Tachi Ak'õrepa k'inia bùk'a oodaipia bù
13
1 Chik'inia p'anapatáatù. Mãga p'anapataadaipia bù Cristode ijãapataarã, iru k'aurepa âpemaarã p'anadairã. 2 Parãmaa te iidi chedak'ãri, wãak'anáatù. Tachi chonaarãpa te wãak'ada–ee, t'îupipachida ãchi temãi pacherutaarãmaa. Ûk'uruurãpa k'awada–ee, angeleerã k'ãipijida.3 K'irãpátù mãik'aapa k'aripapatáatù carcelde p'anùùrã Cristo k'aurepa. Chupùria k'awáatù parã jida mãga p'aneedai perã. Ichiaba ijãadak'aa beerãpa parã k'õp'ãyoorã miapi p'anadak'ãri Cristo k'aurepa, k'aripapatáatù, parã jida mãga p'anadap'edaa perã.
4 Miak'ãi p'anùùrã awaraarã ome k'ãináatù, Tachi Ak'õrepa jara bairã chi miak'ãidapa awaraa iru baik'araa bù. Ichiaba tuu bùpa awaraarã jùrùik'araa bù mãùrã ome k'ãiit'ee. Tachi Ak'õrepa chi mãga oo p'anùùrã k'achia ooit'eeda a bù.
5 P'arat'a waibùa ichita jùrùnáatù waa k'inia #bairã. O–îa p'anátù pãchia iru p'anù omepai, Tachi Ak'õrepa jara bairã:
‘Mùa pù ak'ù amaa–e. Ewari apida ituaba atabëi–e.’ (Deuteronomio 31.8)
6 Mapa waawee–ee tachia jaradaipia bù:
‘Tachi Ak'õrépata mù k'aripapari. Mapa mùa eperãarã jua waawee–e bù.’ (Salmos 118.6)
Ijãadaipia bù naawedapema jarateepataarãpa jarateedap'edaa
7 Naawedapema jarateepataarã k'irãpátù. Mãgùùrãpa ãchi piurutamaa ijãapachida Jesucristopapai eperãarã o k'achiadeepa k'aripa atai. Mãga parãmaa pia jarateepachida, auk'a ijãa p'anapataadamerã. Mapa ãrak'a ijãapatáatù.
8 Jesucristo awara pa–e pait'ee. Naawedapemaarã o k'achiadeepa k'aripa ataji, ârapemaarã auk'a k'aripapari mãik'aapa waide t'oda–e p'anadait'eerã auk'a k'aripait'ee. 9 Parãmaa naawedapema jarateepataarãpa jarapachida Tachi Ak'õrepa Jesucristo pëiji eperãarã o k'achiadeepa k'aripa atade, tachi k'inia iru bapari perã. Ma wãara perã, t'ãripa waapùara ijãadáma irude. Ijãanáatù awaraa ne–inaa k'îra t'ãdoo jarateepataarã pedee. Mãùrãpa jara p'anù Tachi Ak'õrepa eperãarã k'aripapari k'o p'anadairã ne–animalaarã peedap'eda, paadap'edaa altarde. Mamîda mãga oo bùpa apida p'ek'au k'achia wêe bak'aa Tachi Ak'õre k'îrapite.
