Minadap si Nabi Musa bu si Harun sok Pirꞌawn
5
Pokpuwas nituꞌ minangoy si Musa bu si Harun dituꞌ sok Pirꞌawn.
Taluꞌ nilon,
“Yonin kini ok tinaluꞌ nok Pogbayaꞌ-bayaꞌ,
ok Tuhan nong mga tow Israel,
‘Poluwas nu ong mga piktowan ku bagun ilon moghalilaya poksumbaꞌ dinakon dituꞌ sog ginlupaan mimala.’ ”
2 Ok tabal nok Pirꞌawn,
“Sima ok Tuhan koyon nok sumboy tombaan ku ok suguanin?
Diꞌ u kilalahan ok Pogbayaꞌ-bayaꞌ koyon,
bu diꞌ u kumboyon lumuwas ong mga tow Israel.”
3 Na miktaluꞌ si Musa bu si Harun,
“Mikpotongow dinami ok Tuhan nami mga tow Ibrani.
Dadi pongonihon nami bosiya dinika,
popanow nu ami sog ginlupaan mimala sog diyalom nok tolu ondow bagun mokopokkurban ami sok Tuhan nami.
Poꞌ bilaꞌ ondiꞌ,
insunoy podatonganin ami nok saki atawa moongon ok pogbunuꞌ nong mokopatoy dinami.”
4 Tinaluan ilon ni Pirꞌawn,
“Musa bug Harun,
manu inanggaꞌ niyu ma ong mga tow sog ginang nilon?
Pokpuliꞌ amu kotanan sog ginang niyu!”
5 Taluꞌ pa ni Pirꞌawn,
“Tontong niyu ba,
ong mga piktowan niyu modakol na,
bu ningkomun kolegan niyu polotaon ilon moginang.”
6 Na sog gondow niyon,
sinuguꞌ nok Pirꞌawn ong mga mogbobantoy tow Misir bug mga tow Israel nong migoyit nog ginang,
bangka yanin pokpoponog nok suguan,
7 “Diꞌ niyu na bogoyan ong mga tow Ibrani nog lugami pogampuon sok pogimung nilon nog briks.
Bayaꞌ-bayaꞌ nilon na monontong nog lugami nilon.
8 Sugaid og dakol nog imungon nilon nog briks,
sumboy mamaꞌ da nok kodakol nok tagnaꞌ.
Daꞌdun kulangin,
minsan solobuk poꞌ landuꞌ tokodoy og lolaꞌ nilon.
Saan na mimuhun ilon nong mopanow mokkurban sok Tuhan nilon.
9 Dungagan niyu og bogat nog ginang nilon bagun mokpotidtu ilon,
supaya ondiꞌ na ilon mokopoginongog nong mga taluꞌ nog loput.”
10 Doksuꞌ minangoy na ong mga mogbobantoy tow Misir bug mga tow Israel nong migoyit nog ginang moksuksug song mga tow Israel pasal sok suguan ni Pirꞌawn.
Taluꞌ nilon,
“Ok suguan ni Pirꞌawn,
diꞌ amu na bogoyan nog lugami sok poginang niyu nog briks.
11 Amu na ong monontong nog lugami ayin-ayin.
Sugaid sumboy yonin da og dakol nog inangon niyu nog briks,
ondiꞌ tokodoy mokkulang og dakolin.”
12 Na milatag nong mga tow Israel og bonuwa Misir monontong nog lugami.
13 Tinopak ilon nong mga mogbobantoy,
taluꞌ nilon,
“Pogimung amu nong mga briks,
mamaꞌ da kodakol nok pogimung niyu gondow-gondow sog waktu pogbogoyan amu pa nog lugami.”
14 Pagga kulang og briks nong miimung nilon,
na piglambot nong mga mogbobantoy ong mga tow Israel kituꞌ nong migoyit nog ginang song mga salu-bangsa nilon gulipon.
Tubus sinakan ilon nong mga mogbobantoy,
“Manu ondaꞌ niyu kosaut og dakol nog briks mamaꞌ nog dakol nog asal poginangon niyu?”
15 Na dangan maꞌ nituꞌ,
ong mga tow Israel nong migoyit nog ginang,
minangoy ilon sok Pirꞌawn mikilolat bangka poktaluꞌ,
“U Pirꞌawn,
manu mamaꞌ nini ma ok pogoyit nu dinami mga sosuguon nu kini?
16 Daꞌ ami na bogoyoy nog lugami,
sugaid togolon ami da mogimung nog briks mamaꞌ nog dakolin tagnaꞌ.
Tontong nu ba,
poglamboton ami,
bisan og dusa tidu sok tow nu.”
17 Ok tabal nok Pirꞌawn,
“Landuꞌ amu kololaꞌ,
bu diꞌ amu meleg moginang.
Saan na momuhun amu dinakon nong mangoy mokkurban sok Tuhan niyu.
18 Na pokpuliꞌ amu na sog ginang niyu!
Diꞌ amu bogoyan nog lugami,
sugaid sumboy yonin da og dakol nog briks og imungon niyu.”
19 Dadi kiosunan na nong mga migoyit nog ginang kituꞌ nok kosigpitan na ilon dangan tinaluan ilon nok sumboy batuk da og dakol nog briks og imungon nilon gondow-gondow mamaꞌ da nok tagnaꞌ.
20 Pogluwas nong mga migoyit kituꞌ nog ginang tidu sog gastanaꞌ nok Pirꞌawn,
mitongow nilon si Musa bu si Harun migbagad dinilon.
21 Tinaluꞌ nong mga tow kituꞌ dinilon,
“Ok Tuhan dona ong mokosun diniyu,
poꞌ pasal diniyu milingit na dinami ok Pirꞌawn bug mga ponindogin.
Binogoyan niyu na ilon nok sabapan momatoy dinami.”
22 Dangan maꞌ nituꞌ,
mingoni-ngoni puliꞌ si Musa sok Tuhan.
Taluꞌ in,
“U Pogbayaꞌ-bayaꞌ,
manu pitiyangan nu ma mobinsanaꞌ ong mga piktowan nu?
Manu piangoy nu pa akon dini?
23 Poꞌ tidu sog waktu nong mikposampoyu nok Parman nu dituꞌ sok Pirꞌawn,
na labi pa mibinsanaꞌ ok piktowan nu,
bu daꞌ nu pa lungkan ilon kotabangoy.”