2 TESALONICENSES
San Pablopa K'art'a T'êepema P'ãda Tesalónica P'uurudepema Ijãapataarãmaa
Salude pëida
1
1 Mù, Pablo Silvano ome mãik'aapa Timoteo paara na k'art'a p'ã pëiruta parã ijãapataarãmaa, Tesalónica p'uurude p'anù. Taipa k'awa p'anù parã Tachi Ak'õredeerã mãik'aapa Tachi Waibùa Jesucristodeerã, wãara ijãapata perã. 2 Taipa k'inia p'anù Tachi Ak'õrepa mãik'aapa Tachi Waibùa Jesucristopa parã pia ak'ù p'anadamerã. Mãgá k'ãiwee p'anapataadait'ee.Sãga Tachi Ak'õrepa ijãadak'aa beerã ak'ùit'ee Cristo waya chek'ãri
3 Âpemaarã Cristo k'aurepa, ichita gracias jarapata Tachi Ak'õremaa parã jõmaarã pari. Taipa wãara mãga oodaipia bù, ârá parã waapùara Cristode ijãapata perã, naaweda ijãa p'anadap'edaa k'ãyaara. Ichiaba ârá audupùara chik'inia p'anapata awaraa ijãapataarã ome. 4 Mãgá p'anapata perã, taipa mãga o–îa nepùrùpata awaraa Ak'õrede ijãapataarãmaa, ãra t'ãide nipadak'ãri. Nepùrùpata sãga parã choopata Cristode ijãa p'anùde. Mãgá choopata ijãadak'aa beerãpa parã jùrù p'anù mîda miapidait'ee, ma ijãa p'anù k'aurepa. Ichiaba mãgá choopata chupùria chitoonù mîda. 5 Mãgá choopata perã ãchia parã miapi iru p'anù misa, ak'ùpipata wãara Tachi Ak'õrepa parã k'aripapari mãik'aapa parã pia ak'ùpari. Ma awara irua parã mãgá pia ak'ùpari perã, parãpa k'awa p'anù ewari cherude wãara iru truadee wãdait'ee.
6 K'awa p'anù Tachi Ak'õrepa eperãarãpa oopata ak'ùpari jarait'ee pia wa k'achia. Maperã ichiaba k'awa p'anù irua parã miapi p'anùùrã auk'a miapiit'ee. 7 Jõdee parã waa nepùra unuda–e pait'ee, tai jida ichiaba, irua tachi auk'a k'ãiwee p'anapik'ãri ichi truade. Mãga ooit'ee Tachi Waibùa Jesús ùt'ariipa chek'ãri ichi angeleerã ome. Ma ewate jõmaarãpa ãra unudait'ee t'ùpùtau urua pùk'a nâbùde. 8 Ma ewate Jesupa miapiit'ee Tachi Ak'õre k'awa k'iniada–e p'anùùrã mãik'aapa ijãadaamaa p'anùùrã Tachi Ak'õrepa jara pëida Tachi Waibùa Jesudé. 9 Mãùrã atuadait'ee. Ichita k'achiade p'anadait'ee mãik'aapa t'ùmà p'anadait'ee Tachi Waibùa bùmãiipa. Ak'õre Waibùa truadee wãda–e pait'ee. Unuda–e pait'ee iru k'îra wãree mãik'aapa irua ne–inaa pi–ia oo bù. 10 Ma ewate Jesús chek'ãri, ichi k'îra wãree unupiit'ee ichideerã k'ap'ùa pari. Jõma irude ijãa p'anùùrã o–îa ùt'aa t'âdait'ee irumaa, wãara k'awaadait'ee perã iru k'îra wãree. Ma ewate parã jida auk'a p'anadait'ee, taipa jarateepata ijãadap'edaa perã.
11 Maperã tai ichita ùt'aa t'âpata Tachi Ak'õremaa, irua parã pia ak'ùmerã. Iruata parã jùrùji Cristode ijãapataadamerã mãik'aapa irua k'inia bùk'a p'anapataadamerã. Iidi p'anù irua oopimerã jõmaweda parãpa ne–inaa pia oo k'inia p'anù iru Jaure k'ap'ùa pari. 12 Mãga iidi p'anù parãpa mãgá ne–inaa pia oodak'ãri, awaraarãpa Tachi Waibùa Jesús t'â pia t'o p'anadamerã parã k'aurepa. Ma awara ãrapa parã jida pia ak'ùdait'ee, Tachi Ak'õre Tachi Waibùa Jesucristo ome parã mãgá k'aripapata perã.