10 Moisepa p'ãdade jara bùk'a oo p'anùùrãpa p'oyaa k'awada–e Cristopa ãchi pari kurusode ooda. 11 Ma jara bùk'a oodak'ãri, p'aareerã poro waibùapa ne–animal waa atap'eda, ateepari ma cuarto edupùara bùde Tachi Ak'õre tede. Mãgà waa bùpari Tachi Ak'õre bùmãi eperãarã miapinaamerã ãchia p'ek'au k'achia oopata k'aurepa. Mamîda ma ne–animal peeda k'ap'ùa p'uurudeepa taawaa ateepata paadait'ee. 12 Jõdee Jesús p'uurudeepa taawaa ateejida mãik'aapa mama miapijida piurumaa. Mãgá piuda perã eperãarã pari, ãchia p'ek'au k'achia oopatap'edaa wêpapiji ichi waa bat'ada k'aurepa. Mãga ooji ãchi p'ek'au wêe p'aneedamerã Tachi Ak'õre k'îrapite. 13 Moisepa p'ãdade jara bù k'achia baji piuit'ee p'uurude taawa. Mãga baji mîda, Cristo mãgá piuji k'îra unuamaa iru p'anadap'edaa perã. Mamîda irua mãgùde k'îsia–e paji k'awa bada perã piuit'ee tachi pari. Mapa wãdáma iru ome p'uurudeepa taawaa pùk'a. Uchiadáma ma chonaarãwedapema ûraa jua ek'ariipa p'ananadait'ee ûraa chiwidi jua ek'ari, tachi k'îra unuamaa iru p'anù mîda Cristo iru p'anadap'edaak'a. K'îsiada–ee, waapùara irude ijãadáma. 14 Na p'ek'au eujãde p'uuru apida ichita ba–e pait'ee. Maperã tachia k'îsia p'anù ùt'aripema p'uuru k'îra wãreede. Mamata p'anapataadait'ee Tachi Ak'õre ome. 15 Mãpai Jesucristo mãgá piuda perã tachi pari mãik'aapa tachi k'aripapari perã, ùt'aa t'âmaa bùde ip'ii jaradáma: “Ak'õre, pù ichita t'ãri pia bapari, Jesús tai k'aripamerã pëida perã.” 16 Ichiaba k'îra atuanáatù chik'aripa p'anapataadait'ee mãik'aapa wêe beerãmaa teedait'ee pãchia iru p'anù net'aadepema, Tachi Ak'õrepa mãgata k'inia bairã. Mãga oodak'ãri, Tachi Ak'õre t'ãri o–îapidai.
17 Ma awara oopatáatù pãchi ak'ùpataarãpa jara p'anùk'a, ãchia parã ak'ù p'anadairã mãik'aapa parã k'aripa p'anadairã Tachi Ak'õre Ûraa k'awaadamerã. Ùt'aa t'âmaa p'anùde ãrápata jaradait'ee ãchia parã ak'ù p'anadap'edaa mãik'aapa parãpa oodap'edaa. Maperã oo p'anù pùrã ãchia jara p'anùk'a, ãchi o–îa p'anadait'ee Tachi Ak'õre k'îrapite, parãpa ijãapata perã. Mamîda mãga ooda–e pùrã, ãchi k'îsia p'ua p'anadait'ee iru k'îrapite.
18 Ùt'aa t'âpatáatù Tachi Ak'õremaa tai pari. Taipa k'awa p'anù irua pia p'anauit'ee. Tachi Ak'õrepa tai k'îsia p'ua k'îsiapi–e, irua oopi bùk'a oo p'anadairã mãik'aapa mãga oo k'inia p'anù jai–idaarutamaa. 19 Ichiaba mùa enenee nâbù ùt'aa t'âpataadamerã mù pari Tachi Ak'õrepa mù k'aripamerã, waya isapai wã k'inia bairã parã ak'ùde.
Na k'art'a p'ã aupak'ãri ûraada
20 Tachi Ak'õrépata tachi k'ãiwee p'anapipari. Jesús waa bat'ada k'aurepa ichia eperãarãpa p'ek'au k'achia oopata wêpapiji, mãik'aapa Jesucristo chok'ai p'irabaipiji. Maap'eda ichi ûraa chiwidi k'aurepa Cristo bùji tachi ak'ùpari waibùa, irude ijãapataarã ichita ak'ù bamerã mãik'aapa k'aripamerã, oveja ak'ùparipa ichi ovejaarã ak'ùparik'a. 21 Ùt'aa t'âmaa bùde parã pari mùa jara bù: “Ak'õre, ãra pia ak'ù baparíiji, pùa oopi bùk'a oo k'awaa wãdamerã. Tachia mãgá oodai mãik'aapa pù t'ãri o–îapidai Jesucristopa k'aripak'ãri. Ak'õre, ¡irua pù k'îra wãree ichita iru bapariit'ee! ¡Amén!”
22 Âpemaarã, mùa k'inia bù parãpa na k'art'a pia leedamerã mãik'aapa aùde jara bùk'a oodamerã. Na k'art'a mak'ùara teesoo–e bù, ne–inaa waa at'ãri p'ãi paraa perã.
23 Mùa parãmaa k'awapi k'inia bù tachi âpema Timoteo uchiaji carceldeepa. Nama mù bùmãi isapai pacheru pùrã, iru ome parã ak'ùde wãit'ee.
24 Salude téetù parã ak'ùpataarãmaa mãik'aapa awaraa Cristode ijãapataarãmaa. Italiadepema ijãapataarãpa parãmaa salude tee pëiruta.
25 Mùa ùt'aa iidi bù Tachi Ak'õrepa parã jõmaweda pia ak'ù bapariimerã.
Mãgapai paji.