Pogawaꞌ 7

Miktaluꞌ ok Tuhan dituꞌ ni , “Imungon ku ika mamaꞌ dinakon sok ponontong ni , bu og gilug nu si , imungon ku mamaꞌ nong nabi nu. 2 Taluꞌ nu ni Harun ok kotanan nok suguon ku dinika, bu yanin sop ok sumuksug ni Pirꞌawn nok sumboy poluwasonin ong mga tow sog bonuwa nin. 3 Potogason ku ok pongatoyan nok Pirꞌawn. Modakol ok potongowon ku mga gindanan bug ginang nong mokosobuꞌ-sobuꞌ bu mokondok-ondok sog bonuwa , 4 sugaid diꞌ da monginongog ok Pirꞌawn dinika. Na ponanamon ku song mga tow Misir ok kowasa u biyan sok pokpodatongu dinilon nog balaꞌ, bu poluwason ku song Misir og bangsa Israel, ok piktowan ku mounut sok pangkatan nok piktiduhan nilon. 5 Na kosunan nong mga tow Misir nog akon ok Pogbayaꞌ-bayaꞌ, bilaꞌ motongow nilon ok kowasa u nok poluwason ku ong mga tow Israel tidu dinilon.”

6 Na inunut tokodoy ni Musa bu ni Harun ok suguan dinilon nok Tuhan. 7 Sog waktu nilon mogabit-abit ni Pirꞌawn, og gumul ni Musa ongon na walu puluꞌ tahun, bu si Harun sop walu puluꞌ bu tolu tahun og gumulin.

Ok Tungkod nong Miimung nong Mamak

8 Na miktaluꞌ ok Tuhan dituꞌ ni bu ni , 9 “Suguon amu nok mokpotongow nong mokosobuꞌ-sobuꞌ diyanin gantaꞌ pokposobonnal nok sinuguꞌ u amu. Dadi Musa, taluan nu si Harun nok tikpuonin ok tungkodin sog gunahan ni Pirꞌawn bagun moimung nong mamak.” 10 Na minangoy si Musa bu si Harun dituꞌ sok Pirꞌawn, bangka nilon inangoy ok sinuguꞌ nok Tuhan dinilon. Doksuꞌ tinikpuꞌ ni Harun ok tungkodin sog gadapan ni Pirꞌawn bug mga ponindogin. Na miimung mogdayun nong mamak. 11 Dadi pitawag ni Pirꞌawn ong mga piktowanin nong mokokosun bu mga polohikmat. Dinogilingan nilon ong mamaꞌ nog ininang ni Harun kituꞌ tidu sog gilmu nilon. 12 Tinikpuꞌ nok sosolokotow dinilon ong mga tungkod nilon, bu miimung da sop nong mamak. Sugaid inuglon nong mamak ni Harun ong mga tungkod nilon nong miimung nong mamak. 13 Tibuwa bisan mamaꞌ nituꞌ, motogas ok pongatoyan ni Pirꞌawn, bu ondaꞌ da yanin ponginongog ni Musa bu ni Harun mamaꞌ na nog asal tinaluꞌ nok Tuhan.

Og Duguꞌ, og Ikosolobuk Balaꞌ

14 Dadi tinaluan nok Tuhan si , “Migmotogas ok , diꞌ in kumboyon ong mga tow mawaꞌ. 15 Lomaꞌ sisolom angoya dituꞌ ni Pirꞌawn sog waktu nok posunguꞌ yanin sok subaꞌ Nil. Oyit nu ok tungkod nong miimung nong mamak kituꞌ bangka a pogbagad diyanin dituꞌ sok kilid subaꞌ. 16 Pogdatong nok Pirꞌawn, taluan nu yanin, ‘Ok Pogbayaꞌ-bayaꞌ, ok Tuhan nong mga , miksuguꞌ dinakon bagun moksuksug nok sumboy kumboyon nu na ong mga towin mawaꞌ bagun mokopoktolagad ilon diyanin dituꞌ sog . Sugaid sampoy ningkomun daꞌ a da tombaꞌ. 17 Saan na posampoyan ka nok Pogbayaꞌ-bayaꞌ bagun kosunan nu nog yanin ok Tuhan biyan sog inangonin ningkomun. Na tontong nu! Bombalon ku nok tungkod kini ok tubig sok subaꞌ Nil bu moimung mogdayun nog duguꞌ. 18 Mokpomatoy ong mga sodaꞌ bangka koduꞌ ok subaꞌ boyaan mopok ong mga tow minum nok tubig diyon.’ ”

19 Tinaluan pa si Musa nok Tuhan, “Taluan nu si nog alaponin ok tungkodin bangka nin inatoy posunguꞌ song mga kotubig-tubigan song Misir, song mga subaꞌ, kanal, sapaꞌ bug linow. Moimung nog duguꞌ ok kotanan nok tubig dini sog bonuwa Misir, sampoy ok tubig sog diyalom nong mga pogungodan nilon.”

20 Inunut ni Musa bu ni Harun ok suguan dinilon nok Tuhan. Minangoy ilon madap sok Pirꞌawn bug mga ponindogin. Doksuꞌ ininat ni Harun ok tungkodin bangka bombaloy sok subaꞌ Nil. Na miimung nog duguꞌ ok subaꞌ koyon. 21 Mikpomatoy ok kotanan nok sodaꞌ sok subaꞌ Nil, bu mioduꞌ ok subaꞌ. Saan na diꞌ moinum nong mga tow Misir ok tubig diyon. Ayin-ayin nok tubig sog bonuwa Misir miimung na nog duguꞌ. 22 Sugaid ong mga polohikmat song Misir, kidogilingan da sop nilon biyan sog gilmu nilon og ininang ni Musa bu ni Harun. Dadi migmotogas ok Pirꞌawn, bu daꞌ da yanin poginongog dinilon mamaꞌ na nog asal tinaluꞌ nok Tuhan. 23 Tinumolikod ok Pirꞌawn bangka uliꞌ sog gastanaꞌ in, bu daꞌ in da maling-malingoy ong miinang kituꞌ. 24 Dadi ong mga tow Misir mikkukut ilon song mga kilid nok subaꞌ monontong nok tubig inumon, poꞌ ok tubig sok subaꞌ Nil diꞌ na moinum. 25 Mikobiyan na pitu ondow tidu sog waktu nok pidatongan nok Tuhan nog balaꞌ ok subaꞌ Nil.