan doliꞌ-ondow na,
timontong ok Tuhan nog diyon sog gugdok nog gapuy sok kosundaluhan nong Misir,
bu liniyuhalaꞌ in ilon.
25 Pilobut nok Tuhan ong mga ligid nong mga korumata nilon bagun kologonan nilon pogobokon.
Taluꞌ nong mga tow Misir,
“Molaguy ita niyu na song mga tow Israel,
poꞌ tinabangan ilon nok Tuhan munuꞌ dinita.”
26 Doksuꞌ miktaluꞌ ok Tuhan diyon ni Musa,
“Posunguꞌ nu ok tungkod nu sog dagat bagun kodungmaan nok tubig ong mga tow Misir,
mga mingudaꞌ bug mga mikkorumata.”
27 Dadi pisunguꞌ ni Musa ok tungkodin sog dagat bu dangan sisolom na,
mikpuliꞌ na og dagat.
Migmuhut-muhut bosiya molaguy ong mga sundalu nong Misir,
sugaid linumpak ilon nong mopagas nong nabok bangka ilon inanud nok Tuhan sog dagat.
28 Miktakmuꞌ na mokpuliꞌ ok tubig sog dagat,
bu kidungmaan ong mga korumata bobunuan bug mga mingudaꞌ bug kotanan nok kosundaluhan nok tow Misir nong minggonat song mga tow Israel.
Milomos ilon kotanan,
daꞌdun misamaꞌ bisan solokotow.
29 Sugaid ong mga tow Israel mikotolipag na song mimala nog lupaꞌ sok titongaꞌ dagat soliyan nong midonding ok tubig sog lintu-bibang nilon.
30 Dadi sog gondow nituꞌ,
pinuwas nok Tuhan ong mga tow Israel tidu sok kongkoman nong mga tow Misir.
Bu mitongow nilon ong mga bangkoy nok tow Misir sok kilid dagat.
31 Dangan mitongow nong mga tow Israel og ininang nok Tuhan song mga tow Misir tidu sok pagas nok kowasa nin,
na kiongonan ilon nog gondok sok Tuhan.
Tinumombaꞌ ilon diyanin bu sok sosuguonin nok si Musa.