HEBREOS
K'art'a P'ãda Hebreo Pedee Pedeepataarãmaa
K'awada–e p'anù k'aipa nãgà k'art'a p'ãji. Tachi Ak'õre Ûraa p'ãda pia estudia beerã ûk'uruurãpa k'îsia p'anù Pablopa p'ãda; awaraarãpa k'îsia p'anù Bernabepa p'ãda; awaraarãpa Apolopa p'ãda. Mamîda jõmaarãpa k'îsia p'anù nãgà ûraa p'ãji judiorã Cristode ijãadap'edaarã–it'ee. Jõmaweda judiorãpa hebreo pedee pedeepatadap'edaa perã, nãgà p'ãda t'â bùjida Hebreos. Nãgà ûraa p'ãji ûk'uru judiorã Cristode ijãapataarãpa ijãa amaadait'ee k'îsia p'anadap'edaa perã, jîp'a naawedapemak'a ijãapataadait'ee chonaarãwedapema Moisepa p'ãdade. Chi na ley p'ãdapa jara bù mãga oonaadamerã, Jesucristo jõmaarã k'ãyaara waibùara bairã.
Naapùara k'irãpapi bù k'aita Jesucristo; chi Tachi Ak'õre k'îra wãree unupida (cap. 1.1-3). Jara bù Tachi Ak'õre k'îrapite Cristo waibùara bù angeleerã jõmaarã k'ãyaara (caps. 1.4--2.18) mãik'aapa Moisés k'ãyaara (cap. 3.1-6). Ûraa bù k'ùùrù k'isua p'ananaadamerã ãchi chonaarãk'a; ma k'ãyaara k'ãiwee p'anapataadamerã Cristode ijãa p'anùde (caps. 3.7--4.13). Jara bù Jesús tachi ijãapataarã ùt'aripema P'aareerã Poro Waibùa (caps. 4.14--5.10) mãik'aapa ûraa bù Cristode ijãa amaanaadamerã, ma k'aurepa atuadai perã (caps. 5.11--6.12). K'irãpapi bù Tachi Ak'õrepa Cristode ijãapataarã pia ak'ùpari (cap. 6.13-20). Jara bù Jesús chonaarãwedapema p'aare poro waibùa Melquisedec jîak'a (cap. 7) mãik'aapa iru k'ap'ùa pari Tachi Ak'õrepa ûraa chiwidi eperãarãmaa jara pëida awara bù, chonaarãwedapema ley p'ãda k'ãyaara (cap. 8). Jara bù ùt'aripema Ak'õre Waibùa tede mãik'aapa jara bù Cristopa waa bat'ada k'aurepa Tachi Ak'õrepa eperãarãpa p'ek'au k'achia oopata wêpapiit'ee (caps. 9.1--10.18). Jara bù Cristode ijãapataarãpa p'ek'au k'achia oo amaadaipia bù mãik'aapa iru k'ap'ùa pari Tachi Ak'õre k'ait'a wãdaipia bù ùt'aa t'â p'anùde (cap. 10.19-39). K'irãpapi bù Tachi Ak'õrepa chonaarãwedapema ijãapataarã pia ak'ùda, irua jaradade ijãapatap'edaa perã mãik'aapa oopatap'edaa perã irua k'inia bùk'a (cap. 11). Jara bù Cristode ijãapataarã jîp'a ijãapataadamerã ãchi piurutamaa (cap. 12). T'êepai ûraa k'îra t'ãdoo jarap'eda, jara bù ichia k'inia bù Cristopa ãra pia oomerã mãik'aapa k'aripamerã (cap. 13).