Og Balaꞌ sog Gulang Bataꞌ nog Laki, og Ikosopuluꞌ nog Balaꞌ
11
Tinaluan nok Tuhan si Musa,
“Solobuk dona og balaꞌ nok podatongon ku sok Pirꞌawn bu song mga tow Misir.
Pokpuwas nituꞌ kumboyonin na amu mawaꞌ,
bu bugowonin na tanan amu kotanan sog bonuwa nin.
2 Taluan nu ong mga tow Israel libun-laki nong mongoni ilon song mga kilani baloy nilon nong mga panyap nog inimung tidu sog bulawan bug silber.”
3 Na tidu sog lolat nok Tuhan,
mikkobais ok pogoyit nong mga tow Misir song mga tow Israel,
bu pigaddatan sop tokodoy si Musa nong mga ponindog nok Pirꞌawn bug mga tow Misir.
4 Na sog daꞌ pa awaꞌ si Musa sok Pirꞌawn,
ok taluꞌ in,
“Yonin kini ok tinaluꞌ nok Tuhan,
‘Bombus sok tongaꞌ gobi miyan ku sog bonuwa Misir,
5 bu matoy ok kotanan nog gulang bataꞌ laki,
tagnaan sog bataꞌ nu Pirꞌawn,
ok kopusakaan bosiya nok poksultan nu,
sampoy song mga gulang bataꞌ laki nong mga kinobabaan nog gulipon.
Momatoy da sop ok kotanan nok potubuon nog laki nong mikuna bataoy.
6 Na modongog ong mosolag nok pogaduy sog bonuwa Misir.
Ondaꞌ pa sibon kodongog ong mamaꞌ niyon nok pogaduy,
bu diꞌ na koyon modongog mokpuliꞌ.
7 Sugaid song mga tow Israel bug mga potubuon nilon,
mohinok bu daꞌdun ong modongog bisan gusig nog gayam.
Tidu diyon motongow niyu bug olohon pokpoduwoy nok Tuhan ong mga tow Israel tidu song mga tow Misir.’ ”
8 Tinaluꞌ pa ni Musa,
“Ok kotanan nong mga ponindog nu koyon mangoy sumudjud dinakon bangka poktaluꞌ,
‘Awaꞌ amu na bug kotanan nong mga tow nong mogunut dinika.’
Pokpuwas niyon mawaꞌ u na.”
Doksuꞌ in koyon taluoy,
minawaꞌ na yanin diyon sok Pirꞌawn dunut landuꞌ og lingitin.
9 Tubus miktaluꞌ ok Tuhan diyon ni Musa,
“Ondaꞌ ponginongog ok Pirꞌawn dinika bagun dumakol ok poongonon ku nong mga mokosobuꞌ-sobuꞌ song Misir.”
10 Ininang na ni Musa bu ni Harun ok kotanan nong mga mokosobuꞌ-sobuꞌ kituꞌ sog gadapan nok Pirꞌawn,
sugaid pitogas nok Tuhan ok pongatoyan nok Pirꞌawn,
bu diꞌ in kumboyon mawaꞌ ong mga tow Israel sog bonuwa nin.