FILEMÓN
San Pablopa K'art'a P'ãda Filemonmaa
Salude pëida
1
1 Mù, Pablo carcelde bù mùa oopari perã Jesucristopa oopi bùk'a. Mù tachi âpema Cristo k'aurepa Timoteo ome na k'art'a p'ã pëiruta Filemonmaa. Filemón, pù k'inia iru p'anùpù, auk'a Cristode ijãapari perã mãik'aapa auk'a iru–it'ee mimiapari perã. 2 Ichiaba na k'art'a p'ã pëiruta tachi âpewêra Apiamaa mãik'aapa tachi âpema Arquipomaa. Ijãadak'aa beerãpa nepùra jùrù p'anù mîda iru ome, taik'a iru choopari Cristode ijãa bairã mãik'aapa oomaa bairã Cristopa oopi bùk'a. Ichiaba p'ã pëiruta jõmaweda ijãapataarã pù tede ùt'aa t'â chepataarãmaa. 3 Ùt'aa iidipata Tachi Ak'õrepa mãik'aapa Tachi Waibùa Jesucristopa parã pia ak'ù p'anadamerã. Mãgá k'ãiwee p'anapataadait'ee.Filemonpa awaraa ijãapataarã k'inia iru bapari
4 Filemón, mùa ùt'aa t'âk'ãri pù pari, ichita gracias jarapari mù ùt'aripema Ak'õremaa. 5 Ûridoo pù wãara ijãapari Tachi Waibùa Jesude mãik'aapa iru k'inia iru bapari. Ichiaba ûridoo pùa jõma ijãapataarã k'inia iru bapari. 6 Pù mãgá chik'inia bapari perã tachi ijãapataarã ome, mùa ùt'aa iidipari Tachi Ak'õrepa pùmaa k'awapimerã ne–inaa pia jõma tachi Cristodeerãpa oodai irua k'aripak'ãri. 7 Mù âpema Cristo k'aurepa, mù o–îa bù pùa awaraarã mãgá k'inia iru bapari perã. Mãga oo bùpa pùa mù t'ãri mãik'aapa awaraa Cristodeerã t'ãri o–îapipari.
Pablopa chupùria iidida<R>Filemón esclavo Onésimo pari
8 Pù mãga bapari perã, mùa ne–inaa iidi k'inia bù pùa mù–it'ee oomerã. Pùa nãga ooipia bù, ne–inaa pia bairã. Ma awara Cristopa mù jùrùt'erada perã, mùa waawee–ee na iidiru oopii pùmaa. 9 Mamîda k'awa bairã pùa jõma ijãapataarã k'inia iru bapari, mùa pùmaa chupùria iidiit'ee. Taawa pùa ûrii mùa iidiru, mù chonaa bairã mãik'aapa na carcelde bairã Jesucristopa oopi bùk'a oopari k'aurepa. 10 K'inia bù pùa auteebaimerã eperã nama bù mù ome. Iru mùchi warrak'a bù, mù k'aurepa iru Cristode ijãada perã mù nama carcelde bù misa. Na eperã pù esclavo iru bada, Onésimo.a
11 Mùa k'awa bù naaweda irua pù k'aripa–e paji. Mamîda ârá mãga–e bù. Ârá audú chok'ek'ee bapari mù ome. Mùa k'awa bù auk'a bait'ee pù ome. 12 Mùa iru pùmaa pëiru. Iru audupai k'inia iru bù. Mapa k'inia bù pùa iru auteebaimerã mù auteebaik'ajik'a. 13 Mùa k'inia bak'aji iru mù ome beemerã, mù nama carcelde bù misa, Jesupa ooda jarateeda k'aurepa. Mãgá irua mù k'aripak'aji pù pari. 14 Mamîda mãga oo–e paji, pùa jara–e pada perã iru nama baipia bù mù ome. Mùa k'inia–e pùa iru auteebaimerã mùa mãga oopiru perã. Pùa mù mãgá k'aripa k'inia bù pùrã, k'aripaipia bù pùchi k'îradoopa.
15 K'îsíaji nãgùde. Onésimo mak'ùara taarã–e baji pù ik'aawaapa uchiada. ¿Tachi Ak'õrepa iru mãgá wãpiji–ek'ã #Xaji,X Cristode ijãap'eda, ârá pù ome ichita bapariimerã? 16 Ma awara ârá iru auteebairu pùrã, iru pipùara bai esclavo k'ãyaara. Pù âpema pia bait'ee auk'a Cristode ijãa bairã. Mùa iru k'inia iru bù. Mamîda pùa iru audupùara k'inia iru baipia bù, iru chok'ek'ee bairã mãik'aapa iru pù âpema Cristo k'aurepa perã.
17 Mãpai pùa mù iru bù pùrã pùchi k'õp'ãyo piak'a, Onésimo auteebáiji mù auteebaik'ajik'a. 18 Irua pùmaa ne–inaa k'achia ooji pùrã maa–e pùrã pù net'aa chùaji pùrã, jara pïiji. Mùa p'aait'ee. 19 Mù, Pablopa nãgà p'ãru mùchi juapa: mùata p'aait'ee. Mamîda mùa pùmaa nãga k'irãpapi k'inia bù. Onésimo pù ome tewe iru bai k'ãyaara, pùa tewe waibùara iru bù mù ome, mù k'aurepa pùa Cristode ijãada perã. 20 Maperã âpema, ârá mùa k'inia bù pùa jõdee mù k'aripamerã, Tachi Waibùapa pùmaa oopi k'inia bùk'a. Chupùria k'awáaji mãik'aapa Onésimo auteebáiji. Mãgá pùa mù t'ãri o–îapiit'ee.
21 Mùa ijãa bù pùa ooit'ee mùa iidi bùk'a. Mapa na k'art'a pùmaa p'ãmaa bù. Wãara mùa k'îsia bù pùa waapùara ooit'ee mùa iidida k'ãyaara. 22 Mãga oo bù misa, cuarto awara bàji mù–it'ee, mù jãma panak'ãri. Mùa mãga jara bù ijãa bairã parã ùt'aa t'âpata k'aurepa Tachi Ak'õrepa mù uchiapiit'ee na carceldeepa mãik'aapa waya pëiit'ee parãmaa.
Awaraarãpa salude tee pëidap'edaa
23 Tachi k'õp'ãyo Epafras ichiaba nama carcelde bù mù ome, Jesucristopa oopi bùk'a oopari perã. Irua pùmaa salude tee pëiru. 24 Marcos, Aristarco, Demas mãik'aapa Lucapa salude tee pëiruta. Ãra mù ome auk'a mimiapata Cristo–it'ee.
25 Mùa ùt'aa iidi bù Tachi Waibùa Jesucristopa parã jõmaweda pia ak'ù bapariimerã.
Mãgapai paji.