SANTIAGO
Santiagopa K'art'a P'ãda Judiorã Ijãapataarãmaa
Salude pëida
1
1 Mù, Santiagopa oopari Tachi Ak'õrepa k'inia bùk'a mãik'aapa Tachi Waibùa Jesucristopa k'inia bùk'a. Na k'art'a pëiru parã Israeldeepa uchiadap'edaa ëreerã docedepema ijãapataarãmaa, t'ùmà na p'ek'au eujãde p'anù chaa. Pia p'anátù.Ijãapataarã nepùrade p'anù pùjida, o–îa p'anadaipia bù
2 Âpemaarã Cristo k'aurepa, parã nepùrade p'anadak'ãri maa–e pùrã chupùria jõnadak'ãri, waapùara Cristode o–îa ijãa p'anátù. 3 Mãgá choodak'ãri, k'awa p'anù ne–inaa k'îra t'ãdoo choodai. 4 Mãgá choo p'anù misa, ichiak'au Tachi Ak'õremaa oopítù irua k'inia bùk'a. Mãgá parãpa ne–inaa apida faltada–e pait'ee irua oopi k'inia bù parãmaa. Pia k'îsiapataadai mãik'aapa jõma pia oopataadai, irua k'aripa bairã.
5 Mamîda parãdepemapa k'awa–e bù pùrã k'ãata ooipia bù chupùria nâbùde, ùt'aa t'çji Tachi Ak'õrepa k'awapimerã. Tachia chupùria iidiruta pùrã, iru k'îrau–epù. Ma k'ãyaara k'aripait'eepù, ne–inaa jõmaade tachi k'aripa k'inia bapari perã. 6 Mapa Tachi Ak'õremaa ùt'aa t'âk'ãri, ijåaji wãara irua ooit'ee pùa iidi bùk'a. K'îsianáaji: “¿Mùa oo k'inia baik'ã irua k'inia bùk'a wa mãga–e?” Mãgee eperã k'îsia nãga bù: ara p'usa abaamãi bak'áak'ata bù. 7 Mãgee eperãpa ijãa–e Tachi Ak'õrepa ichi k'aripai. 8 Idi ne–inaa aba ijãapari mãik'aapa nu ne–inaa awaraa ijãapari. K'îra jîp'a ijãak'aa.
Chupùria beerã p'arat'ara beerã ome
9 Piara k'awaadamerã sãga oodaipia bù chupùria jõnùde, parãmaa nãga nepùrùit'ee. Ijãapari aba chupùria bù pùrã p'arat'a wêe, o–îa baipia bù Tachi Ak'õrepa iru auk'a pia ak'ùpari perã apemaarã ijãapataarãk'a. Ma awara o–îa baipia bù ùt'ari banait'ee perã. 10 Jõdee ijãapari p'arat'ara bù o–îa baik'araa bù p'arat'ara bairã. Eperã p'arat'ara bù taarã chook'aa, nep'ono ewaraade bùk'a. 11 Mãgee nep'ono pi–ia bù t'ok'ãri tap'eda. Mamîda aù ârù ak'õrejîru jêra nâbeek'ãri, pùùdaipari wãsiapa. Taarã–e nùde ma nep'ono pi–ia jõdaipari. Mãga pùk'a bù eperã p'arat'ara bee. Mimia oomaa p'anùde pida, jõma ãchia iru p'anù jõdarii.
Tachi Ak'õrepa k'îsia k'achia k'îsiapik'aa
12 Tachi Ak'õrepa o–îapipari eperã chupùria nâbùde maa–e pùrã nepùrade nâbùde, chook'ãri Cristode ijãa bairã. Mãgá chook'ãri, Tachi Ak'õrepa ma eperãmaa ùt'aripema poro jâra teeit'ee; pia jarait'eera, ichita ichi ome bapiit'ee. Ichia mãga oopari jõma ichi k'inia iru p'anùùrã ome, chonaarãweda mãga jarada perã. 13 Mamîda mãgá nepùrade jõnùde abaapa k'îsiaru pùrã k'achia ooit'ee, jaraik'araa bù: “Tachi Ak'õrépata mãga oopi bù”. Mãga jaraik'araa bù Tachi Ak'õrepa k'îsiak'aa perã ne–inaa k'achia ooit'ee. Ma awara eperãmaa mãga k'îsiapik'aa. 14 Jîp'a tachi t'ãrideepata k'îsia k'achia uchiapari. Maap'eda ne–animal trampade t'îuparik'a carnada k'oit'ee, mãga pùk'a eperã ichia k'îsia k'achia #badak'a? oo k'iniadaik'ãri, 15 ma ne–inaa k'achia oopari. Chi mãga ooyaa bù atuait'ee.
