SANTIAGO
Santiagopa K'art'a P'ãda Judiorã Ijãapataarãmaa
Santiago, Jerusalendepema ijãapataarã poro waibùapa na k'art'a p'ãji. Cristo chok'ai p'irabaip'eda, unupiji nãgà Santiagomaa (1 Co 15.7). Santiagopa na k'art'a p'ã pëiji judiorã Cristode ijãadap'edaarã, eujã awara–awaraade p'ananadap'edaarãmaa. Ma ijãapataarã ûraaji ichita ijãapataadamerã Cristopa k'inia bùk'a.
Salude jarap'eda, naapùara Santiagopa jara bù ijãapataarãpa jùrùdamerã k'îsia k'awaa p'anadait'ee mãik'aapa ijãa–ijãa p'ananaadamerã (cap. 1.1-18). Jara bù oopataadamerã Ak'õre Ûraade jara bùk'a; jîp'a ma ûraa ûridai k'ãyaara (cap. 1.19-27) mãik'aapa eperãarã ûk'uru piara ak'ùnaadamerã awaraarã k'ãyaara, Tachi Ak'õrepa ijãapataarã jõmaweda auk'a pia ak'ùpari perã Cristo k'aurepa (cap. 2.1-13). Jara bù k'ãata jara k'inia bù Tachi Ak'õrede ijãapari (cap. 2.14-26). Jara bù tachi k'îramede; sãga ma k'aurepa k'achiade baaidai (cap. 3.1-12). Jara bù wãara k'îsia k'awaa p'anùùrãde (cap. 3.13-18) mãik'aapa sãap'eda ijãapataarã chik'inia p'anada–e (cap. 4.1-12). Jara bù audua pedeenaadamerã (cap. 4.13-17) mãik'aapa p'arat'ara beerã ûraa bù (cap. 5.1-6). T'êepai jara bù choodamerã ãra ijãa p'anùde mãik'aapa ùt'aa t'âpataadamerã k'ayaa beerã pari (cap. 5.7-20).