Tachi Waibùa Jesucristo waya chei naaweda
2
1 Ârá âpemaarã, taipa waapùara jaratee k'inia p'anù sãga pait'ee Tachi Waibùa Jesucristo chek'ãri ichideerã atade. 2 Parã enenee jõnù isapai k'îsia awara k'îsianaadamerã maa–e pùrã p'eranaadamerã, ûriruta pùrã Tachi Waibùa ewaa pacheji. Ijãanáatù jara p'anù pùjida Ak'õre Jaurepa apidaamaa mãga k'awapiji, maa–e pùrã mù it'aideepa mãga jaraji maa–e pùrã taipa k'art'ade mãga p'ãjida. 3 K'ûrapináatù apidaamaa. Cristo che–e pait'ee nãga p'asai naaweda. Naapùara eperãarã chok'araarãpa Tachi Ak'õre k'îra unuamaa iru p'aneedait'ee. Ma awara eperãarã t'ãide eperã aba waibùa uchiait'ee. Mãgùpa p'ek'au k'achia ooi awaa bait'ee perã, Tachi Ak'õrepa iru t'ùmà pëiit'ee k'achiade mianamerã. 4 Mamîda iru na eujãde bù misa, Tachi Ak'õre k'îra unuamaa iru bait'ee. Ma awara k'îra unuamaa iru bait'ee ne–inaa k'îra t'ãdoo, jõmaweda aù k'îrapite na p'ek'au eujãdepemaarã ùt'aa t'âpata. K'îsiait'ee ichi jõmaarã k'ãyaara waibùara bù. Mãga k'îsiait'ee perã, su–ak'ù beeit'ee Tachi Ak'õre te edupùara bù cuartode mãik'aapa jarait'ee ichita Tachi Ak'õre.5 ¿Parãpa k'irãpada–e p'anùk'ã mùa jarateeda parã ome bak'ãri? 6 Parãpa k'awa p'anù sãgap'eda mãgà eperã waide che–e. Abaapa ichi t'ùdùk'a iru bù chepiamaapa, Tachi Ak'õrepa ewari awara bùda ma–it'ee paru misa. 7 Mãgà eperã waide che–e bù mîda, ichi waibùapa nãgaweda eperãarãmaa merã k'achia oomaa bù, Tachi Ak'õrede ijãadaamaa p'aneedamerã. Mamîda tachia k'awa p'anù ma ewari awara bùda chi k'achia ooi awaa bee–it'ee che–e pait'ee chi t'ùdùk'a iru bùpa na p'ek'au eujãde bù misa. 8 Mãpai chi t'ùdùk'a iru bù na p'ek'au eujãdeepa uchiak'ãri, mãgà k'achia ooi awaa bù pait'ee k'achia oode. Mamîda Tachi Waibùa Jesupa ichi pedeepapai mãgà peeit'ee, ichi k'îra wãreede chek'ãri mãgà jõit'ee. 9 Satanapa mãgà eperã chok'a pëiit'ee eperãarã k'ûramerã. Mãga ooit'ee ne–inaa eperãarãpa waide unudak'aa ak'ùpi bùpa mãik'aapa ne–inaa eperãarãpa p'oyaa oodak'aa oo bùpa. Satanapa ma seewa oopiit'ee mãgà eperãmaa, eperãarãpa ijãadamerã mãgùta Tachi Ak'õre. 10 Mãgá k'achia oo bùpa wãara mãgùpa Tachi Waibùade ijãadaamaa p'anùùrã k'ûrait'ee. Mãgà ome ãchi auk'a k'achiadee wãdait'ee, Tachi Ak'õrepa wãarata jara pëida ijãa k'iniada–e p'anadairã. Wãarata ijãaruta pùrã, Cristopa ãchi ma o k'achiadeepa k'aripa atai. Mamîda mãga k'iniada–e pait'ee. 11 Maperãpù Tachi Ak'õrepa mãgà eperã chepiit'ee ãchi k'ûramerã ne–inaa oo bùpa Satanás k'ap'ùa pari. Mãgá Tachi Ak'õrepa wãarata jara pëida ijãadai k'ãyaara, seewa ijãa p'aneedait'ee. 12 Mãgá wãarata ijãadaamaa p'anadait'ee perã mãik'aapa k'achia ooi awaa p'anadait'ee perã, Tachi Ak'õrepa ãchi t'ùmà k'achiadee pëiit'ee, eperãarãpa oopatap'edaa ak'ùk'ãri ichi ewari waibùa ewate.
Cristopa ichideerã o k'achiadeepa k'aripa atapari
13 Âpemaarã, ijãadak'aa beerã ome mãga p'asait'ee mîda, parã ãchik'a p'ana k'iniada–e, Cristode ijãapata perã. Mapa taipa ichita gracias jara k'inia p'anù Tachi Ak'õremaa parã pari. Tachi Waibùapa parã k'inia iru bù. Maperã na eujã ooi naaweda, Tachi Ak'õrepa parã jùrùt'eraji ûridamerã Cristopa ooda eperãarã k'aripait'ee mãik'aapa ijãadamerã iruata parã o k'achiadeepa k'aripa atai. Ak'õrepa ichi Jaure pëi k'inia baji parã awara bùmerã ichi–it'ee, ma wãarata ijãadak'ãri. 14 Ma–it'eeta ichia tai pëiji parãmaa jarateede. Ichia parã jùrù baji ijãadamerã taipa jarateepata Cristode. Ichiaba parã jùrùji tai ome auk'a iru p'anadamerã jõma ichia k'îsia iru bù ichideerã–it'ee, Tachi Waibùa Jesucristok'a ùt'ari k'îra wãree p'aneedak'ãri.
15 Âpemaarã, maperã chóotù Cristode ijãa p'anùde mãik'aapa k'îra atuanáatù taipa parãmaa jarateepatap'edaa, pedee jaradapa wa k'art'ade p'ãdapa.
16 Taipa ùt'aa iidi p'anù Tachi Waibùa Jesucristopa mãik'aapa Tachi Ak'õrepa parã k'aripadamerã na eujãde p'anù misa. K'irãpátù Tachi Ak'õrepa tachi Cristode ijãapataarã audú k'inia iru bapari perã, tachi ichita k'aripapari na eujãde p'anù misa. Ichiaba tachi t'ãri o–îapipari k'îsiapik'ãri tachia ne–inaa unudait'ee na p'ek'au eujãdeepa uchiadap'eda, wãdak'ãri iru truadee. 17 Irua parã t'ãridepai choopipari ijãa p'anùde, mãgá ichita pedee pia jaradamerã mãik'aapa ne–inaa jõmaweda pia oodamerã.