Ong mga Suguan pasal sog Halilaya Pogliyus
12
Na binogoy nok Tuhan ong mga suguan kini diyon niloꞌ Musa bu Harun nog diyon ilon pa song Misir,
taluꞌ in,
2 “Og bulan kini ok tolipunan nog bulan nok tahun para diniyu.
3 Posunan niyu ong mga tow Israel nog bilaꞌ mokosaut na sog ikosopuluꞌ sobang nog bulan kini,
sumboy sosuku laki sog diyalom baloy moksimpan solobuk bilibili atawa kambing para sog libun-bataꞌ in.
4 Bilaꞌ mikaan ong mga tow sok solobuk baloy,
bu diꞌ nilon motipot ok solobuk bilibili atawa kambing,
na bahagian nilon ok kilani baloy nilon mounut sog dakol nilon bug dakol nong mokan nilon.
5 Sumboy pilion niyu og bilibili atawa kambing nog laki nok sotahun pa og gumulin bu daꞌdun ok sallaꞌ in.
6 Na ipat niyu ong mga potubuon koyon sampoy ikosopuluꞌ bu pat sobang nog bulan kini.
Pogdatong nog gondow koyon,
sog waktu magrib,
sumboy moksumbaliꞌ na ok kotanan nog jomaa nog Israel nong mga potubuon nilon koyon.
7 Doksuꞌ malap amu nog duguꞌ nok sinumbaliꞌ koyon bangka niyu loklas sok tas bug mansing kilid nok pintuan nong mga baloy nok pokkanan niyu.
8 Sog gobi niyon,
sumboy tapahon niyu ok sinumbaliꞌ koyon bangka niyu kanoy og gungodin dunut mokopet nog gutan bug pan nog daꞌdun ok posuligin.
9 Diꞌ niyu kanon og gungodin nong milow atawa linagaꞌ.
Sumboy tapahon ok tibukin dunut gulu bug pa nin bu sampoy na og gungodin.
10 Tipoton niyu koyon kotanan sog diꞌ pa sumilak og gondow.
Tibuwa bilaꞌ ongon pa ok samaꞌ dun,
na sumboy tutungon niyu.
11 Sog diꞌ pa matong og waktu pokkan,
sumboy asal amu na mimakoy nog juba bug tolumpaꞌ,
bu oyit niyu ok tungkod niyu.
Pogdaliꞌ-dalian niyu kuman ok sinumbaliꞌ koyon,
poꞌ posunguꞌ amu mopanow.
Og bilibili atawa kambing nok sinumbaliꞌ niyu koyon,
yonin na koyon ok pogawon ku diniyu tidu sok kopatoy.
Yonin kini og Halilaya Pogliyus nok pokoradjaan niyu pokpudji dinakon,
ok Tuhan niyu.
12 Poꞌ sog gobi niyon,
biyanan ku og bonuwa Misir,
bu sugaton ku nog balaꞌ nok kopatoy ok kotanan nog laki nong miguna bataoy,
tidu song manusiyaꞌ mangoy sog binatang.
Pogmulkaan ku ok kotanan nok piktuhanan nong mga tow Misir poꞌ akon ok Pogbayaꞌ-bayaꞌ.
13 Na og duguꞌ nog loklason niyu sok tas bug mansing kilid nong mga pintuan niyu,
yonin koyon og gindanan bug ayin ong mga baloy niyu.
Bilaꞌ motongowu og duguꞌ koyon,
liyusan ku amu bu daꞌdun og balaꞌ mongmula diniyu sog waktu nok sugaton ku og bonuwa Misir.
Og Halilaya Pokkan nok Pan nog daꞌdun ok Posuligin
14 Og gondow kini,
moimung ok pomondoman niyu sok kobaisu diniyu.
Sumboy inangon niyu og Halilaya kini pokpudji dinakon sampoy mga ponupuꞌ niyu soumul-tahun.
15 Sog waktu mokpokoradjaan amu,
sumboy kuman amu nok pan daꞌdun ok posuligin sog diyalom nok pitu ondow.
Dadi pongawaꞌ niyu song mga baloy niyu ok kotanan nok posulig nok pan sog ikosolobuk gondow koyon,
poꞌ sima-sima ok kuman nok pan taga posulig tidu sog ikosolobuk ondow mangoy sog ikopitu ondow,
ondaꞌ na yanin koampuꞌ sog bangsa Israel.
16 Poglumpuk amu moksombahayang sog ikosolobuk gondow koyon bu sog ikopitu ondow,
bu sumboy daꞌdun og inangon niyu sog duwaꞌ ondow koyon luwal da song mogusibaꞌ nok kan niyu.
17 Dadi pokpokoradjaan amu nog Halilaya nok Pan Daꞌdun ok Posuligin,
poꞌ og gondow kini ok pomondoman niyu sok koawon ku diniyu kotanan tidu sog bonuwa Misir.
