1 SAN PEDRO
San Pedropa K'art'a Naapùara P'ãda
Salude pëida
1
1 Mù, Pedro Jesucristopa pëida ichi ûraa jarateede. Mùa na k'art'a p'ã pëiru parã, Tachi Ak'õrepa jùrùt'eradaarãmaa Cristode ijãadamerã; chi awara–awaraa p'anapataarã k'îra tewaraarãk'a nãgà eujãde: Ponto, Galacia, Capadocia, Ásia mãik'aapa Bitinia; mãgà eujãde. 2 Tachi Ak'õrepa naaweda k'îsia iru badak'a, parã jùrùt'eraji. Iru Jaurepa parã awara bùji oodamerã Jesucristopa oopi bùk'a mãik'aapa p'ek'au k'achia wêe p'anadamerã iru waa bat'ada k'aurepa. Mùa ùt'aa iidi bù Tachi Ak'õrepa parã audú pia ak'ù bapariimerã. Mãgá k'ãiwee p'anapataadait'ee.Cristode ijãapataarãpa ùt'ari ne–inaa pia iru p'anadait'ee
3 O–îa ùt'aa t'âdáma Tachi Ak'õremaa. Iru Tachi Waibùa Jesucristo Ak'õre. Tachi audú chupùria k'awaada perã, ichi Jaurepa tachi waya t'o pùk'apiji ichideerã p'aneedamerã. Mãga ooji Jesucristo piup'eda, chok'ai p'irabaipik'ãri. Ma k'aurépata k'awa p'anù tachi jida ichiaba chok'ai p'irabaidait'ee. 4 Ma awara k'awa p'anù tachia iru p'anadait'ee ne–inaa jõmaweda Tachi Ak'õrepa k'îsia iru bù teeit'ee ichideerãmaa. Mãgà ne–inaa ùa iru bù ùt'ari parã–it'ee. Mãgà ne–inaa pi–ia bù. Jõk'aa mãik'aapa sore pak'aa, ne–inaa ùt'aripema perã. 5 Parãpa wãara Tachi Ak'õrede ijãapata perã, irua parã ak'ù bapariit'ee mãgà ne–inaa unurutamaa. Iru jõmaarã k'ãyaara waibùara bairã, parã ak'ùpari atuanaadamerã ichi ewari waibùa ewate, na p'ek'au eujã jõk'ãri. Ma ewate irua unupiit'ee jõma ichia k'îsia iru bù ichideerã–it'ee.
Ijãapataarã o–îa p'anapata
6 Tachi Ak'õrepa mãga oopari perã parã–it'ee, t'ãri o–îa p'anapata. Mamîda ârá, taarã–e nùde k'îsia p'uadaridai, nepùra k'îra t'ãdoode baaidak'ãri. 7 Parã nepùrade baaipata k'awaadait'ee wãara Cristode ijãapata wa mãga–e. K'îsíatù nãgùde. Eperãarãpa t'ùpùtaude nêe torrabaipata, nejarra uchiamerã. Mãga pùk'a parã nepùrade baaipata, audupùara Cristode ijãapataadamerã. Nêe pi–ia bù, mamîda pipùara bù Cristode ijãait'ee. Nêe jõdaipari na eujãdepema perã. Mamîda eperãpa wãara Cristode ijãak'ãri, jõ–e pait'ee. Mapa chóotù parã ijãa p'anùde, nepùrade baairuta pùjida. Mãga ooruta pùrã, Jesucristo waya chek'ãri, Tachi Ak'õrepa pia pedeeit'ee parãmaa.
8 Parãpa Cristo waide unuda–e p'anù mîda, iru k'inia iru p'anù. Ma awara ârá unuda–e p'anù mîda, irude ijãapata. Mapa t'ãri o–îa p'anapata. Pedee wê–e jarait'ee sãga parã audupai o–îa p'anù. 9 Parãpa k'awa p'anù wãara ijãapata perã, Tachi Ak'õrepa parã k'aripamaa bù atuanaadamerã.
Chonaarãwedapemaarãpa k'awa k'inia p'anadap'edaa
10 Chonaarãweda Ak'õre pedee jarapataarãpa pi–ia ak'ùjida Tachi Ak'õre Ûraa p'ãda k'awaadait'ee sãga Tachi Ak'õrepa eperãarã k'aripait'ee atuanaadamerã, parã ome oomaa bùk'a. Mãgá ak'ù p'anù misa, ãchia jõma pia k'awada–e paji mîda, Tachi Ak'õrepa jarapiji ãramaa sãga irua parã ârapemaarã k'aripait'ee baji, eperãarã jõmaweda k'inia iru bairã. 11 Cristo Jaurepa ãramaa jarapipachi iru cheit'ee bada, chupùria nâbait'ee bada mãik'aapa k'îra wãree bait'ee bada, jõmaarã k'ãyaara waibùara pak'ãri. Mapa ãrapa audú k'awa k'inia p'anapachida sãga mãik'aapa sãapai ma jõma p'asait'ee paji. 12 Mamîda Tachi Ak'õrepa ãramaa k'awapiji mãgà pedee jaradak'ãri irua jarapidak'a, ãchi–it'ee–e paji. Ma k'ãyaara parã ârapemaarã–it'ee paji. Mãgà pedee parãpa ûrijida Tachi Ak'õre Ûraa jarateepataarãpa parãmaa jarateedak'ãri Cristopa ooda parã o k'achiadeepa k'aripa atait'ee. Mãga jarateejida Tachi Ak'õre Jaure ùt'ariipa ãra ome ba cheda perã. ¡Angeleerãpa paara mãgà net'aa jõma k'awa k'inia p'anapata! Mamîda k'awada–e tachia k'awa p'anùk'a.
