Tachi Ak'õre Ûraa<R>audú k'awaa k'inia p'anadaipia bù
2
1 Maperã oo amáatù ne–inaa k'achia k'îra t'ãdoo. Seewanáatù mãik'aapa seewata ne–inaa oonáatù. Awaraarã k'îra unuamaa iru p'ananáatù ãrapa net'aa iru p'anù k'aurepa. Pedee k'achia apida chîara ãpùte jaranáatù. 2 Ma k'ãyaara, ara warra ewaa t'oda juto k'inia bùk'a, k'awaa k'inia p'anapatáatù Tachi Ak'õrepa wãarata jara pëida. Mãgá oo wãdait'ee irua oopi bùk'a ùt'aa wãrutamaa. 3 Ârá k'awa p'anù Tachi Waibùa t'ãri pia bapari.Jesucristo ijãapataarã poro waibùa
4 Mapa óotù irua k'inia bùk'a. Irua tachi k'aripapari ichita chok'ai p'anapataadamerã. Eperãarãpa iru yiaraa iru p'anapachida te oopataarãpa mãu orp'e–ee yiaraa iru p'anapatak'a, mãu basa–it'ee jùrùt'eradak'ãri. Mamîda Tachi Ak'õre k'îrapite iru chi mãu pipùara pùk'a bù, Tachi Ak'õrepa iru jùrùt'erada perã. 5 Parã jida ma ichita bapari tedepema måuk'apù p'anù ichita p'anapataadait'ee perã. Mapa oopítù Tachi Ak'õremaa irua k'inia bùk'a. Mãga oodak'ãri, parãpa mimia oodait'ee p'aareerãpa oopatak'a ne–animalaarã peedap'eda, paadak'ãri Tachi Ak'õre–it'ee. Mamîda ma k'ãyaara ne–inaa pipùara oodait'ee, Cristo k'ap'ùa pari ne–inaa oodait'ee perã ichi Jaurepa oopi bùk'a. 6 Chonaarãweda Tachi Ak'õrepa mãga jaraji ichi Ûraa p'ãdade:
‘Mùa aba pi–ia bùta jùrùt'eraji bùit'ee mùchi ùt'aripema Sión p'uurude, parãpa irude ijãadamerã. Irude ijãapataarã k'îra nejasia p'anada–e pait'ee ma p'uurude panadak'ãri, ichideerã perã.’ (Isaías 28.16)
7 Wãara parã ijãapataarã–it'ee iru jõmaarã k'ãyaara pipùara bù. Mamîda mãga–e ijãadak'aa beerã–it'ee. Tachi Ak'õre Ûraa p'ãdade jara bù:
‘Te oopataarãpa mãu k'iniada–e padap'edaa pipùara padachi.’ (Salmos 118.22)
8 Ichiaba awara ãi Tachi Ak'õre Ûraa p'ãdade jara bù:
‘Ara eperã mãumaa t'îutùparik'a, mãga pùk'a eperãarã chok'ara t'îutù pùk'adait'ee ma mãu pipùara papida k'aurepa.’ (Isaías 8.14)
Mãgà mãu Jesucristo. Wãara ijãadak'aa beerã t'îutù pùk'apata, Tachi Ak'õrepa wãarata jara pëida Cristo k'ap'ùa pari ijãadaamaa p'anadap'eda, atuadait'ee perã Tachi Ak'õrepa k'îsia iru badak'a.
9 Mamîda Ak'õrepa parãta jùrùt'eraji ichideerã p'anadamerã. Ichiaba jõmaarã reypa parã awara bùji mimia oodamerã ichi pari, p'aareerãpa Ak'õre mimia oopatak'a. Ak'õrepa k'inia bù parã ichi p'uuru pidaarã p'anadamerã ichik'a, k'achia wêe. Ichideerã papiji parãpa jõmaarãmaa jaradamerã irua ooda eperãarã k'aripait'ee. Iruata parã jùrùji uchiadamerã ijãadak'aa beerã p'ãriu pùk'a p'anùdeepa t'îudait'ee âdaa pùk'a pi–ia bùdee iru ome. 10 Naaweda parã Tachi Ak'õre p'uurua pidaarã–e paji. Mamîda ârá iru p'uuru pidaarã. Naaweda Tachi Ak'õrepa parã chupùria k'awa–e paji, ijãadak'aa p'anadap'edaa perã. Mamîda ârá parã chupùria k'awaa bù, ichideerã perã.
Oopatáatù Tachi Ak'õrepa oopi bùk'a
11 Mapa âpemaarã k'iniarã, mùa enenee nâbù oonaadamerã pãchi p'ek'au k'achia ooyaa bù k'ap'ùapa oopi k'inia bùk'a. Mãgùpa chõo pùk'apari tachi t'ãri ome. Parã k'îra tewaraarãk'a p'anapata ijãadak'aa beerã t'ãide. Mapa oodaik'araa bù ãchia oopatak'a. 12 Ma k'ãyaara ãchi t'ãide k'îra jîp'a p'anadaipia bù. Mãgá p'anaruta pùrã, ãchia “k'achia beerãda” aruta pùjida parã ãpùte, unudait'ee parãpa ne–inaa pia oo p'anù mãik'aapa Tachi Ak'õre cheru ewate jaradait'ee iruata parãmaa mãga oopiji.
