Pablopa iidida ichi pari ùt'aa t'âpataadamerã
3
1 Ârá âpemaarã, parãmaa chupùria iidi k'inia p'anù tai pari ùt'aa t'âpataadamerã. Iidítù Tachi Ak'õrepa tai k'aripamerã, jõmaarãmaa irua jara pëida isapai jaratee k'inia p'anadairã. Iidítù ma jaratee p'anù ûrirutaarã t'ãripa Cristode ijãadamerã, parã ijãadap'edaak'a. 2 Ichiaba iidítù Tachi Ak'õrepa tai k'aripa atamerã k'achia beerã juadeepa, chok'araarãpa tai jùrùpata perã miapidait'ee. Jãgùùrãpa Tachi Waibùa Jesucristode ijãa k'iniadak'aa. 3 Mamîda k'awa p'anù Tachi Waibùapa oopari ichia jara bùk'a. Iruata parã k'aripait'ee choodamerã parã ijãa p'anùde mãik'aapa k'achiadeepa k'aripait'ee k'achia beerã poro, Satanapa parã k'achiade baaipi k'inia bak'ãri. 4 Tachi Waibùapa ichideerã mãgá k'aripapari perã, taipa ijãa p'anù parãpa wãara oomaa p'anù taipa jarapatak'a mãik'aapa mãga oopataadait'ee. 5 Maperãpù iidi p'anù Tachi Waibùapa parãmaa k'awapimerã sãga Tachi Ak'õre k'inia iru p'anadai, irua parã audú k'inia iru baparik'a. Mãga k'awaadak'ãri, chupùria jõneeruta pùjida, pãchi t'ãridepai choodait'ee, Cristopa mãga oopipari perã.Cristode ijãapataarã mimiadaipia bù
6 Âpemaarã, Tachi Waibùa Jesucristopa jara pëiru ichide ijãapataarã mimiadaipia bù, taipa naaweda jarateedap'edaak'a. Ijãaparipa ma ûraa ûriamaa bù pùrã, iru ik'aawaapa ãyaa p'anéetù. 7 Pãchia k'awa p'anù p'anadaipia bù tai p'anadap'edaak'a parã t'ãide nipadak'ãri. K'oo–idaa p'anadak'aa paji. 8 Apidaamaa iidida–e paji taimaa chik'o pari teedamerã. Ma k'ãyaara ãstaawa, p'ãrik'ua pida mimiapachida tai chik'o neto k'odait'ee. Mãga oopachida parãpa chik'o tai–it'ee netonaadamerã. 9 Tai mimiapata perã Cristo–it'ee, mãga iidik'ajida. Mamîda mãga ooda–e paji. Ak'ùpi k'inia p'anapachida Cristode ijãapataarã sãga p'anapataadaipia bù. 10 Parã ome p'anadak'ãri, na ûraa jarajida: “Nek'opidaik'araa bùda ajida, mimia k'inia–e bùmaa.” 11 Mamîda ârá taipa ûri p'anù parã t'ãidepemaarã ûk'uru mimiadak'aa. Jîp'a nipapata k'awaadait'ee awaraarãpa oomaa p'anù mãik'aapa jara p'anù. 12 Maperãpù Tachi Waibùa Jesucristopa taimaa jarapiru: mãgee eperãarã k'ãiwee mimiadaipia bù mãik'aapa chik'o atadaipia bù ãchi juadoopa.
13 Ichiaba apemaarã âpemaarãmaa ûraa p'anù ichita ne–inaa pia oopataadamerã, sêda–ee. 14 Mamîda parã t'ãidepemapa na k'art'ade ûraa jara bùk'a oo k'inia–e pùrã, awaraa ijãapataarãmaa nepùràtù mãik'aapa mãgà ik'aawaapa ãyaa p'anéetù, k'îra nejasia beemerã. 15 Mamîda k'îrak'aupai mãgà âpema Cristo k'aurepa k'îra unuamaa iru p'anadai. Jîp'a ûráatù pãchi âpema ûraapatak'a, irua oomerã Cristopa k'inia bùk'a.
16 Taipa k'inia p'anù Tachi Waibùapa parã ichita k'ãiwee p'anapimerã. Ichiata ichideerã mãgá bapipari, nepùra wêe p'anùde mãik'aapa nepùrade p'anù pùjida. Taipa ùt'aa iidi p'anù Tachi Waibùa parã jõmaarã ome ichita bapariimerã.
17 Mù, Pablopa nãgà salude p'ãru mùchi juadoopa k'awaadamerã mùa na k'art'a pëiru. Nãgá p'ãpari mùchi juapa mùa k'art'a jõma pëi bùde. 18 Mùa ùt'aa iidi bù Tachi Waibùa Jesucristopa parã jõmaweda pia ak'ù bapariimerã.
Mãgapai paji.