Saan na inang niyu kini tahun-tahun sampoy song mga ponupuꞌ niyu soumul-tahun.
18 Na sok ponognaan bulan nok tahun,
song magrib nog ikosopuluꞌ bu pat sobang,
moktagnaꞌ amu kuman nok pan daꞌdun posuligin mangoy sog ikoduwaꞌ puluꞌ bu sala sobang sog bulan koyon.
19 Dadi sog diyalom nok sosimana koyon,
sumboy daꞌdun ong mobalak nok posulig song mga gumbaloyan niyu.
Poꞌ sima-sima towoy ok kuman nok taga posulig,
ondaꞌ na yanin koampuꞌ sok tumpukan nog bangsa Israel bisan salu bangsa niyu taꞌ atawa ong migdukon hadja diniyu.
20 Bisan ayin amu bonuwahoy,
kanaꞌ amu kuman nok taga posulig sog waktu koyon.
Ok kanon niyu sumboy og daꞌdun ok posuligin.”
Ok Pogawon nong mga Tow Israel sog Balaꞌ nok Tuhan
21 Pogdoksuꞌ nituꞌ pitawag ni Musa ok kotanan nong mga migmokogulang nong mga tow Israel,
bangka nin ilon taluoy,
“Alap amu nog bataꞌ bilibili atawa kambing,
bangka niyu sumbalioy og gantiꞌ sog libun-gumbataꞌ niyu.
22 Tubus alap amu sokongkom nok pomulan nog hissup bangka niyu tokmoꞌ sok ponaksan nok taga duguꞌ nok sinumbaliꞌ.
Doksuꞌ loklas niyu og duguꞌ koyon sok tas bug mansing kilid nok pintuan nog baloy niyu.
Sumboy daꞌdun tokodoy og lumuwas sog baloy niyu sampoy sisolom.
23 Poꞌ miyan ok Tuhan sog bonuwa kini bagun sugaton nog balaꞌ ong mga gulang bataꞌ laki song Misir.
Sugaid sog waktu nong motongowin og duguꞌ sok tas bug mansing kilid nok pintuan niyu,
liyusanin bu diꞌ in posolodon ong malaikat nok kopatoy sog diyalom baloy niyu.
24 Na ong mga suguan pasal sog Halilaya kini,
sumboy niyu bologbogan bug mga ponupuꞌ niyu sampoy soumul-tahun.
25 Inangon niyu ok pokoradjaan kini sampoy sog waktu nong mogonong amu na sog lupaꞌ nog jinanjiꞌ nok Tuhan nog bogoyonin diniyu.
26 Dadi matong og waktu nok sakan amu nong mga gumbataꞌ niyu bug manu mokpokoradjaan amu ma nog Halilaya Pogliyus kini.
27 Na taluan niyu ilon nong mokpokoradjaan amu nog Halilaya Pogliyus bu kurbanon niyu og bilibili pokpudji sok Tuhan poꞌ liniyusanin ong mga gumbaloyan nong mga tow Israel song Misir,
bu pinuwasin og bangsa ta sok kopatoy sog waktu nok sinugatin nog balaꞌ nok kopatoy ong mga gulang bataꞌ laki song Misir.”
Dangan midongog nong mga tow ok taluꞌ ni Musa kini,
simudjud ilon mogdayun sumumba.
28 Dadi puwas nituꞌ minuliꞌ na ong mga tow Israel,
bu inunut nilon tokodoy ok suguan nok Tuhan dinilon nong miposampoy ni Musa bu ni Harun.
Misugat nog Balaꞌ ong mga Gulang Bataꞌ Laki
29 Na pogdatong nok tongaꞌ gobi,
sinugat na nok Tuhan nog balaꞌ kopatoy ok kotanan nog gulang bataꞌ laki sog bonuwa Misir,
miktagnaꞌ sog bataꞌ nok Pirꞌawn nog laki,
ok kopusakaan bosiya nok poksultanin,
toktob sog bataꞌ nok tow pinirisu.
Minatoy da sop ok kotanan nong mga potubuon nong miguna bataoy.
30 Sog gobi nituꞌ mikotanud ok Pirꞌawn bug mga ponindogin sampoy ok kotanan nok tow song Misir,
bu midongog ong mopagas nog gaduy diyon,
poꞌ daꞌdun og baloy nog daꞌ kopatoyoy.
31 Na sog gobi niyon sinuguꞌ nok Pirꞌawn ok sosuguonin mangoy dituꞌ niloꞌ Musa bug Harun,
bangka poktaluꞌ,a
“Pokpolayuꞌ amu na dini bug mga tow Israel!
Gonatoy niyu na ami!