13 Na p'ek'au eujãde p'anù misa, óotù eperãarã poroorãpa jara p'anùk'a, apidaapa Tachi Waibùa ãpùte k'achia pedeenaadamerã parã k'aurepa. Mãga oodaipia bù César ome, iru waibùara bairã apemaarã poro waibùarã k'ãyaara. 14 Ichiaba mãga oodaipia bù iru ek'ari p'anùùrã ome. Irua ãra pëipari k'achia beerã atadamerã mãik'aapa miapidamerã; jõdee t'ãri pia p'anùùrãmaa pia pedeedamerã. 15 Tachi Ak'õrepa k'inia bù parãpa ne–inaa pia aupai oodamerã. Mãga ooruta pùrã, chi k'îsia k'awa–ee p'anùùrãpa parã ãpùte pariatua pedeeda–e pai. K'îup'ee p'anadait'ee.
16 Parã esclavoorã–e. Mapa p'anapatáatù esclavo–eerãk'a. Mamîda mãùmisa k'îsianáatù oodait'ee pãchia oo k'iniata, ne–inaa k'achia oorutamaa. Ma k'ãyaara p'anapatáatù Tachi Ak'õre esclavoorãk'a, oomaa irua oopi bùk'a. 17 T'ãri pia p'anapatáatù jõmaarã ome. K'inia iru p'anapatáatù pãchi âpemaarã Cristo k'aurepa. Tachi Ak'õre waaweepatáatù mãik'aapa César waaweepatáatù, eperãarãpa ãchi poro waibùarã waaweepatak'a.
P'anadaipia bù Cristo mimiapataarãk'a
(Efesios 6.5-9; Colosenses 3.22-25; Tito 2.9-10)
18 Teeda mimiapataarã, pãchi poro waibùarã waaweepatáatù mãik'aapa oopatáatù ãrapa jara p'anùk'a. Mãga oodaipia bù ãra t'ãri pia p'anù pùrã, maa–e pùrã t'ãri k'achia p'anù pùjida. 19 Ãrapa parã miapidai, ne–inaa k'achia ooda–e p'anù mîda. Mamîda k'îrau–ee chooruta pùrã oo k'inia p'anadairã Tachi Ak'õrepa oopi bùk'a, irua parã pia ak'ùit'ee. 20 Jõdee mãgá ak'ù–e pait'ee parãpa ne–inaa k'achia oodap'eda, k'îrau–ee chooruta pùrã miapidak'ãri ma k'achia oodap'edaa k'aurepa. Mamîda parã k'îrau–ee chooruta pùrã miapidak'ãri ne–inaa pia oodap'edaa perã, mãgara Tachi Ak'õrepa parã pia ak'ùit'ee. 21 Ma–it'ee Tachi Ak'õrepa parã jùrùji, Cristo jîak'a p'anapataadamerã. Iru miaji parã k'aripait'ee. K'inia bù parãpa awaraarã auk'a k'aripadamerã, miaruta pùjida mãga oo p'anù k'aurepa. Tachi Ak'õre pedee jaraparipa irudé nãga jaraji:
22 ‘Irua p'ek'au k'achia ook'aa paji. Seewa apidaamaa jarak'aa paji.’ (Isaías 53.9)
23 Cristomaa ik'achia jaradak'ãri, mãgá p'anauk'aa paji. Miapidak'ãri, maarepida jarak'aa paji k'achia ooit'ee iru ùmùateedap'edaarãmaa. Ma k'ãyaara ma nepùra ichiak'au bùji Tachi Ak'õrepa oomerã ichia oo k'iniata. K'awaji Tachi Ak'õrepapai ak'ùi eperãarãpa oopata jarait'ee pia wa k'achia. 24 Kurusode bak'ãri, Cristopa ichi itu tachia p'ek'au k'achia oopata iru baji ichi k'ap'ùade. Mãgá piuji tachia p'ek'au k'achia oopata k'aurepa, tachi uchiadaidamerã p'ek'au k'achia jua ek'ariipa mãik'aapa k'achia wêe p'anapataadamerã Tachi Ak'õrepa k'inia bùk'a. Ma p'ek'au k'achia oopatap'edaa perã, parã k'ayaa pùk'a p'anapachida. Mamîda Cristo miapida k'aurepa parã pari, jùpa pùk'a p'aneejida. Maperãpù ârá parã ichita p'anapataadait'ee Tachi Ak'õre ome. 25 Parãpa ijãadai naaweda, p'anapachida oveja o atua bùk'a, Tachi Ak'õre k'awada–ee p'anadap'edaa perã. Mamîda ârá, ma oveja ãpùtee cheruk'a ichi ak'ùpari waya unu atarumaa, mãga pùk'a parã o k'achiade wãdap'edaadeepa ãpùtee chejida unu atarutamaa pãchi ak'ùpari, Cristo ome. Iruata parã t'ãri ak'ùpari.