Sãga Timoteo baipia bù ijãapataarã ome
5
1 Ijãapataarã t'ãidepema chonaapa ne–inaa k'achia ooru pùrã, ùtrùanáaji. Ma k'ãyaara pedéeji iru ome, pùchi ak'õre ome pedeeparik'a. Jõdee, k'ûtrãarã ûráaji pùchi âpemaarã ûraak'ajik'a. 2 Chõtrãarã ak'ùipia bù pùchi nawe ak'ùparik'a. Mãgá ichiaba awêraarã ak'ùipia bù pùchi âpewêraarã ak'ùk'ajik'a, ãra ome k'achia oo–ee.3 Pia k'aripáji p'êtrãarã ëreerã wêe chitoonù. 4 Mamîda p'êtrãapa warrarã wa ãichak'eerã iru bù pùrã, ãchiata naapùara ãchideerã ak'ùdaipia bù Tachi Ak'õre Ûraade jara bùk'a. Mãgá ãchi nawe wa awela k'aripadai irua ãchi k'aripadak'a ãchi wari wãk'ãri. Ma awara mãga oodak'ãri, Tachi Ak'õrepa ãchi pia ak'ùpari. 5 Jõdee p'êtrãa ëreerã wêe k'ùrùpa nùpari Tachi Ak'õrepa k'aripamerã. Ãstaawa, p'ãrik'ua pida ùt'aa t'âpari Tachi Ak'õremaa k'aripamerã. Mãgee p'êtrãa k'aripaipia bù. 6 Mamîda mãgee p'êtrãarã ûk'uruurãpa Tachi Ak'õre net'aade k'îsiadai k'ãyaara, ãchia k'iniata oo wãpata. Mãgeerã chok'ai p'anù mîda, piudap'edaaråk'apù p'anù. Mapa mãgeerã k'aripaik'araa bù. 7 Jaráji ijãapataarã pù ek'ari p'anùùrãmaa oodamerã mùa et'ewa jaradak'a. Mãga ooruta pùrã, awaraarãpa p'oyaa k'achia pedeeda–e pai tachi ijãapataarã ãpùte. 8 Ijãaparipa ichi ëreerã wa audupùara ichideerã ak'ù–e pùrã, baamaa bù Cristopa k'inia bùk'a mãik'aapa ijãadak'aa beerã k'ãyaara k'achiara bù.
9 P'êtrãa t'â p'ãdai naaweda awaraa p'êtrãarã t'â ome, iru bapata ak'ùdaipia bù. Mãgà p'êtrãa ùmùk'îra apai ome miak'ãi bap'eda, sesenta añodeepa waa iru baipia bù. 10 Awaraarãpa iru t'â pia t'o p'anadaipia bù, irua ne–inaa pia oopata k'aurepa nãgee jîak'a: ichi warrarã pia warida perã; eperãarã pia auteebaida perã; ijãapataarã p'asia chedak'ãri, ãra bùùrù sùùda perã;a chupùria chedeerã k'aripada perã; jãgee ne–inaa pia k'îra t'ãdoo ooda perã ichi t'ãripa.
11 P'êtrãarã sesenta año waide wêe beerã t'â p'ãdaik'araa bù awaraa p'êtrãarã t'â ome, ùmùk'îra waya k'iniadarii perã mãik'aapa miak'ãidarii perã, Cristo–it'ee mimiadai k'ãyaara. 12 Mãgee p'êtrãarãpa jaradap'eda Cristopa oopi k'inia bùk'a oodait'ee, ùmùk'îra ataruta pùrã, Tachi Ak'õrepa k'îsia p'uapii maa–e pùrã awaraarãpa pedee k'achia jaradai ãra ãpùte. 13 Ma awara, mãgee p'êtrãarã k'oo–idaadaipata, ne–inaa pia mak'ùara ooda–ee. Mãgá te chaa chîara ãpùte jara nipapata mãik'aapa pedee–idaa p'anadairã, ûraa wãpata ãchi k'îsiadeepa. Mãgá pedee k'achia jaradaik'araa bùta jara wãpata. 14 Maperã mùa k'inia bù mãgee p'êtrãarã mak'ùara chõtrãa–ee p'anùùrã, waya miak'ãidamerã mãik'aapa warra t'odamerã. Mãgá mimiadait'ee ãchi temãi, ãchideerã ak'ùmaa p'anù misa. Mãga oo p'anù pùrã, tachi ijãapataarã k'îra unuamaa iru p'anapataarãpa p'oyaa k'achia pedeeda–e pai tachi ãpùte ma p'êtrãarã k'aurepa. 15 Mãgee p'êtrãarã ûk'uruurãpa oo amaajida Cristopa oopi k'inia bù oodait'ee Satanapa oopi k'inia bùk'a.
