4
1 Ma k'îsia k'awaa bù mãga bapari mîda, parãdepema chok'ara k'ãiwee p'anadak'aa. ¿Wãara–ek'ã? Aupedee para bapari mãik'aapa k'îrau para bapari, pãchi t'ãride k'îsia k'achia iru p'anadairã. ¿K'ãare k'aurépata mãga para bapari? ¿Pãchia oo k'inia p'anù k'aurepa–ek'ã?Tachi Ak'õrepa jara bùk'a oodak'aarã
2 Nãga oo p'anù. Parã waibùara pa k'inia p'anapata apemaarã k'ãyaara maa–e pùrã chîara net'aa k'âapata. T'êepai ma net'aa p'oyaa atada–e pak'ãri, ma net'aa chipari k'îra unuamaa iru p'aneepata, peet'aa k'iniadarutamaa. Mãga oo p'anù mîda, atadak'aa parãpa k'inia p'anù, Tachi Ak'õremaa iididak'aa perã. 3 Jõdee Tachi Ak'õremaa iididak'ãri, pãchi–it'ee aupaita iidipata. Mapa Tachi Ak'õrepa teek'aa pãchia iidi p'anù, mãgá k'achia iidi p'anadairã. 4 Pãchia oo k'iniata oo k'inia p'anadairã, Tachi Ak'õrepa jara bùk'a oo k'iniada–e. Ara wêrapa chi k'ima amaaparik'a awaraa ome banait'ee, mãga pùk'a parãpa oodaamaa p'anù ne–inaa Tachi Ak'õrepa oopi bù, oonadait'ee irude ijãadak'aa beerãpa oopatak'a. ¿K'awada–e p'anùk'ã mãga oodak'ãri, t'îu p'anù Tachi Ak'õre k'îra unuamaa iru p'anapataarã eere? 5 ¿K'ãata k'îsia p'anùma? ¿Tachi Ak'õrepa ichi ley p'ãdade nãga pariatua jara bùk'ã?
‘Mùa jaure bùda eperã k'ap'ùade k'inia bù mùchi–it'ee.’a (Deuteronomio 4.24)
¡Tachi Ak'õrepa pariatua mãga jara–e paji! 6 Mãga jaraji tachi pia ak'ù k'inia bairã mãik'aapa k'aripa k'inia bairã. Mamîda wãara k'inia p'anù pùrã irua mãga oomerã, pãchia k'inia p'anù oo amaadaipia bù mãik'aapa irua jara bùk'a oodaipia bù. Mãga k'awa p'anù iru ley p'ãdade jara bairã:
‘Tachi Ak'õrepa k'aripa–e audua p'anapataarã, mamîda t'ãri pia k'aripapari audua–ee beerã.’ (Proverbios 3.34)
7 Mapa âpemaarã, oopítù Tachi Ak'õremaa irua oo k'inia bùk'a pãchi t'ãride mãik'aapa pãchi k'îsiade. Ma awara netuarapa k'îsia k'achia k'îsiapik'ãri, oonáatù ichia k'inia bùk'a. Ma k'ãyaara chóotù mãik'aapa Tachi Ak'õremaa ùt'aa t'çtù. Mãgá oodak'ãri, ma netuara ãyaa wãit'ee. 8 Parãdepema ne–inaa k'achia oo p'anùùrãpa jarátù Tachi Ak'õremaa jõma k'achia oodap'edaa, irua mãgà wêpapik'oomerã. Maap'eda k'achia k'îra t'ãdoo oo amáatù. Mãga ooruta pùrã, irumaa ùt'aa t'âdak'ãri, irua waya ûriipù. Ichiaba pariatua k'îsia p'anùùrãpa mãga oodaipia bù. Mãgeerã eda k'îsiapata “mùa ooit'ee Tachi Ak'õrepa oopi bùk'a” mãik'aapa eda k'îsiapata “mùa ooit'ee mùchia oo k'iniata”. Tachi Ak'õrepa mãgá pariatua k'îsiapik'aa. 9 Parã wãara pia nipa k'inia p'anù pùrã Tachi Ak'õre k'îrapite, k'îsíatù pãchia oopatap'edaade. Maap'eda k'îsia p'ua p'anátù. Ëidai k'ãyaara, t'ãri p'ua p'anátù mãik'aapa jèetù, pãchia k'achia oopatap'edaa k'aurepa. 10 Mãga ooruta pùrã, Tachi Ak'õremaa ak'ùpidai wãara oo k'inia p'anù irua jara bùk'a. Ma awara mãgá oodak'ãri, irua parã pia ak'ùi.
Ak'ùdaik'araa bù chîarapa oo p'anù<R>ma t'êepai ãra ãpùte ik'achia jarait'ee
11 Mamîda âpemaarã, k'îrak'aupai chîara ãpùte pedee k'achia pedeedai, k'îsia p'anadairã ãchia ooda–e p'anù Tachi Ak'õre Ûraa p'ãpidade jara bùk'a. Mãgá eperãpa pedee k'achia pedeek'ãri, ichiaba oo–e bù Tachi Ak'õrepa jara bùk'a, ichi ûraade jara bairã chîara ãpùte pedee k'achia pedeeik'araa bù. Ma awara ijãapataarãpa mãga oodak'ãri, ak'ùpipata k'îsia p'anù ãchia Tachi Ak'õre k'ãyaara pipùara k'awa p'anù chîarapa oo p'anù ak'ùdait'ee. 12 Mãgá k'îsiadaik'araa bù. Tachi Ak'õrepapaita eperãarãpa oopata ak'ùpari, ichiata jarada perã sãga p'anapataadaipia bù. Ichia aupaita eperãarã o k'achiadeepa k'aripa atapari ichi ome p'ananadamerã. Ma awara ichia aupai jarapari chisãgùùrã ichimãiipa ãyaa pëiit'ee. Mapa apidaapa ak'ùdaik'araa bù chîarapa oopata, jarait'ee pia wa k'achia.
Ûraa audua pedeenaadamerã
13 Ûrítù parãdepema jarapataarã: “Idi maa–e pùrã nu wãdait'ee jãgà p'uurudee net'aa netode mãik'aapa año aba mama p'aneedait'ee mimiamaa p'arat'a jitadait'ee.” 14 Mãga jaradaik'araa bù parãpa k'awada–e p'anadairã nu chok'ai p'anadai wa p'anada–e pai. Parã nãupa jâarara taarã–ee ãyaa p'ua ateeparík'apù p'anù. 15 Idi wa nu ne–inaa oodait'eeda adai k'ãyaara, jaradaipia bù: “Tachi Ak'õrepa k'inia bù pùrã mãik'aapa chok'ai p'anù pùrã, ne–inaa oodait'ee.” 16 Mamîda parãpa mãgadak'aa. Audua pedeepata, pãchi k'îradoopa ne–inaa jõmaweda oo k'inia p'anadairã. Mamîda mãgá audua pedeedaik'araa bù, tachi jõmaweda Tachi Ak'õre jua ek'ari p'anadairã. 17 Mãpai eperãpa k'awa bù pùrã ne–inaa pia ooipia bù, mamîda mãga oo–ee, k'achia oomaa bù Tachi Ak'õre k'îrapite.