Ong mga Gombak, og Ikoduwaꞌ nog Balaꞌ
8
Miktaluꞌ na sop ok Tuhan dituꞌ ni Musa,
“Angoya sok Pirꞌawn,
bangka nu posampoy diyanin,
‘Mamaꞌ nini ok taluꞌ nok Tuhan,
“Kumboy nu na mawaꞌ ok piktowan ku bagun mokopoktolagad ilon dinakon.
2 Bilaꞌ diꞌ a meleg,
podatongan ku og liwag nog bonuwa nu nog balaꞌ nog gombak.
3 Moglibol ong mga gombak sok subaꞌ Nil,
bu momonek bangka solod sog diyalom gastanaꞌ nu,
mga bilik nu bug tulugan nu,
bu sog diyalom nog baloy nong mga ponindog nu bug mga piktowan nu,
poglutuan niyu nok pan,
bu sampoy song mga pogabdunan niyu nok tirigu.
4 Loksuhan ka nong mga gombak bug kotanan nong mga ponindog nu,
mangoy song mga piktowan nu.” ’ ”
5 Miktaluꞌ na sop ok Tuhan dituꞌ ni Musa,
“Taluan nu si Harun nog inatonin ok tungkodin posunguꞌ song mga kosubaan,
song mga kanal bu song mga linow bagun moglibol ong mga gombak sog bonuwa nong Misir.”
6 Dadi ininat na ni Harun ok tungkodin posunguꞌ song mga kotubig-tubigan,
bu mingluwas og landuꞌ kodakol nog gombak bangka kolokop sog liwag nog bonuwa Misir.
7 Sugaid ong mamaꞌ nituꞌ,
kidogilingan da sop nong mga polohikmat song Misir.
Mikopoluwas da sop ilon nong mga gombak sog bonuwa Misir.
8 Tubus pitawag nok Pirꞌawn si Musa bu si Harun,
taluꞌ in dinilon,
“Pongoni-ngonihan niyu akon sok Pogbayaꞌ-bayaꞌ nog awaonin na ong mga gombak dini dinakon bu song mga piktowan ku,
bu kumboyon ku na mawaꞌ ong mga tow Israel bagun ilon mokopokkurban posunguꞌ sok Tuhan.”
9 Ok tabal ni Musa sok Pirꞌawn,
“Ika na ong mokosun moktaluꞌ bug andun ku ika pongoni-ngonihoy sampoy sok ponindog nu bug mga piktowan nu bagun mobolong na ong mga gombak sog liwag nong Misir luwal dona diyon sok subaꞌ Nil.”
10 Ok tabal nok Pirꞌawn,
“Lomaꞌ nu akon pongoni-ngonihoy.”
Taluꞌ sop ni Musa,
“Inangon ku ok pingoni nu bagun nu kosunan nog daꞌdun luwal ong mokobatuk sok Pogbayaꞌ-bayaꞌ,
ok Tuhan nami.
11 Moawaꞌ na ong mga gombak dinika,
sog gastanaꞌ nu bu sog gumbaloyan nong mga ponindog nu bug mga piktowan nu.
Daꞌdun na ong mosamaꞌ,
muwal da diyon sok subaꞌ.”
12 Na minawaꞌ na si Musa bu si Harun tidu sog gastanaꞌ ni Pirꞌawn,
bu inunut ni Musa ok pasadin sok Pirꞌawn.
Mingoni-ngoni yanin sok Tuhan pasal song mga gombak nok pidatongin sok Pirꞌawn.
13 Dinuhul nok Tuhan ok pingoni ni Musa,
bu mikpomatoy ong mga gombak song mga gumbaloyan,
loma-lomahan bu song mga koumahan.
14 Dadi tinopuk nong mga tow Misir ong mga gombak nok tinumambak tokodoy,
bu migoduꞌ og bonuwa Misir.
15 Tibuwa dangan mitongow nok Pirꞌawn nong mipuwas na yanin tidu sog balaꞌ,
na pitogasin ok pongatoyanin.
Bu ondiꞌ da yanin monginongog ni Musa bu ni Harun mamaꞌ na nog asal tinaluꞌ nok Tuhan.
Ong mga Konosop, og Ikotolu nog Balaꞌ
16 Doksuꞌ miktaluꞌ na sop ok Tuhan dituꞌ ni Musa,
“Taluan nu si Harun nog bombalonin sog lupaꞌ ok tungkodin bagun moimung nok konosop og bogombun sok tibuk nog bonuwa Misir.”
17 Dadi binombal ni Harun sog lupaꞌ ok tungkodin,
bu miimung nok konosop ok kotanan nog bogombun sog liwag nong Misir,
bangka pongapun song mga tow bug mga potubuon.