16 Maperã âpemaarã k'iniarã, pãchi itu k'ûrapináatù. K'îrak'aupai k'îsiadai Tachi Ak'õrepa k'îsiapii ne–inaa k'achia ooit'ee. 17 Mãga–epù. Tachia ne–inaa pia jõmaweda iru p'anù Tachi Ak'õre k'aurépata iru p'anù. Irua ooji ak'õrejîru, atane mãik'aapa lucero. Mãgà edaare âdaapata, edaare âdaadak'aa. Tachi Ak'õre mãga bada paara, edaare k'îsiapik'aji k'achia ooit'ee; edaare k'îsiapik'aji pia ooit'ee. Mamîda mãga–e. Ichita pia oopari. 18 Mãgá pia oopari perã, apemaarãpa irude ijãadai naaweda, tachi judiorãmaa k'awapiji ichia wãarata jara pëida, ma ûraa wãarade ijãadap'eda, atuanaadamerã. Mãga ooji k'inia bairã ichi k'îrapite pia nipadamerã.
Tachi Ak'õre Ûraa ûripataarãpa oopata
19 Âpemaarã k'iniarã, Tachi Ak'õrepa mãga ooda perã tachi–it'ee, k'ùùrù êesaa p'anátù iru ûraa ûridamerã. Mamîda pia k'îsíatù pedeedai naaweda. Ma awara isapai k'îraunáatù. 20 Mùa mãga jara bù chi isapai k'îrauyaa bùpa ook'aa perã Tachi Ak'õrepa k'inia bùk'a. 21 Maperã k'achia k'îra t'ãdoo k'îsia amáatù. P'ananáatù naaweda p'anapatap'edaak'a, waide ijãada–e p'anadak'ãri. Ma k'ãyaara audua–ee óotù Tachi Ak'õrepa k'inia bùk'a. Ichiaba k'îsiapatáatù irua wãarata jara pëidade, ma k'aurépata ijãapata perã mãik'aapa ùt'aa wãdait'ee perã.
22 Mãga ooda–e pùrã, pãchi k'inia ijãa p'anàk'ata bù. Mùa mãga jara bù ûk'uruurãpa k'îsiadai perã Tachi Ak'õre Ûraa ûri bùpapai oo p'anù irua k'inia bùk'a. Mamîda pãchi itu k'ûrapi p'anù. Tachi Ak'õre Ûraa ûridak'ãri, oodaipia bù irua jara bùk'a. 23 Chi mãga oo–e bùpa ara eperãpa espejode ichi k'îra ak'ùparík'ata bù. 24 Jãgà eperã espejode ak'ù bak'ãri, ichi k'îra pia unupari. Mamîda ma espejodeepa ãyaa wãk'ãri, espejode unuda k'îra atuadaipari. 25 Mãga pùk'a bù eperã ome Ak'õre Ûraa ûrik'ãri. Ûrii Tachi Ak'õrepa ichimaa oopi k'inia bù. Mamîda, aù t'êepai ichia ûrida k'îra atuadaru pùrã, oo–e pai Tachi Ak'õrepa k'inia bùk'a. Jõdee chi ooparipa Tachi Ak'õrepa k'inia bùk'a nãga bù. Tachi Ak'õrepa Ûraa Pia jara pëida Cristode ûrik'ãri, aùde k'îsia wãpari mãik'aapa Cristode ijãapari. K'îra atua–ee mãgà jara pëida, Cristópata k'aripapari perã ichia oomerã ma ûraade jara bùk'a. Mãga ook'ãri, t'ãri o–îa bapariit'ee.
26 Eperãpa k'îsiai Tachi Ak'õrepa k'inia bùk'a oo bù, ùt'aa t'âpari perã maa–e pùrã Tachi Ak'õre–it'ee net'aa teepari perã. Mamîda ik'achia pedeeru pùrã awaraarã ãpùte maa–e pùrã audua pedeeru pùrã, ichi itu k'ûramaa bù, wãara Tachi Ak'õrepa oopi k'inia bùk'a oo–e bairã. 27 Wãara Tachi Ak'õrepa k'inia bùk'a ooparipa ooamaa bapari ijãadak'aa beerãpa k'achia oopata k'îra t'ãdoo. Ma awara k'aripapari ak'õre wêe beerã mãik'aapa p'êtrãa beerã ãchi chupùria jõnùde.