2 TIMOTEO
San Pablopa K'art'a T'êepema P'ãda Timoteomaa
San Pablo, Jesucristopa jùrùt'eradapa na k'art'a p'ãji Romade, carcelde bak'ãri. Mama bùde k'îsiaji madeepa chok'ai uchia–e pait'ee. Mapa waya p'ã k'inia baji ichi k'õp'ãyo pia bùmaa.
Salude jarap'eda, naapùara gracias jara bù Tachi Ak'õremaa Timoteo pari, waapùara Cristode ijãapari perã mãik'aapa oopari perã irua k'inia bùk'a. K'irãpapi bù Tachi Ak'õrepa iru jùrùt'erada mãik'aapa jara bù ichi chupùria, ituaba pùk'a carcelde bù (cap. 1). Ûraa bù Timoteopa choomerã soldaopa chõomaa bùde chooparik'a maa–e pùrã deporte jemeneparipa chooparik'a, jemenemaa bùde jemene k'awaa beerãpa oopatak'a. Ûraa bù Timoteopa ichi mimia pia oomerã Cristo–it'ee (cap. 2). Jara bù sãga na p'ek'au eujãdepemaarã p'anapataadait'ee Cristo ewaa chei naaweda mãik'aapa ûraa bù Timoteopa choomerã ichi ijãa bùde, ma k'aurepa miapiruta pùjida (cap. 3). T'êepai ûraa bù Timoteopa ichita jarateemerã Cristopa k'inia bùk'a mãik'aapa jara bù ichi k'îsia t'ãridepai: taarã–e piuit'ee. Maap'eda chupùria iidi bù mãga p'asai naaweda, Timoteo mama carcelde ichi ak'ùde wãmerã (cap. 4).