1 TIMOTEO
San Pablopa K'art'a Naapùara P'ãda Timoteomaa
San Pablo, Jesucristopa jùrùt'eradapa na k'art'a p'ãji Timoteomaa pëiit'ee. Aù naaweda Timoteo jaratee nipapachi Pablo ome judio–eerã t'ãide. Mamîda Pablopa iru atabëiji Éfeso p'uurude, ijãapataarã k'aripamerã ichi pari. Na k'art'ade Pablopa Timoteo ûraa bù ma mimia pipùara oo k'awaamerã. Timoteo Listra p'uurudepema paji. Chi ak'õre judio–e paji; Grecia eujãdepema paji. Jõdee chi nawe Judea eujãdepema paji. Pablo Listrade jaratee nipak'ãri, Timoteo k'ûtrãaweda Cristode ijãa beeji. Mamãik'aapa Timoteo nipapachi Pablo ome. K'aripapari pia paji.
Salude jarap'eda, naapùara Pablopa ûraa bù Timoteo t'îunaamerã seewa jarateepataarã ome, aupedeedak'ãri judiorãpa ijãapata k'ap'ùa (cap. 1.1-11). Jara bù Tachi Ak'õrepa iru chupùria k'awaada Cristode ijãai naaweda (cap. 1.12-17). Ûraa bù Timoteo jîp'a Cristode ijãapariimerã (cap. 1.18-20). Jara bù k'ãata oodaipia bù ijãapataarã chip'edaidak'ãri ùt'aa t'âdait'ee (cap. 2); sãga ijãapataarã ak'ùpataarã p'anapataadaipia bù (cap. 3) mãik'aapa k'ãata oodaipia bù seewa jarateepataarã ome. Mãùrãpa jarateejida Cristode ijãapataarãpa chik'o k'îra t'ãdoo k'odaik'araa bù mãik'aapa miak'ãidaik'araa bù. Ichiaba jarajida na p'ek'au eujãdepema net'aa, tachi eperã k'ap'ùa paara, k'achia baji. Mapa eperãarãpa Tachi Ak'õre k'awada–e pai. Jîp'a oodak'ãripù ãrapa jaradap'edaak'a, Tachi Ak'õrepa eperãarã pia ak'ùyada ajida (cap. 4). Ichiaba Pablopa jara bù sãga Timoteopa k'aripai ijãapataarã k'ûtrãarã, chonaarã, wêraarã, esclavoorã paara (cap. 5.1-20). T'êepai ûraa bù Timoteo pia choomerã iru ijãa bùde mãik'aapa ijãapataarã k'aripamaa bùde, k'ûtrãa bù mîda (caps. 5.21--6.21).