Angoy amu na poktolagad sok Tuhan mamaꞌ nok tinaluꞌ niyu.
32 Oyit niyu na ong mga potubuon niyu mamaꞌ nok tinaluꞌ niyu bangka amu awaꞌ.
Sugaid pongoni-ngonihoy niyu da sop akon nog barakat.”
33 Na pingoni tokodoy nong mga tow Misir song mga tow Israel nong mogdaliꞌ-daliꞌ ilon mawaꞌ sog bonuwa nilon,
poꞌ taluꞌ nilon,
“Motipot ami na pomatoy kotanan bilaꞌ diꞌ amu mawaꞌ.”
34 Dadi inalap nong mga tow Israel og inabdun nok tirigu nog daꞌ pa kobotangoy nok posulig dituꞌ sok pogabdunan.
Pinutus nilon nog gamis,
bangka nilon pisanoy.
35 Ininang nong mga tow Israel ok sinuguꞌ ni Musa dinilon.
Mingoni ilon nong mga olo-olo nog inimung tidu sog bulawan bug silber bug ponapot tidu song mga tow Misir.
36 Binogoy nong mga tow Misir ok pingoni nilon,
poꞌ pilunuk na nok Tuhan ok pongatoyan nilon posunguꞌ song mga tow Israel.
Mamaꞌ nituꞌ ok koalap nilon nog gartaꞌ nong mga tow Misir.
Ok Pogawaꞌ nong mga Tow Israel song Misir
37 Dadi mipanow ong mga tow Israel tidu sok siyudad nog Ramsis posunguꞌ sog lungsud nok Sukot.
Ongon nom gatus ngibu og dakol nong mga kolakihan mikpanow,
len pa og dakol mga kolibunan bug mga gumbataꞌ.
38 Modakol da sop ong mga tow nog len bangsa ong migunut mawaꞌ dinilon,
bu modakol tokodoy nong mga bilibili,
kambing,
sapiꞌ bug mga len potubuon nog inoyt nilon.
39 Na pilutuꞌ na nilon og inabdun kituꞌ nog daꞌdun ok posuligin,
ong mioyit nilon kituꞌ tidu song Misir.
Ondaꞌ nilon kobotangoy nok posulig,
poꞌ tinopak ilon mokpawaꞌ song Misir.
Daꞌdun sop og waktu nilon mokpolutuꞌ nog balun nilon.
40 Ongon pat gatus bu tolu puluꞌ tahun og bon nong mga tow Israel migonong song Misir.
41 Dadi pogdopot nok pat gatus bu tolu puluꞌ tahun ok pogonong nilon dituꞌ,
yonin na sop kituꞌ tokodoy og gondow nok kawaꞌ nong mga piktowan nok Tuhan tidu song Misir.
42 Sog gobi nituꞌ binantoyan ilon nok Tuhan bagun oyitonin ilon mawaꞌ tidu sog bonuwa Misir.
Saan na mogjaga da sop ong mga tow Israel sog gobi koyon tahun-tahun pangkat-momangkat,
ok pomondoman nilon sok kotabang nok Tuhan dinilon.
Ok Saraꞌ pasal sog Halilaya Pogliyus
43 Tinaluan nok Tuhan si Musa bu si Harun,
longin,
“Mamaꞌ nini ong mga suguan pasal sog Halilaya Pogliyus nok sumboy unuton niyu.
Diꞌ mogdadi ok tow nog len og bangsa nin mampuꞌ kuman sok pokoradjaan kini.
44 Sugaid ok sosuku gulipon nok sinaluy niyu,
mogdadi da kuman dun basta miislam niyu na ilon.
45 Diꞌ mokokan dun og len bangsa nong migdukon diniyu bu ong mga mogoginang nok tinindanan niyu.
46 Na ok sinumbaliꞌ koyon sumboy kanon sog diyalom baloy,
diꞌ mogdadi oyiton sog luwasan,b
bu diꞌ niyu balion ok tulanin.c
47 Sumboy ok kotanan nong mga tow Israel mogunut sog Halilaya Pogliyus kini.
48 Bilaꞌ ongon ok tow len bangsa asal na migonong sog bonuwa niyu,
sokaliꞌ meleg mampuꞌ mokpokoradjaan sog Halilaya Pogliyus kini para sok Tuhan,
sumboy islamon yanin poguna sampoy na ong mga salu baloyin nog laki.
Doksuꞌ mogdadi na yanin mampuꞌ mokpokoradjaan nog Halilaya Pogliyus bu mamaꞌ da yanin nong mga tow Israel.
Sugaid og daꞌ koislam,
diꞌ mogdadi mampuꞌ kuman dun.
49 Na yonin koyon ong mga suguan nog unuton niyu mga tow Israel,
sampoy mga len tow nong migonong diyon diniyu.”