18 Pigdogilingan bosiya nong mga polohikmat nok Pirꞌawn mokpoongon nong mga konosop biyan sog gilmu nilon,
sugaid daꞌ da nilon koinang.
Dadi miulit nong mga konosop ong mga tow bug mga binatang.
19 Tinaluan nong mga polohikmat kituꞌ ok Pirꞌawn,
“Motud dodaꞌ nok tidu kini sok kowasa nok Tuhan.”
Sugaid migmotogas da ok pongatoyan ni Pirꞌawn,
bu diꞌ da yanin monginongog mamaꞌ na nog asal tinaluꞌ nok Tuhan.
Ong mga Langow, og Ikopat nog Balaꞌ
20 Tinaluan nok Tuhan si Musa,
“Lomaꞌ sog diꞌ pa sumilak og gondow,
lumpak nu si Pirꞌawn sog waktu nok posunguꞌ yanin dituꞌ sok subaꞌ Nil bangka nu yanin taluoy,
‘Mamaꞌ nini ok taluꞌ nok Tuhan,
“Kumboy nu na mawaꞌ ong mga piktowan ku bagun mokopoktolagad ilon dinakon.
21 Poꞌ bilaꞌ diꞌ nu ilon kumboyon mawaꞌ,
podatongan ku ika nog balaꞌ nog langowa sampoy song mga ponindog nu bug mga piktowan nu song Misir.
Moglibol bangka koponuꞌ nong mga langow ong mga baloy niyu bug mga lupaꞌ niyu.
22 Sugaid og bonuwa Gosen,
ok pigbonuwahan nong mga piktowan ku ondiꞌ u sunuon bagun diꞌ mangoy dituꞌ dinilon ong mga langow.
Dadi biyan sog inangon ku,
kosunan niyu nog akon ok Pogbayaꞌ-bayaꞌ sampoy dini sog bonuwa kini.
23 Poduwoyon ku ong mga piktowan ku bug mga piktowan nu.
Lomaꞌ moongon ong mokondok-ondok nog balaꞌ kini.” ’ ”
24 Dadi poglomaꞌ tidu sok pokposampoy ni Musa diyon sok Pirꞌawn,
binologbogan nok Tuhan ok tinaluꞌ in.
Dinumukpak ong mga langow nog landuꞌ kodikpol sog gastanaꞌ nok Pirꞌawn bu sog baloy nong mga ponindogin bu sok koliwagan nog bonuwa Misir.
Miglaat ong Misir pasal sok kodikpol nong mga langow koyon.
25 Dadi pitawag nok Pirꞌawn si Musa bu si Harun bangka nin taluoy,
“Na sigi na,
pokkurban amu posunguꞌ sok Tuhan niyu,
sugaid dini hadja sog bonuwa Misir.”
26 Ok tabal ni Musa,
“Ondiꞌ mogdadi nog dini song Misir,
poꞌ ong mga pokkurban nami sok Tuhan nami,
mopok tokodoy ong mga tow Misir dun.
Dadi bilaꞌ mokkurban ami nong mopok tokodoy ilon dun,
daꞌdun pogduwaꞌ-duwaꞌ,
batuhon nilon ami.
27 Saan na sumboy ami mopanow sog bonuwa nog daꞌdun ok towin sog diyalom nok tolu ondow,
bangka ami pokkurban sok Tuhan nami,
mamaꞌ nok suguanin dinami.”
28 Taluꞌ nok Pirꞌawn,
“Na kumboyon ku na amu mangoy sog bonuwa nog daꞌdun ok towin bagun amu mokopokkurban sok Tuhan niyu,
sugaid diꞌ amu tantu mokpolayuꞌ.
Pongoni-ngonihoy niyu da sop akon.”
29 Ok tabal ni Musa,
“Sog waktu nog lumuwasu na dini,
pongoni-ngonihon ku sok Tuhan nog awaonin na ong mga langow dinika sampoy song mga ponindog nu bug mga piktowan nu lomaꞌ.
Sugaid diꞌ nu hadja ami pogloputan puliꞌ biyan sok pogondian nu ami mangoy mokkurban sok Tuhan.”
30 Dadi linumuwas si Musa bangka yanin pongoni-ngoni sok Tuhan.
31 Na dinuhul nok Tuhan ok pingoni-ngoni ni Musa.
Inawaꞌ in ong mga langow sok Pirꞌawn,
song mga ponindogin bu song mga piktowanin,
bu daꞌdun misamaꞌ dun,
bisan solobuk.
32 Sugaid pitogas puliꞌ nok Pirꞌawn ok pongatoyanin,
bu daꞌ in da sop kumboyoy mawaꞌ ong mga tow Israel sog waktu koyon.