Ûraa miak'ãi p'anùùrã–it'ee
(Efesios 5.22-23; Colosenses 3.18-19)
3
1 Mùa parã wêraarã miak'ãi beerã ûraait'ee oodamerã pãchi ùmùk'îraarãpa jara p'anùk'a. Mãga ooruta pùrã, chi ùmùk'îraarã ijãadak'aa p'anùùrãpa Tachi Ak'õrepa wãarata jara pëida ijãadai parã k'aurepa. Cristopa ooda ãchimaa jarada–e p'anù mîda, ãchia irude ijãadai, 2 unudak'ãri parãpa Tachi Ak'õre waaweepata mãik'aapa ne–inaa k'achia oodaamaa p'anapata. 3 Parã wêraarã Cristode ijãapataarãpa jùrùdaik'araa bù k'îra wãree p'anadait'ee ârùpai, pãchi poro pi–ia bida p'anùùpa maa–e pùrã ne–inaa nêedee ooda jâ p'anùùpa maa–e pùrã p'aru pi–ia jâ p'anùùpa. 4 Ma k'ãyaara jùrùdaipia bù t'ãride k'îra wãree p'anadait'ee, awaraarãpa mãgee k'îra p'oyaa unuda–e p'anù mîda. Tachi Ak'õre–it'ee piara bù t'ãri pia mãik'aapa k'ãiwee p'anapataadamerã, ne–inaa ârùpai oopata k'ãyaara. Mãgee ne–inaa jõpata, mamîda ne–inaa t'ãride ichita bapari. 5 Mãgá p'anapachida chonaarãwedapema wêraarã, Tachi Ak'õrede ijãapatap'edaa. T'ãride k'îra wãree p'anapachida ijãapatap'edaa perã Tachi Ak'õrepa ãchi k'aripait'ee mãik'aapa oopatap'edaa perã ãchi ùmùk'îraarãpa jaradap'edaak'a. 6 Mãga paji Abraham wêra Sara. Ichia oopachi Abrahampa jaradak'a mãik'aapa irumaa: “mùchi poro waibùada” apachi. Parã Sara k'aurãk'a p'anù, iruk'a ne–inaa pia ooruta pùrã mãik'aapa ne–inaa apidaamaa p'erapida–e p'anù pùrã.7 Ichiaba ûraait'ee parã ùmùk'îraarã Cristode ijãapataarã k'îsia k'awaa p'anadamerã p'anapataadait'ee pãchi wêraarã ome. Ãra k'aripapatáatù juatau mak'ùara wêe p'anadairã ùmùk'îraarãk'a. Ma awara ãra pia ak'ùpatáatù, auk'a Cristode ijãapata perã mãik'aapa ùt'aa wãdait'ee perã Tachi Ak'õrepa k'aripap'eda. Ãra mãgá pia ak'ùdaipia bù Tachi Ak'õrepa parãpa ùt'aa iidipata p'anaumerã.
Sãga p'anapataadaipia bù awaraarã ome
8 Ma awara parã jõmaarãmaa ûraait'ee auk'a k'îsia p'anapataadamerã oodait'ee Cristopa oopi bùk'a. T'ãri auk'a p'anapatáatù mãik'aapa chik'inia p'anapatáatù âpemaarã perã Cristo k'aurepa. Awaraarã chupùria k'awaa p'anapatáatù mãik'aapa audua–ee p'anapatáatù. 9 Awaraarãpa parãmaa ne–inaa k'achia oodak'ãri, auk'a oonáatù. Parãmaa ik'achia jaradak'ãri, auk'a jaranáatù. Ma k'ãyaara ãchimaa pia pedéetù mãik'aapa ùt'aa iidítù Tachi Ak'õrepa ãchi k'aripamerã. Ma–it'ee Tachi Ak'õrepa parã jùrùji, parã jida k'aripa k'inia bada perã. 10 Iru ley p'ãdade jara bù:
‘Eperã t'ãri o–îa taarã ba k'inia bù pùrã na p'ek'au eujãde, awaraarã ãpùte pedee k'achia jara amaaipia bù mãik'aapa seewa amaaipia bù. 11 Ne–inaa k'achia k'îra t'ãdoo oo amaaipia bù mãik'aapa ne–inaa pia ooipia bù. Jùrùipia bù k'ãiwee bapariit'ee jõmaarã ome. 12 Ma jõma ooipia bù Tachi Waibùapa ak'ù bapari perã ne–inaa pia oopataarã mãik'aapa ûripari perã ãrapa ùt'aa iidipata. Mamîda mãga oo–e ne–inaa k'achia oopataarã ome. Mãùrã k'aripa–epù.’ (Salmos 34.12-16)
