Pariatua pedeedaik'araa bù
3
1 Âpemaarã, parãdepema Ak'õre Ûraa jarateepari pa k'inia bù pùrã, k'awaaipia bù apemaarã ijãapataarãpa oopatap'edaa ak'ùi k'ãyaara, Tachi Ak'õrepa taipa oopatap'edaa audupùara ak'ùit'ee jarait'ee pia wa k'achia. Mãgá irua k'awaait'ee taipa jarateedap'edaak'a p'anapachida wa mãgá p'anadak'aa paji. 2 Mãga jara bù tai chi jarateepataarãpa chîara k'îraupidai perã taipa jarapata k'aurepa. Wãara tachi ijãapataarã jõmaarãpa edaare mãga oopata mãik'aapa awaraa ne–inaa k'achia pariatua oopata. Eperã pada paara chîara k'îraupik'aa ichi pedeepa, mãgùpa awaraa ne–inaa k'achia apida ook'aa pak'aji.3 K'îsiadáma nãgùde. Ne–inaa ma–ãri hierrodee ooda caballo it'aide bùpata. Mãgùpa wãpipata chi wãpi k'iniamaa. 4 Ichiaba barco choma tok'esaa wãk'ãri, nãupa golpe p'ua nâbù mîda ãyaa wãpiit'ee, ma barco p'eraparipa ichia atee k'iniamaa ateepari chi timonpa. Mãga oopari ma barco k'ãyaara timón ma–ãriara bù mîda. 5 Mãga pùk'a bù tachi k'îrame ome. Tachi k'ap'ùade ma–ãri bù mîda, mãgùpa ne–inaa k'îra t'ãdoo audua jarapata eperãarãpa. Ma awara k'awa p'anù t'ùpùtau ma–ãriipa eujã ãree paat'aai. 6 Ma t'ùpùtáuk'ata bù tachi k'îrame. Tachi k'ap'ùade ma–ãri bù mîda, nepùra waibùade baaipipari mãik'aapa ne–inaa k'achia oopipari, madeepa na p'ek'au eujãdepema pedee k'achia k'îra t'ãdoo uchiapari perã. Ma awara madeepa netuarapa pedeepida uchiapari. Mapa k'awa p'anù tachi k'îramepa mãgá nepùrade baaipipariit'ee tachi t'oruwedapema piurumaa.
7 K'awa p'anù eperãarãpa taunomaapata nãgee ne–animalaarã mêepema k'îra t'ãdoo: wãabaipata; eujãde nîuteepata; eujãde bipa urt'îu nîuteepata; p'usa jãdepema; jãgee. 8 Mãga oopata mîda ne–animalaarã ome, apidaapa ãchi k'îradoopa k'îrame p'oyaa t'ùdùk'adak'aa. Mãga p'oyaada–e tachi k'îramedeepa pedee k'achia k'îra t'ãdoo pariatua uchiapari perã. Madeepa uchiada pedee k'achia neera k'achíak'ata bù, chîara miapipari perã.
9 Tachi k'îramepa pedee pia jarapari Tachi Ak'õremaa ùt'aa t'âdak'ãri. Mamîda mãgùpa ichiaba ik'achia pedee jarapari chîaramaa. Mãgá pedee k'achia jaradak'ãri awaraarãmaa, ik'achia jara p'anàk'ata bù Tachi Ak'õremaa, irua eperãarã jõma ooda perã. 10 Âpemaarã, Tachi Ak'õrede ijãapataarã it'aideepa pedee pia pedee k'achia ome mãgá uchiaik'araa bù. 11 Pania poátrù uchia bùmãi eujã ek'ariipa asia naap'ee ome uchiak'aapù. Ichiaba pania k'ùyaa uchiaparimãiipa naap'ee uchia–epù. 12 Ma awara higuera bùùrùdeepa orodak'aa olivo, mãik'aapa uva k'arradeepa p'edak'aa higojõ. Mapa âpemaarã, Tachi Ak'õrede ijãapataarãpa pedee k'achia k'îra t'ãdoo jaradaik'araa bù; jîp'a pia aupaita jarapataadaipia bù.
Wãara k'îsia k'awaa beerã
13 Parãdepema k'îsia k'awaa bù pùrã, k'awaa wãipia bù ooit'ee Tachi Ak'õrepa k'inia bùk'a mãik'aapa mãga ak'ùpiipia bù apemaarãmaa. Chîara ome t'ãri pia baipia bù mãik'aapa k'aripaipia bù, audua–ee. Mãgata p'anapata wãara k'îsia k'awaa beerã. 14 Mamîda mãga p'anapataadai k'ãyaara, parãpa Tachi Ak'õre Ûraa jaratee k'inia p'anù pùrã apemaarã k'ãyaara waibùara pa k'iniapa, wãara Tachi Ak'õre–it'ee k'îsia atua p'anù, irua mãga oopik'aa perã. 15 Chi mãgá k'îsia p'anùùrã ijãadak'aaråk'apù k'îsiapata, ãchia oo k'iniata oo k'inia p'anadairã. ¡Netuarápata mãgá k'îsiapipari! 16 Eperã aba waibùara pa k'inia bak'ãri apemaarã k'ãyaara, jõmaarãpa ichi pedee aupai ûridamerã, nãgee ne–inaa k'achia k'îra t'ãdoo ooi: nepùra jùrùyaa bai, pedee audua bai, maa–e pùrã apemaarã k'aripak'aa bai. 17 Mamîda chi wãara k'îsia k'awaa bù Tachi Ak'õrepa k'inia bùk'a mãgá nipak'aapù. Ne–inaa awaraa k'ãyaara jõma oopari oo k'inia bairã Tachi Ak'õrepa oopi bùk'a. Nepùra jùrùk'aa chîara ome; jîp'a k'ãiwee bapari. Chîara k'îrau chok'ak'aa mãik'aapa pia ûripari ne–inaa iidide chedak'ãri. K'îrau–ee oopari ichi poropa oopi bùk'a. Awaraarã chupùria k'awaapari mãik'aapa k'aripapari. Eperã aba pipùara ak'ùk'aa apemaarã k'ãyaara. Oopari ichia jara bùk'a; seewata ne–inaa ook'aa. Mãgee ne–inaa k'îra t'ãdoo oopari chîara k'aripait'ee. 18 Chi mãga ooparipa k'inia bapari jõmaarã k'ãiwee p'anapataadamerã ichik'a, Tachi Ak'õre k'îrapite mãik'aapa apemaarã k'îrapite. Mapa pia nipapari. Mãgá ichi ik'aawa p'anùùrã iruk'a p'ana k'iniadaipù.