Og Balaꞌ song mga Potubuon, og Ikolima nog Balaꞌ
9
Doksuꞌ miktaluꞌ na sop ok Tuhan dituꞌ ni Musa,
“Angoya sok Pirꞌawn,
bangka nu yanin taluoy,
‘Yonin kini ok taluꞌ nok Pogbayaꞌ-bayaꞌ,
ok Tuhan nong mga tow Ibrani,
“Kumboy nu na mawaꞌ ong mga piktowan ku bagun mokopoktolagad ilon dinakon.
2 Poꞌ bilaꞌ pogondian bu saggaan nu pa ilon mawaꞌ,
3 tontong nu,
podatongan nok Tuhan nong mosolag nog balaꞌ ong mga potubuon nu.
Mosugat ong mga kudaꞌ nu,
kudaꞌ himar nu,
guntaꞌ,
sapiꞌ,
bilibili bug mga kambing nu.
4 Sugaid poduwoyon ku ong mga potubuon nong mga tow Misir bug mga potubuon nong mga tow Israel.
Daꞌdun ong matoy sok kotanan nok potubuon nong mga tow Israel.” ’ ”
5 Na miggantaꞌ ok Tuhan nog waktu,
dadi taluꞌ ni Musa dituꞌ sok Pirꞌawn,
“Lomaꞌ inangon koyon nok Tuhan.”
6 Dadi poglomaꞌ ininang koyon nok Tuhan.
Minatong na og balaꞌ bangka patoy ok kodakolan nong mga potubuon nong mga tow Misir.
Tibuwa daꞌdun ong minatoy bisan solobuk song mga potubuon nong mga tow Israel.
7 Dadi miksuguꞌ mokpoligsaꞌ ok Pirꞌawn.
Na motud dodaꞌ nog daꞌdun ong minatoy song mga potubuon nong mga tow Israel.
Sugaid bisan maꞌ nituꞌ,
ondaꞌ da pokpinda ok togas nok pongatoyan nok Pirꞌawn,
bu diꞌ in da kumboy mawaꞌ ong mga tow Israel.
Ong mga Poksa, og Ikonom nog Balaꞌ
8 Tubus miktaluꞌ na sop ok Tuhan dituꞌ ni Musa bu ni Harun,
“Kolup amu nog gabu tidu sog buwanan bangka sibwagoy ni Musa sok tas soliyan ni Pirꞌawn moktontong.
9 Og gabu koyon moimung nog bogombun sok koliwagan nog bonuwa Misir,
bu mosugat ong mga binatang bug mga tow ayin-ayin sog bonuwa Misir nok poksa nong mogmata bangka kobogdak.”
10 Dadi kinumolup ilon nog gabu sog buwanan bangka ilon adap ni Pirꞌawn.
Doksuꞌ sinibwag ni Musa og gabu posunguꞌ sok tas.
Dadi ong mga binatang bug mga tow Misir misugat nok poksa nong migmata bangka kobogdak.
11 Na ong mga polohikmat song Misir kituꞌ,
ondaꞌ pokangoy madap ni Musa,
poꞌ pinoksa da sop ilon sampoy ok kotanan nong mga tow Misir.
12 Sugaid pitogas nok Tuhan ok pongatoyan ni Pirꞌawn bu diꞌ da yanin monginongog ni Musa bu ni Harun mamaꞌ na nog asal tinaluꞌ nok Tuhan diyon ni Musa.
Og Dupiꞌ nog Ays, og Ikopitu nog Balaꞌ
13 Tubus miktaluꞌ na sop ok Tuhan dituꞌ ni Musa,
“Pogdoliꞌ-ondowa lomaꞌ,
bu lumpak nu ok Pirꞌawn,
bangka nu yanin taluoy,
‘Mamaꞌ nini ok taluꞌ nok Pogbayaꞌ-bayaꞌ,
ok Tuhan nong mga tow Ibrani,
“Kumboy nu na mawaꞌ ong mga piktowan ku bagun mokopoktolagad ilon dinakon.
14 Poꞌ bilaꞌ ondiꞌ,
mokpoponogu nong mga balaꞌ nong mokomula sog ginawa-baran nu,
song mga ponindog nu bu song mga piktowan nu bagun nu kosunan nog daꞌdun mokobatuk dinakon dini sog dunya.
15 Kinobon nituꞌ bilaꞌ pidatongan ku na bosiya ika bug mga piktowan nu nog balaꞌ nok saki,
daꞌ amu na bosiya dini sog dunya ningkomun.
16 Sugaid kinumboyu ika motubuꞌ bagun mopotongowu dinika ok kowasa u,
bu bagun motanyag ong ngalan ku ayin-ayin sog dunya.