Cristode ijãapataarã<R>k'achia wêe p'anapataadaipia bù
13 Maperã k'îra jîp'a p'anapatáatù. Ichita k'îsíatù Tachi Ak'õrepa ooit'ee bùde parã k'aripait'ee Cristo waya chek'ãri. 14 Warrarã chok'ek'ee p'anapatak'a p'anapatáatù. Ijãadai naaweda p'anapatap'edaak'a p'ananáatù. Maapai Tachi Ak'õre k'awada–e p'anadap'edaa perã, ne–inaa k'achia pariatua oopachida; pãchia oo k'iniata. 15 Ma k'ãyaara ne–inaa jõmaade k'achia wêe p'anapatáatù, Tachi Ak'õre k'achia wêe bapari perã. Iruata parã jùrùji mãga p'anapataadamerã. 16 Iru ley p'ãdade auk'a jara bù:
‘K'achia wêe p'anapatáatù, mù mãga bapari perã.’(Levítico 19.2)
Tachi Ak'õre waaweedaipia bù
17 Tachi Ak'õre, “Ak'õreda” a p'anù pùrã, iru waaweedaipia bù na p'ek'au eujãde p'anù misa k'îra tewaraarãk'a. Iru waaweedaipia bù irua jõmaarãpa ne–inaa oopata auk'a ak'ùpari perã jarait'ee pia wa k'achia. 18 Pariatua parãpa ne–inaa k'achia oo wãpachida pãchi chonaarãpa oo p'anadap'edaak'a. Pia k'awa p'anù Tachi Ak'õrepa parã k'aripa–e paji ma naaweda o k'achiade wãdadeepa, apidaapa irumaa p'aadap'edaa perã ne–inaa jõparipa, nêek'a maa–e pùrã p'arat'ak'a. 19 Ma k'ãyaara Tachi Ak'õrepa parã ma o k'achiadeepa k'aripa ataji Cristo waa bat'ada k'aurepa. Ma waa pipùara baji ne–inaa awaraa k'ãyaara, oveja chak'e waak'a bada perã. Chonaarãweda eperãarãpa oveja chak'e maarepida k'achia wêe ateedak'ãri peepidait'ee mãik'aapa paadait'ee Tachi Ak'õre–it'ee, irua ãra pia ak'ùpachi. Mãga bù Cristo waa ome. Iru maarepida k'achia wêe baji. Mapa iru waa bat'ada k'aurepa Tachi Ak'õrepa irude ijãapataarã pia ak'ùpari. 20 Na eujã ooi naaweda Tachi Ak'õrepa k'îsia iru baji Cristopa ichi waa bat'amerã eperãarã k'aripait'ee. Mamîda ârapaita, na p'ek'au eujã jõi naaweda, irua Cristo pëiji parã ârapemaarã k'aripade. 21 Ma awara Cristo chok'ai p'irabaipiji mãik'aapa ùt'aa ateeji ichi k'îra wãree eujãdee. Mapa Cristo k'aurepa parãpa Tachi Ak'õrede wãara ijãapata mãik'aapa k'awapata jai–idaadak'ãri, irua parã ichiaba chok'ai p'irabaipiit'ee.
Chik'inia p'anapataadaipia bù
22 Parãpa ûridap'eda Tachi Ak'õrepa wãarata jara pëida Cristode, t'ãripa ijãajida mãik'aapa Ak'õrepa parã p'ek'au k'achia wêpapiji. Mapa ârá wãara pãchi âpemaarã Cristo k'aurepa k'inia iru p'anadai. Mapa jîp'a pãchi t'ãripa chik'inia p'anapatáatù. 23 Mãga p'anadaipia bù Tachi Ak'õre Jaurepa parã waya t'o pùk'apida perã ichideerã p'aneedamerã. Mãga padaida–e paji pãchi ak'õreerã k'aurepa, ewaa t'odak'a. Mãgee ak'õreerã piupata. Mamîda Tachi Ak'õre ichita chok'ai bapari. Iruata parã ichideerã papiji ichi pedee k'aurepa. Mãgà pedee jõk'aa. Ichita bapari Tachi Ak'õrek'a. Mapa parã jida ichita p'anapataadait'ee. 24 Tachi Ak'õre Ûraa p'ãdade jara bù:
‘Eperãarã jõmaweda p'ûajarak'a p'anù. P'ûajara bap'eda, taarã–ee pùùdaipari. Ichiaba p'ûajara p'ono t'onop'eda, pi–ia unupata mîda, piu baaipari eujãde. 25 Mamîda mãga–e Tachi Ak'õre pedee ome. Mãgà ichita bapari.’ (Isaías 40.6-8)
Parãpa mãgà pedee ûrijida Tachi Ak'õre Ûraa jarateepataarãpa parãmaa jarateedak'ãri Cristopa ooda parã k'aripait'ee atuanaadamerã. Mãgà pedee pia k'aurépata parã jida ichita p'anapataadait'ee.