Ûraa p'arat'ara beerã–it'ee
5
1 Ârá ûrítù p'arat'ara beerã. Jèetù mãik'aapa bíatù, parã miadait'ee perã Tachi Ak'õrepa ak'ùk'ãri na p'ek'au eujãdepemaarãpa oopatap'edaa. 2 Ma ewate pãchia ne–inaa iru p'anù jõmaweda servi–ee baibeeit'ee. Jõma pãchia k'odait'ee ùa bùdap'edaa mik'ia bait'ee. Ma awara parãpa p'aru pi–ia p'e iru p'anù jâdait'ee wùwùrrùa jêra bait'ee, polillapa k'ok'ooda perã. 3 Parã nêe mãik'aapa p'arat'a p'e iru p'anù mogosia jêra bait'ee hierrok'a. Tachi Ak'õrepa ma net'aa jõmaweda jõpiit'ee, ichi k'îrapite servi–e bairã. Parãpa ma nêe p'arat'a ome mãgá mogosiadaida unudak'ãri, k'awaadait'ee pãchi k'ap'ùa paara jõdait'ee, t'ùpùtaupa ne–inaa paa jõparik'a. Ârá parãpa mãgee net'aa at'ãri p'emaa p'anù. Mamîda taarã–e Tachi Ak'õrepa ooit'ee mùa jara bùk'a. 4 ¡Ûrítù! Parãpa mimiapataarã jùrùpata pãchi ne–uudap'edaa chauda p'edamerã. Mamîda ma mimiapataarãmaa p'aadak'aa. Mapa chupùria iidipata abaapa ãchi k'aripamerã. Jõmaarã Ak'õre Waibùapa ãra chupùria iidida ûri bù. 5 Na p'ek'au eujãde p'anù misa, jõmaweda pãchia oo k'iniata oopata mãik'aapa net'aa k'iniata p'e wãpata. P'ak'a poreepidák'apù p'anù. Mamîda taarã–e ewari cherude p'ak'a ateepatak'a chi peepatamaa, Tachi Ak'õrepa parã k'achia ooit'ee, ooda–e p'anadairã irua k'inia bùk'a. 6 Ma awara parãpa eperã t'ãri pia p'anùùrã charraarãmaa ateepata, ne–inaa k'achia maarepida ooda–e p'anù mîda. Maap'eda charraarãmaa p'aapata ma chupùria chitoonùùrã peepidamerã. ¿K'aipa p'oyaaima parã ome?Choodaipia bù chupùria jõnùde
7 Âpemaarã, Tachi Ak'õrepa mãgá ooit'ee perã mãgeerã ome, choopatáatù chupùria jõnadak'ãri ãra k'aurepa. Mãga oodaipia bù Tachi Waibùa Jesucristo cheit'ee perã. Iru mãgá cheru misa, p'anapataadaipia bù ne–uupataarãk'a. Mãùrãpa ne–inaa uudap'eda, k'ãiwee nùpata ijãa p'anadairã k'oi chek'ãri, ãchi ne–uudap'edaa t'onoit'ee mãik'aapa wariit'ee. Aù t'êepai waya nùpata k'oi waya chek'ãri, ma ne–uudap'edaa chaumerã. 8 Mãga pùk'a parã k'ãiwee nùdaipia bù mãik'aapa ijãapataadaipia bù Tachi Waibùade, iru taarã–ee cheit'ee perã, jõmaarãpa oopatap'edaa ak'ùde.
9 Mamîda âpemaarã, mãgá k'ãiwee nù p'anù misa ma chupùria jõnùde, k'îrak'aupai jaradai: “Jãgà ijãapari k'aurepa mù nãgá chupùria nâbù.” Tachi Ak'õrepa mãgá k'achia k'îsiapataarã pia ak'ù–e pait'ee, iru chek'ãri jõmaarãpa oopatap'edaa ak'ùde. Taarã–ee iru waya cheit'ee na p'ek'au eujãdee.a 10 Piara k'awaadamerã sãga choodaipia bù nepùrade jõnùde, mùa k'irãpapi k'inia bù Tachi Ak'õre pedee jarapataarã chonaarãweda p'anapatap'edaa. Tachi Ak'õrepa ãra pëiji jarade irua oopi k'inia bada eperãarãmaa. Mamîda ma eperãarãpa ãra miapijida, ãrapa jaradap'edaa ûri k'iniada–e p'anadap'edaa perã. Mãgá iru p'anajida mîda, choopachida. 11 Tachi ijãapataarãpa pia pedeepata ãra ãpùte, waapùara ijãapatap'edaa perã Tachi Ak'õrede ãra chupùria jõnadak'ãri. Parãpa k'awa p'anù sãga chooji chonaarãwedapema Job, chupùria nâbùde. Mãgá baji mîda, Tachi Ak'õrede ijãapachi. Maap'eda ma chupùria nâbùdeepa uchiak'ãri, Tachi Ak'õrepa Job k'aripaji pipùara bapariimerã naawedapema k'ãyaara. Tachi Ak'õrepa mãga ooji chupùria jõnùùrã chupùria k'awaapari perã.