13 Parãpa jùrùruta pùrã oodait'ee ne–inaa pia aupai, ¿k'airãpa parãmaa k'achia oodaima? 14 Mamîda awaraarãpa parã miapiruta pùjida ne–inaa pia oo p'anù k'aurepa, o–îa p'anadaipia bù. Ma miapida k'aurepa Tachi Ak'õrepa parã pia ak'ùit'ee. Mapa p'erapináatù parã jùrùpataarãmaa mãik'aapa k'îsia jõnanáatù ãchi k'aurepa. 15 Ma k'ãyaara k'irãpátù Tachi Waibùa Cristo bapari pãchi t'ãride mãik'aapa irumaa ùt'aa t'çtù. Apidaapa parãmaa iidiruta pùrã sãap'eda Cristode ijãapata, ichita p'anáutù. 16 Mamîda mãga óotù t'ãri pia, audua–ee, Tachi Ak'õre waaweepata perã. Ne–inaa pia aupaita oopatáatù. Mãga ooruta pùrã, k'îsia p'ua p'anada–e pait'ee. Ma awara parã ùmùateepataarãpa parã ãpùte pedee k'achia jaradak'ãri, awaraarãpa ãchi k'îra nejasiapidait'ee, parã wãara p'anapata perã Cristopa oopi bùk'a.
17 Piara bù miadait'ee ne–inaa pia ooda k'aurepa, mãga k'inia bù pùrã Tachi Ak'õrepa, miadai k'ãyaara ne–inaa k'achia ooda k'aurepa. 18 Ichiaba Cristo miaji piuk'ãri tachia p'ek'au k'achia oopata wêpapiit'ee. Iru p'ek'au k'achia wêe baji mîda, piuda aba piuji p'ek'au k'achia oopataarã pari, mãgá tachi ijãapataarã t'îudamerã Tachi Ak'õre ode iru ome. Eperãarãpa iru peejida. Mamîda aramata Tachi Ak'õre Jaure waya araa paji iru jaure ome. 19 Mãpai iru wãji angeleerã, chi k'achia oodap'edaarã, jâa paraa bùmaa. Jaraji mãùrãmaa irua ãchi p'oyaada piuk'ãri eperãarã k'aripait'ee atuanaadamerã. 20 Mãga jaraji mãùrãpa oodak'aa p'anadap'edaa perã Ak'õrepa oopi bùk'a, chonaarãweda Noé na p'ek'au eujãde bak'ãri. Mãùrã k'aurepa Tachi Ak'õrepa na eujãdepemaarã k'achia beerã audú miapi k'inia baji. Mamîda chooji Noepa barco choma ooru misa, aùde batauit'ee ichi ëreerã ome. Ãra ochopai p'anajida. Mamîda ma barcode bataudap'edaa perã, Tachi Ak'õrepa ãra k'aripaji k'iniinaadamerã awaraarã ome. Jaradai ma pania pëidapa k'achia beerã jõpiit'ee, Tachi Ak'õrepa Noé ichideerã ome k'aripaji chok'ai uchiadamerã. 21 Tachi Ak'õrepa ãra k'aripadak'a chok'ai uchiadamerã ma pania k'aurepa, mãga pùk'a ârá pania k'aurepa Ak'õrepa parã jida k'aripapari ichita chok'ai p'anapataadamerã iru ome. Mãga oopari parã poro choopidak'ãri paniapa. Mãga oodak'ãri, ârùpai ooda–e, ma paniapa jaik'oo pãchi k'ap'ùade sùùmerã mãik'aapa wêpapimerã. Ma k'ãyaara poro choopipata ak'ùpidait'ee Jesucristo chok'ai p'irabaida k'aurepa t'ãripa irude ijãa p'anù mãik'aapa iidi p'anù Tachi Ak'õrepa pãchia p'ek'au k'achia oopata wêpapimerã. 22 Cristo chok'ai p'irabaik'ãri, wãji ùt'aa su–ak'ù bapariit'ee Tachi Ak'õre juaraare. Mama bùde jõma na p'ek'au eujãdepema–eerã iru jua ek'ari p'anadait'ee; angeleerã mãik'aapa Netuara Poro Waibùa eere p'anùùrã paara.