16 Waya mùa jara bù: Cristode ijãapari ëreerãdepema p'êtrãa paraa pùrã, ma ijãaparipa chi p'êtrãa k'aripaipia bù. Pëiik'araa bù ijãapataarãmaa k'aripa iidide, ãrapa ne–inaa iru p'anù araa–e pai perã audú chok'araarã–it'ee. Ijãapataarãpa ak'ùdaipia bù p'êtrãarã ëreerã wêe chitoonù aupai.
Sãga ijãapataarã chonaarã ak'ùdaipia bù
17 Ijãapataarã chonaarã waaweedaipia bù mãik'aapa p'aadaipia bù ãchi jua ek'ari p'anùùrã pia ak'ùdak'ãri mãik'aapa k'aripadak'ãri. Waapùara p'aadaipia bù awaraa ijãapataarã ak'ùpataarã k'ãyaara, Tachi Ak'õrepa jara pëida jarateedak'ãri mãik'aapa ijãapataarã ûraadak'ãri. 18 Tachi Ak'õre Ûraa p'ãdade jara bù:
‘P'ak'a it'ai jânáatù trigo t'ùamaa bak'ãri. Ita–aria k'opítù.’ (Deuteronomio 25.4)
Ichiaba awara ãi jara bù:
‘Mimiaparipa p'arat'a ataipia bù chi poro waibùa juadepema.’ (Lucas 10.7)
19 Eperãpa ijãapataarã ak'ùpari ùmùateeru pùrã, ijãanáatù mãgùpa jara bù. Jîp'a ma pedee ak'ùdaipia bù eperãarã omé wa õpee auk'a jararuta pùrã.
20 Mamîda ijãapataarã ak'ùpataarã k'achiade baai jõnaruta pùrã, jõmaarã taide ùtrùak'óoji. Mãgá awaraarãpa ne–inaa k'achia ooda–e pait'ee waaweepa.
21 Tachi Ak'õre k'îrapite mãik'aapa Jesucristo k'îrapite, angeleerã jùrùt'erada k'îrapite paara, mùa jara bù: óoji mùa et'ewa jaradak'a. Mamîda pùchi k'inia aba pipùara ak'ùnáaji awaraa k'ãyaara. 22 K'îrak'aupai ijãapari audú isapai awara bùi ijãapataarã ak'ùpari mimia–it'ee. Ma–it'ee pù jua bùi naaweda mãgà ârù, iru bapata pia ak'ùipia bù. Iru ne–inaa k'achiade ni pùrã, awaraarãpa iru ãpùte k'achia pedeedai mãik'aapa pù ãpùte auk'a mãgadai, irua oopata pùa pia ak'ùi jîak'aapa. Mapa maarepida ne–inaa k'achia oonáaji. Ichita óoji Cristopa oopi bùk'a.
23 Pania aupai toik'araa bù. Pù ip'ii k'ayaa bapari perã, ichiaba vino ma–ãri toipia bù bi p'irapiamaapa.
24 Jõmaarãpa k'awa p'anù eperãarã ûk'uruurãpa ne–inaa k'achia oopata, tau taawa oopata perã. Taarã–e nùde pùa k'awaai mãgeerãpa oopata mãik'aapa ãchi jùrùt'era–e pait'ee ijãapataarã ak'ùpari mimia–it'ee. Jõdee, awaraa eperãarã p'anapata ewaa ak'ùk'ãri, t'ãri pia pùk'a p'anù. Mamîda taarã pak'ãri, pùa k'awaa atai ãchia ne–inaa k'achia merã oopata mãik'aapa ãchi jida jùrùt'era–e pait'ee ma mimia–it'ee. 25 Mãgá ichiaba taarã–ee eperãarã ûk'uruurãpa ne–inaa pia oopata k'awaai, tau taawa oopata perã. Mamîda ne–inaa pia merã ooruta pùjida, taarã–ee pùa mãga k'awaa atai, Tachi Ak'õre Jaurepa k'awaapiit'ee perã. Mãgeerãta jùrùt'eraipia bù ma mimia–it'ee.