Ne–inaa oodaipia bù Cristopa oopi bùk'a
4
1 Parãpa k'awa p'anadairã Cristo miada mãgá iru k'ap'ùade, sõcharra p'anapatáatù mãik'aapa auk'a k'îsia p'anapatáatù iruk'a. Miadak'ãri, p'ek'au k'achia oonáatù. 2 Oodai k'ãyaara pãchi p'ek'au k'achia ooyaa bù k'ap'ùapa oopi bùk'a, óotù Tachi Ak'õrepa oopi bùk'a parã piurutamaa. 3 Cristode ijãadai naaweda parãpa audupai oopachida ijãadak'aa beerãpa nãgee ne–inaa k'achia ooi awaa p'anapatak'a: pariatua p'ek'au ooyaa; ne–inaa k'achia ooyaa; it'ua toyaa; wêraarã pariatua jùrùyaa mãùrã ome k'achia oodait'ee; k'îra nejasia wêe ùt'aa t'âi awaa ne–inaa juapa oodamaa; mãgee ne–inaa k'achia. 4 Ârá mãgee ijãadak'aa beerãpa k'awada–e p'anù k'ãata k'îsiadai, parã waa wãdak'aa perã ãchi ome mãgee ne–inaa k'achia oode. Maperãpù pedee k'achia jarapata parã ãpùte. 5 Mamîda ewari cherude Tachi Ak'õrepa iidik'ãri ãchia ne–inaa jõmaweda oopatap'edaa pari, ichita p'anaudait'ee. Ma ewate iruata ak'ùit'ee jõmaarãpa oopata jarait'ee pia wa k'achia; chok'ai p'anùùrãpa oopata mãik'aapa piudap'edaarãpa oopatap'edaa paara. 6 Ma piudap'edaarã chok'ai p'anadak'ãri, miapachida k'ap'ùade mãik'aapa piujida k'ap'ùade eperãarã jõmaarãk'a. Mamîda ijãadap'edaarãpa Tachi Ak'õrepa pedee pia jara pëida Cristode ichita chok'ai p'anapataadait'ee iruk'a, ma ijãadap'edaa k'aurepa ãra jaure araa padaida perã iru Jaure ome. Ma–it'eepù Tachi Ak'õrepa jara pëiji Cristopa ooda eperãarã k'aripait'ee.7 Taarã–e na p'ek'au eujã jõit'ee. Mapa ùt'aa t'â k'awaadait'ee Tachi Ak'õrepa k'inia bùk'a, k'îra jîp'a p'anapatáatù mãik'aapa k'îsia k'awaa p'anapatáatù. 8 Ma awara nãga óotù awaraa ne–inaa jõmaweda oodai naaweda. T'ãripa chik'inia p'anapatáatù, mãgá p'anadak'ãri, maarepida k'irãpada–e pait'ee perã awaraarãpa parãmaa ne–inaa k'achia oopata mãik'aapa jarapata. 9 Awaraa ijãapataarã p'asianadak'ãri parãmaa, t'ãri pia auteebáitù, maarepida k'achia pedeeda–ee. 10 Tachi Ak'õre Jaurepa ne–inaa awara–awaraa oopipari parã chaachaa, mãgá awaraarã k'aripadamerã. Mapa mãgà ne–inaa pia oopatáatù irua oopi bùk'a. 11 Tachi Ak'õre Ûraa jarateeparipa jarateeipia bù Tachi Ak'õrepa jarapi bùk'a. Ichiaba ne–inaa ooparipa awaraarã k'aripait'ee, mãga ooipia bù Tachi Ak'õrepa oopi bùk'a. Ne–inaa jõmaade mãga ooruta pùrã, ak'ùpidait'ee Tachi Ak'õre jõmaarã k'ãyaara waibùara bù, Jesucristo k'ap'ùa pari ne–inaa pia oopipari perã parãmaa. ¡Iru ichita Tachi Waibùa pait'ee! ¡Amén!
Cristode ijãapataarã miadak'ãri
12 Âpemaarã k'iniarã, p'eranáatù awaraarãpa parã jùrùdak'ãri miapidait'ee. Mãgá chupùria p'anadak'ãri, parãpa k'awaa atadai wãara Cristode ijãa p'anù wa mak'ùara ijãada–e p'anù. K'îsianáatù parã miadaik'araa bù ichideerã perã. 13 Ma k'ãyaara o–îa p'anátù parã miapidak'ãri Cristo miapidap'edaak'a, ne–inaa pia oo p'anù k'aurepa. O–îa p'anadai mãgá miaruta misa na eujãde, k'awa p'anadairã na ewari wãara t'ãri o–îa p'anadait'ee Cristo chek'ãri ichi k'îra wãree unupide jõmaarãmaa. 14 Ichiaba o–îa p'anátù ik'achia jaradak'ãri parãmaa Cristode ijãapata perã. Mãgá p'anadai k'awa p'anadairã Tachi Ak'õre Jaure, chi jaure pipùara bù, parã ome bapari perã. 15 Awaraarãpa parã miapidait'ee. Mamîda k'îrak'aupai miapidai parã t'ãidepemapa nãgee ne–inaa k'achia ooda pari: chîara peeda perã; chîara net'aa chùada perã maa–e pùrã awaraa ne–inaa k'achia ooda perã chîaramaa; maa–e pùrã pedee–idaa bapari perã; ne–inaa mãgee pari. 16 Jõdee parã t'ãidepema ijãapari miapiruta pùrã Cristode ijãapari perã, k'îra nejasia baik'araa bù. Ma k'ãyaara Tachi Ak'õremaa gracias jaraipia bù, parã ‘Cristodeerã’ apata perã.
17 Taarã–e Tachi Ak'õrepa na p'ek'au eujãdepemaarãpa oopata ak'ùit'ee mãik'aapa jarait'ee pia wa k'achia. Apemaarã k'ãyaara ichideerã naapùara mãgá ak'ùit'ee mãik'aapa miapiit'ee chi ne–inaa k'achia oo p'anùùrã, mãgà k'achia oo amaadamerã. Irua tachi ome mãga ooru pùrã, audupùara irua jara pëida ûridaamaa p'anùùrã uchiada–e pait'ee iru juadeepa.
18 ‘Tachi Ak'õre k'îrapite k'achia wêe p'anùùrã ùt'aa wãdai naaweda, Cristo k'aurepa miaruta pùrã Ak'õre juade, audupùara miadait'ee p'ek'au k'achia ooyaa p'anùùrã, irude ijãadak'aa perã. Mãgùùrã atuadait'ee.’ (Proverbios 11.31)
19 Maperã parã miadak'ãri Tachi Ak'õrepa mãga k'inia bairã, audupùara irude ijãadaipia bù mãik'aapa ichita ne–inaa pia oodaipia bù. Mãga oodaipia bù k'awa p'anadairã iru, tachi oodapa oopari ichia jara bùk'a. Tachi ak'ù bapariit'ee ichimaa wãruta misa.