17 Tibuwa ika,
piotas nu tokodoy og ginawa nu song mga piktowan ku,
bu diꞌ nu pa ilon kumboyon mawaꞌ.
18 Poginongoga,
lomaꞌ sisolom mamaꞌ da nog waktu kini,
podupian ku og bonuwa nu nog landuꞌ kobogat nog dupiꞌ nog ays,
og dupiꞌ nog daꞌ pa sibon konanamoy nong mga tow dini tidu sok pokpotindog nong Misir sampoy ningkomun.
19 Saan na poksuguꞌ a na nok posolodon ong mga potubuon nu bug mga piktowan nu,
poꞌ bilaꞌ kolabuan nog dupiꞌ ays ong manusiyaꞌ taꞌ atawa potubuon taꞌ,
na tantu matoy ilon.” ’ ”
20 Na og duma nong mga ponindog nok Pirꞌawn nong miondok sok taluꞌ nok Tuhan,
pidaliꞌ-dalian nilon mokposolod ong mga potubuon bug mga gulipon nilon.
21 Sugaid ong mga daꞌ pogmasi sok taluꞌ nok Tuhan,
pitiyangan nilon sog luwasan ong mga gulipon bug mga potubuon nilon.
22 Puwas nituꞌ tinaluan nok Tuhan si Musa,
“Inat nu na ok komot nu sok tas bagun mogdupiꞌ nog ays song mga tow bug mga binatang sampoy sok kotanan nok pomulan sok koliwagan nong Misir.”
23 Dadi ininat ni Musa ok tungkodin sok tas,
bu pilugung nok Tuhan,
bu pilotiꞌ in posunguꞌ sog lupaꞌ bangka nin podupioy nog ays.
24 Na landuꞌ tokod kolandos nog dupiꞌ nog ays,
bu daꞌdun og lotaꞌ nog lotiꞌ ayin-ayin.
Kinobon nituꞌ,
yonin pa koyon og landuꞌ kopagas nog dupiꞌ nog ays sog bonuwa Misir.
25 Dadi misugat ok kotanan nok tow bug mga binatang nog dituꞌ sog luwasan sog bonuwa Misir.
Bu misugat bangka poglaat ok kotanan nok pomulan bug mga kokayuhan kobalan nog dupiꞌ nog ays.
26 Tibuwa og Gosen,
og bonuwa nok pigonongan nong mga tow Israel,
ondaꞌ kosunuꞌ dupioy nog ays.
27 Dadi pitawag nok Pirꞌawn si Musa bu si Harun,
bangka poktaluꞌ,
“Mikodusa u dodaꞌ ningkomun.
Ok Pogbayaꞌ-bayaꞌ,
ong mologdong,
bu akon bug piktowan ku ok taga dusa.
28 Pongoni niyu sok Tuhan nok polotaonin na og lotiꞌ bug pogdupiꞌ nog ays nong mokondok-ondok kini,
poꞌ diꞌ ami na mokogaga.
Kumboyon ku na amu mawaꞌ,
ondiꞌ amu na sioy mogonong song Misir.”
29 Ok tabal ni Musa,
“Pogluwasu hadja sok siyudad kini,
moktayaku mongoni-ngoni sok Tuhan,
bu polotaonin na og lotiꞌ bug dupiꞌ nog ays bagun nu kosunan ok Pogbayaꞌ-bayaꞌ da og gapuꞌ nog dunya kini.
30 Tibuwa kiosunan ku nog ika bug mga ponindog nu,
ondaꞌ pa kondok sok Tuhan Pogbayaꞌ-bayaꞌ.”
31 Na ong mga pomulan nong miglaat,
yonin na ong mga pomulan nok soliyan pogbunga bu soliyan pogbulak.
32 Sugaid ok pomulan nok tirigu,
ondaꞌ da poglaat,
poꞌ mibinayaꞌ tumubuꞌ.
33 Na ginumonat si Musa tidu sok Pirꞌawn bangka luwas sok siyudad.
Miktayak yanin nok komotin mongoni-ngoni sok Tuhan,
tubus linumotaꞌ na og lotiꞌ bu og dupiꞌ nog ays,
bu daꞌ na pogdupiꞌ nong molandos.
34 Tibuwa dangan mitongow ni Pirꞌawn nog linumotaꞌ na og lotiꞌ bug dupiꞌ nog ays,
mikodusa na sop yanin.
Pitogasin na sop puliꞌ ok pongatoyanin bu mamaꞌ niyon da sop ong mga ponindogin.
35 Na migmotogas ok Pirꞌawn,
bu daꞌ in kumboyoy mawaꞌ ong mga tow Israel,
mamaꞌ nog asal tinaluꞌ nok Tuhan biyan ni Musa.