Sãgá awaraarã ak'ùdaipia bù
2
1 Âpemaarã, parãpa k'awa p'anù net'aa jõma Tachi Waibùa Jesucristo jua ek'ari nâbù. Iruata Tachi Ak'õre k'îra wãree iru bù. Mãga k'awa p'anùta mãik'aapa irude ijãa p'anùta, ¿sãap'eda parãpa aba k'iniara iru p'anapatama apemaarã k'ãyaara? Tachi Ak'õrepa mãga oopik'aa. 2 ¿Sãga pak'ajima parãpa mùa jararuk'a oodap'edaa paara? Parã cheepurudak'ãri ùt'aa t'âdait'ee, pachei aba p'arat'ara bù mãik'aapa aba chupùria bù. 3 Chi p'aru pi–ia jâ bù mãik'aapa sortija nêedee jâ bù pipùara ak'ùdai chi p'aru sore jâ bù k'ãyaara. Jaradai ma p'arat'ara bùmaa: “Nama su–ak'ù ba chéji su–ak'ù beepata pipùara bùde.” Jõdee ma chupùria chùmaa jaradai: “Jãma bainâ banáji, maa–e pùrã jãma su–ak'ù banáji.” 4 Mãga oodap'edaa paara, Tachi Ak'õrepa k'inia bùk'a ooda–e p'anak'ajida. Mapa parãpa mãgá oo p'anù pùrã, pia ooda–e p'anù. Cristo Tachi Waibùada a p'anù mîda, jara p'anù chisãgùta k'iniadaipia bù apemaarã k'ãyaara. Mãga oodak'ãri, k'achia k'îsia p'anù.5 Âpemaarã k'iniarã, ¡ûrítù! Tachi Ak'õrepa audú jùrùt'erajipù chupùria chedeerã, Cristode ijãadap'eda, o–îa p'anapataadamerã na p'ek'au eujãde, k'awa p'anadairã irua ãchi k'aripapari. Ma awara ãchi jùrùt'eraji ùt'aa wãdamerã. Tachi Ak'õrepa mãga oopari ãchi–it'ee mãik'aapa jõma iru k'inia iru p'anùùrã–it'ee, chonaarãweda mãga jarada perã. 6 Tachi Ak'õrepa mãgá chupùria beerã jùrùt'eraji mîda, parãpa p'arat'ara beerã pipùara ak'ùpata chupùria beerã k'ãyaara. ¿K'awada–e p'anùk'ã p'arat'ara beeråpata parã chupùria oo iru p'anapata mãik'aapa charraarã k'îrapite atadaipata? 7 Ma awara ãchia Jesucristo t'â ichi k'inia ik'achia jarapata. Mãga oopata Tachi Waibùa Jesucristopa jõmaarãmaa pia oopari mîda. ¡Iru t'âdeta parã poro choopijida! Mãga bùta, ¿sãga ãrata pipùara ak'ùdaima chupùria beerã k'ãyaara?
8 Ma k'ãyaara oodaipia bù Tachi Ak'õrepa ûraa waibùara bùde jara bùk'a ichi ûraa p'ãpidade:
‘Awaraarã k'inia iru baparíiji pùchi k'ap'ùa k'inia iru baparik'a.’ (Levítico 19.18)
9 Mãgá parãpa eperãarã ûk'uru ak'ù p'anù pùrã pãchi k'ap'ùa ak'ùpatak'a, mamîda mãga ooda–e p'anù pùrã jõmaarã ome, k'achiata oomaa p'anù Tachi Ak'õre k'îrapite. Mãgá oodak'ãri, ooda–e p'anù iru ley p'ãdade jara bùk'a. 10 Eperãpa Tachi Ak'õrepa Ûraa jaradadepema aba oo–e pùrã, ichita iru ûraade jara bùk'a jõmaweda oo–e bù. 11 Iruata jaraji:
‘Miak'ãi bù awaraarã ome k'ãináaji.’
Ichiaba jaraji:
‘Eperã peenáaji.’(Éxodo 20.13-14)
Mapa awaraa jùrù–e pùjida, eperã peeru pùrã, ichita oo–e bù jõmaweda Tachi Ak'õrepa jara bùk'a. 12 Mamîda parãpa Cristode ijãadak'ãri, ma ley p'ãda jua ek'ariipa uchiajida. Mapa parãpa pia pedeedaipia bù awaraarãde mãik'aapa jõmaarã auk'a ak'ùdaipia bù, ewari cherude Tachi Ak'õrepa ak'ùit'ee perã ichide ijãapataarãpa oopatap'edaa mãik'aapa pedeepatap'edaa. Mãgá k'awaait'ee ichia jaradak'a oojida wa ooda–e paji. 13 Mãgá Tachi Ak'õrepa na p'ek'au eujãdepemaarãpa oopatap'edaa ak'ùk'ãri, chupùria k'awa–e pait'ee awaraarã chupùria k'awada–e p'anadap'edaarã. Jõdee chupùria k'awaait'ee awaraarã chupùria k'awaadap'edaarã. Mãùrã o–îa uchiadait'ee iru k'îrapite, oodap'edaa perã irua jaradak'a.
