Ûraa Cristode ijãapataarã–it'ee
5
1 Ârá mùa ûraait'ee parã t'ãidepema ijãapataarã chonaarã. Parã chonaarã jîak'a mùa pida ijãapataarã ak'ùpari. Mùchi taupa unuji Cristo miada tachi k'aripait'ee mãik'aapa mùchi it'aipa mãga jarapari eperãarãmaa. Cristo waya chek'ãri, mùmaa ichiaba Tachi Ak'õrepa ichi k'îra wãree unupiit'ee. 2 Mapa ak'ù p'anapatáatù ijãapataarã parã jua ek'ari p'anù. Ãra ak'ù p'anadaipia bù oveja ak'ùparipa ichi ovejaarã ak'ùparik'a. Mãga oodaik'araa bù apidaapa mãga oopi p'anadairã parãmaa. Ãra ak'ù p'anadaipia bù, t'ãripa oo k'inia p'anadairã Tachi Ak'õrepa oopi bùk'a. Ichiaba ma mimia oodaik'araa bù p'arat'a atadait'ee. Ma k'ãyaara óotù awaraarã k'aripa k'inia p'anadairã. 3 Parã jua ek'ari p'anùùrã chipariirãk'a p'ananáatù. Ma k'ãyaara t'ãri pia p'anapatáatù ãra ome, ãra parã jîak'a p'ana k'inia p'aneedamerã. 4 Mãgá p'anaruta pùrã, tachi ak'ùpari waibùara bùpa ichi waya unupik'ãri jõmaarãmaa, paråpata atadait'ee iru k'îra wãree mãik'aapa ichita p'anapataadait'ee iru ome. Mãgà pipùara bù na p'ek'au eujãdepema poro jâra atai k'ãyaara, Cristo k'îra wãree jõk'aa perã.5 Chonaarãmaa ûraadak'a ichiaba parã t'ãidepema k'ûtrãarãmaa ûraait'ee. Oopatáatù chonaarãpa jara p'anùk'a. Parã ijãapataarã t'ãidepema apida audua baik'araa bù, Tachi Ak'õre Ûraa p'ãdade jara bairã:
‘Tachi Ak'õrepa k'aripa–e audua p'anapataarã, mamîda t'ãri pia k'aripapari audua–ee beerã.’ (Proverbios 3.34)
6 Maperãpù audua–ee p'anapatáatù Tachi Ak'õre jua ek'ari, irua k'inia bù ewaride irua parã awaraarã k'ãyaara waibùara papimerã. 7 Parã k'îsia jõnadak'ãri, ma k'îsia jõmaweda jarátù Tachi Ak'õremaa, irua parã pia ak'ù bapari perã.
8 K'îra jîp'a p'anapatáatù mãik'aapa tauk'a nipapatáatù, Netuara Poro Waibùapa parã k'îra unuamaa iru bapari perã. Ichia eperãarã jùrù nipapari Cristode ijãa amaapiit'ee, león ne–inaa k'oit'ee jùrù nipak'ãri, bia nipaparik'a. 9 Ichia parã mãgá jùrù chek'ãri, chóotù Cristode ijãa p'anùde mãik'aapa oonáatù mãgùpa oopi k'inia bùk'a. K'irãpátù ichia auk'a jùrùpari parã âpemaarã Cristo k'aurepa miapiit'ee, na p'ek'au eujãde para bee chaa. 10 Mamîda taarã–e, parã miadap'eda, Tachi Ak'õrepa k'aripait'ee ichia k'inia bùk'a p'anapataadamerã mãik'aapa pipùara choodamerã pãchia Cristode ijãa p'anùde. Tachi Ak'õrepa mãgá parã k'aripait'ee tachi k'inia iru bapari perã mãik'aapa tachi jùrùda perã, Jesucristo k'aurepa ichita p'anapataadamerã iru eujã k'îra wãreede. 11 ¡Tachi Ak'õre ichita jõmaarã k'ãyaara waibùara bait'ee! ¡Amén!
Salude pëida
12 Tachi âpema Cristo k'aurepa, Silvano, nama bù mù ome. Mùa k'awa bù irua pia oopari Cristopa oopi bùk'a. Mapa mùa na k'art'a k'ak'at'ua p'ãpiji irumaa. P'ãpiji parãpa k'awaadamerã mùa et'ewa jaradak'a Tachi Ak'õrepa parã k'inia iru bapari mãik'aapa wãara parã k'aripait'ee. Mapa mùa ûraait'ee parã choodamerã Cristode ijãa p'anùde, maarepida ijãa amaada–ee.
13 Nama Babilonia p'uurude Tachi Ak'õrepa ichiaba eperãarã jùrùt'eraji Cristode ijãadamerã, parã ome oodak'a. Mãùrãpa parãmaa salude pëiruta. Ichiaba salude pëiru Marcopa. Iru mù warrak'a bù, mù ome nipapari perã Cristopa ooda jarateede. 14 Chik'inia saludaa para bátù.
Mùa ùt'aa iidi bù parã Cristodeerã jõmaarã pari, k'ãiwee p'anapataadamerã.
Mãgapai paji.