12 Ârá âpemaarã, ne–inaa awaraa k'awapi k'inia bù parãmaa. Juraadaik'araa bù ne–inaa apida k'îrapite: pajã k'îrapite, na eujã k'îrapite, wa ne–inaa awaraa k'îrapite. Tachi Ak'õrepa jõmaarãpa oopatap'edaa ak'ùk'ãri, pia ak'ù–e pait'ee mãgá pariatua jarapataarã, chîarapa ijãadamerã ãchia jara p'anù. Mãgá juraadai k'ãyaara parãpa jaradaipia bù: “ooit'eepù” jaradak'ãri ne–inaa oodait'ee mãik'aapa “oo–epù” jaradak'ãri ne–inaa ooda–e pait'ee.
13 Mãpai âpemaarã, parãdepema aba chupùria nâbak'ãri, ùt'aa t'âipia bù. Jõdee o–îa bak'ãri, Tachi Ak'õremaa k'ariipia bù. 14 Ma awara parãdepema aba k'ayaa bak'ãri, jara pëidaipia bù tachi ijãapataarã ak'ùpataarãmaa, ãra chedamerã mãik'aapa ùt'aa t'âdamerã iru pari. Iru ik'aawa pachedak'ãri, ãrapa ùt'aa t'âdaipia bù Jesucristopa iru jùpamerã. Mãùmisa ãradepemapa iru k'ap'ùa p'uruipia bù aceitepa. 15 Mamîda ùt'aa t'âdak'ãri, wãara ijãadaipia bù Tachi Ak'õrepa jùpai. Mãga ooruta pùrã, Ak'õrepa ooit'ee ãrapa iidi p'anùk'a. Ma k'ayaa wêpait'ee mãik'aapa k'ayaa baji pùrã p'ek'au k'achia ooda k'aurepa, ma p'ek'au k'achia wêpait'ee. 16 Tachi Ak'õrepa mãga oopari perã, k'ayaa beerãpa jaradaipia bù ãchia k'achia oodap'edaa awaraa ijãapataarãmaa, mãùrãpa ùt'aa t'âdamerã ãchi pari. Mãgá Tachi Ak'õrepa ãra jùpaipù. Mùa mãga jara bù irua oopari perã ichi k'îrapite pia nipapataarãpa iidi p'anùk'a, wãara ijãadak'ãri. Mãga oopari ãrapa ne–inaa chaaree iidi p'anù pùjida. 17 Mãga ooji chonaarãweda ichi pedee jarapari Elías ome. Elías eperã paji tachik'a. Mamîda ùt'aa iidik'ãri Tachi Ak'õremaa irua k'oi chepinaamerã, Tachi Ak'õrepa mãga ooji, Eliapa wãara ijãa bada perã. Año õpee esa–auk'a k'oi che–e paji. 18 Ma t'êepai waya ùt'aa iidik'ãri, Tachi Ak'õrepa k'oi chepiji mãik'aapa ma eujãde ne–uudap'edaa t'onop'eda mãik'aapa warip'eda, chauji.
19 Mãpai âpemaarã, mùa et'ewa jaradak'a chik'aripa p'anapatáatù. Mãgá parãdepema aba k'achiade baairu pùrã oo k'inia–e bairã Tachi Ak'õrepa oopi k'inia bùk'a, awaraarãpa iru k'aripadai, waya wãara ijãamerã mãik'aapa k'achia oo amaamerã. 20 K'awadaipia bù chi mãgá k'ariparupa mãgà eperã o k'achiadeepa uchiapiit'ee. Mãgá Tachi Ak'õrepa irua k'achia ooda jõmaweda wêpapii.
Mãgapai paji.