Tachi Ak'õrede wãara ijãapataarãpa oopata irua k'inia bùk'a
14 Mãpai âpemaarã, k'îsíatù mùa jararude. Eperãpa Tachi Ak'õrede ijãa bùda ai. Mamîda mãgùpa chîara k'aripak'aa pùrã Ak'õrepa oopi k'inia bùk'a, ichi k'inia mãga jara bù. Mãga jara bùpapai ùt'aa wã–e pait'ee. 15 Pia jarait'eera, ijãapari abaapa unuru pùrã awaraa ijãapari p'aru wêe bù jîsua–it'ee, mãik'aapa chik'o wêe bù k'oit'ee, ¿sãgak'ajima nãga jarada paara? 16 “P'aru mõtaapa pùra béeji jîsuapiamaapa mãik'aapa nek'óji bi jãwaa beerumaa. Maap'eda pia wåji Tachi Ak'õre ome.” Mãga jara bùde maarepida tee–e pùrã ma ijãapari chupùria chùmaa, ¿k'ãare piata baima? Ichi k'inia mãga jaraji. 17 Mãga pùk'a bù chi jara bùpa: “Mùa Tachi Ak'õrede ijãapari.” Mamîda mãgà eperãpa ook'aa pùrã Tachi Ak'õrepa jara bùk'a ichi ûraade, ma eperãpa ichi k'inia mãga jara bù.
18 Ewaa eperãpa jarai: “Pùa Tachi Ak'õrede ijãa bù mãik'aapa mùa ne–inaa oopari irua jara bùk'a. Mamîda pùa ne–inaa oo–e pùrã irua jara bùk'a, mãgara wãara ijãa–e bù. Jõdee mùa mãgá irua jara bùk'a oopari perã, pùa k'awaai mùa wãara ijãa bù.” 19 K'awa bù pùa ijãa bù Tachi Ak'õre apai. Wãarapù, mamîda mãga ijãa bùpa tachi ùt'aa wã–e pait'ee. Netuaraarãpa ichiaba mãga k'awa p'anù. Mamîda p'era p'anapata k'awa p'anadairã Tachi Ak'õrepa ãchi k'achia ooit'ee. 20 Pariatua k'îsianáaji. Ma k'ãyaara óoji Tachi Ak'õrepa oopi bùk'a. K'awáaji wãara Tachi Ak'õrede ijãa bùpa oopari irua oopi bùk'a. 21 Chonaarãweda auk'a mãga paji. Tachi chonaarãwedapema Abrahampa ichi warra ateeji ee nok'ode bùit'ee altar ârù mãik'aapa peeit'ee Tachi Ak'õre–it'ee, Tachi Ak'õrepa irumaa mãga jarada perã. Mãgá Abrahampa chi warra wãak'a–e pada perã, wãara p'ek'au k'achia wêe beeji Tachi Ak'õre k'îrapite. 22 Aù naaweda Abrahampa Tachi Ak'õrede ijãaji. Mamîda ichia ook'ãri Ak'õrepa jaradak'a, ak'ùpiji wãara ijãa bù. 23 Ma awara mãga ook'ãri, wãara uchiaji Tachi Ak'õre Ûraa p'ãdade jara bùk'a:
‘Abrahampa Tachi Ak'õrepa jarada ijãaji. Maperã Tachi Ak'õrepa iru pia ak'ùpachi.’ (Génesis 15.6)
Abrahampa ichia wãara ijãada mãgá ak'ùpida perã, Tachi Ak'õre k'õp'ãyoda apachida.a
24 Mãpai âpemaarã, Tachi Ak'õrepa mãga ooda perã Abraham ome, parãpa k'awa p'anù Tachi Ak'õrepa p'ek'au k'achia wêe ak'ùpari eperã irude wãara ijãa bù mãik'aapa irua jara bùk'a oo bù. Mamîda mãgá ak'ù–epù eperã irude ijãa bùda apari, mãgùpa oo–e bù pùrã irua jara bùk'a.
25 Tachi Ak'õrepa Abraham ome oodak'a ichiaba ooji Rajab ome. Mãgà prostituta baji. Mamîda israelitaarã chedak'ãri iru baparimãi ma p'uuru ak'ùde, irua ma israelitaarã k'aripaji ichi auk'aarãpa jita atanaadamerã. Mãga ooji Tachi Ak'õrede ijãa bada perã. Mãgá ooda perã mãik'aapa wãara ijãada perã, Tachi Ak'õrepa mãgà wêra p'ek'au k'achia wêe ak'ùji. 26 Mãpai ma jõma jara aupadade k'îsiadak'ãri, parãpa k'awaadai Tachi Ak'õrede ijãa bùda aparipa ook'aa pùrã irua jara bùk'a ichi ûraade, wãara ijãa–e bù. Iru tachi piuda k'ap'àak'ata bù.