1 TIMOTEO
San Pablopa K'art'a Naapùara P'ãda Timoteomaa
Salude pëida
1
1 Mù, Pablopa na k'art'a p'ã pëiru Timoteomaa. Tachi Ak'õrepa k'inia bada perã, mù jùrùt'eraji Jesucristopa pëimerã ichi ûraa jarateede. K'awa p'anù eperãarãpa Jesucristode ijãadak'ãri, Tachi Ak'õrepa ãra k'aripait'ee atuanaadamerã. Mapa tachia ijãapata mãik'aapa nùpata irua jaradak'a oomerã. 2 Timoteo, pù mùchi warrak'a, Cristode ijãapari perã mù k'aurepa. Mùa ùt'aa iidi bù Tachi Ak'õrepa mãik'aapa Tachi Waibùa Jesucristopa pù pia ak'ù p'anadamerã mãik'aapa chupùria k'awaadamerã. Mãgá pù k'ãiwee bapariit'ee.K'îrak'aupai seewa jarateepataarãpa jarateepata ijãadai
3 Naaweda mùa enenee nâbaji pù beemerã Éfeso p'uurude, mù mamãik'aapa uchiak'ãri wãit'ee Macedonia eujãdee. At'ãri k'inia bù jãma beemerã, jãpemaarã ûk'uruurãpa ne–inaa awara jarateemaa p'anadairã mùa jaratee ni k'ãyaara. Jaráji ma seewa waa jarateenaadamerã. 4 Ichiaba ûráaji jarateenaadamerã judiorã chonaarãpa chonaarãweda nepùrùdap'edaa. Jùrùdaik'araa bù ãchi chonaarãdeepa uchiadap'edaarã t'â p'ã p'e iru p'anù ak'ùpidait'ee jõmaarãmaa. Mãga oodak'ãri, aupedeepipata ijãapataarãmaa mãik'aapa maarepida k'aripada–e waapùara ijãadamerã mãik'aapa oodamerã Tachi Ak'õrepa k'inia bùk'a.
5 Mùa jaraji mãùrã mãgá ûraamerã k'inia bairã ijãapataarã chik'inia p'anapataadamerã. Mãga p'anapataadai wãara ijãadak'ãri mãik'aapa t'ãripa oo k'inia p'anadak'ãri Tachi Ak'õrepa oopi bùk'a, k'îsia p'ua wêe. 6 Mamîda ârá jãpemaarã ûk'uruurãpa mãga ooda–e p'anù. Ma k'ãyaara awaraa k'îsia atajida. Mapa pariatua pedee wãpata. 7 Tachi Ak'õre Ûraa jaratee k'inia p'anùda a p'anù. Mamîda wãara k'awada–e p'anù irua jara k'inia bada ma ûraa Moisemaa p'ãpik'ãri. K'îsia k'awaa beerãk'a jaratee p'anù mîda, mãga p'anù–e.
8 Tachia k'awa p'anù Tachi Ak'õrepa Moisemaa ûraa p'ãpida pia bù, ma ûraade ijãa p'anù pùrã Ak'õrepa k'inia bùk'a. 9 Ichiaba k'awa p'anù Tachi Ak'õrepa ichi ûraa p'ãpi–e paji t'ãri pia beerã–it'ee. Ma k'ãyaara p'ãpiji nãgeerã–it'ee: oodaamaa p'anùùrã iru ûraade jara bùk'a; t'ãri k'achia–idaa beerã; p'ek'au k'achia ooyaa beerã; irude ijãadak'aa beerã; ak'õreerã peepataarã mãik'aapa eperã peepataarã; 10 miak'ãi p'anùùrã awaraarã ome k'ãipataarã; ùmùk'îraarã awaraa ùmùk'îra ome k'ãipataarã wêraarã ome k'ãirutak'a; chîara atapataarã esclavo papidait'ee; seewa–idaa beerã; seewa wãarak'a jarapataarã awaraarã k'îrapite ijãadamerã; mãgeerã–it'ee mãik'aapa jõma irua jara pëidak'a oodaamaa p'anùùrã–it'ee.a 11 Irua pedee pia jara pëiji ichi Warra Jesucristo k'ap'ùa pari. Mapa Cristópata Tachi Ak'õre k'îra wãree unupiji na p'ek'au eujãde nipak'ãri. Tachi Ak'õre, chi audú t'ãri pia baparipa, mù jùrùt'eraji Cristopa ooda eperãarã k'aripait'ee jarateenamerã.
Tachi Ak'õrepa Pablo chupùria k'awaada
12 Mùa gracias jara bù Tachi Waibùa Jesucristomaa. Ichiata mù k'aripapari k'awa bairã mùa ooit'ee ichia oopi bùk'a. Mapa mù jùrùt'eraji na mimia oomerã. 13 Mù chupùria k'awaaji, naaweda mùa ne–inaa k'achia k'îra t'ãdoo ooji mîda. Iru ãpùte mãik'aapa irudeerã ãpùte ik'achia jarapachi. Ma awara irudeerã jùrùji miapiit'ee. Mãga ooji waide k'awa–e bada perã iru cheji eperãarã k'aripait'ee mãik'aapa waide irude ijãa–e bada perã. 14 Mamîda iru audú t'ãri pia bapari perã, mãga k'awapiji mùmaa. Mãgá mùa irude ijãa beeji mãik'aapa iru k'aurepa k'awaaji awaraarã k'inia iru bait'ee.
15 Jõmaarãpa nãgà pedee ijãadaipia bù wãara perã. Jesucristo na p'ek'au eujãdee cheji p'ek'au k'achia oopataarã k'aripait'ee atuanaadamerã. Mùa ma pedee pia k'awa bù, mù chi p'ek'au k'achia oopari k'achiara bairã. 16 Maperãpù Jesucristopa mù chupùria k'awaaji ak'ùpiit'ee ichia mù ome chooda. Mãgá chooit'ee jõma p'ek'au k'achia oopataarã ome, irude ijãaruta pùrã. K'inia bù jõmaarãpa ijãadamerã mãik'aapa ichita ichi ome p'anapataadamerã. 17 Maperã o–îa ùt'aa t'âdáma Tachi Ùt'aripema Reymaa. Iru jõmaarã k'ãyaara waibùara bù. Iru trua ichita bapari. Iru aupaita Tachi Ak'õre. Ichita bapari. Eperãarãpa iru unudak'aa. ¡Amén!
18 Timoteo, pù mùchi warrak'a bairã, mùa na ûraa jararu. K'irãpáji Tachi Ak'õrepa jarapida pùmaa ichi pedee jarapataarã it'aideepa. Ma jaradap'edaak'a ook'ãri, k'îsia p'ua–ee chooit'ee wãarata ijãa bùde, soldaopa chooparik'a ãpùtee wã–ee chõo jõnùde. 19 Ûk'uruurãpa mãga ooda–e p'anù. Mãùrãpa k'awa p'anù Cristopa oopi bùk'a oodaipia bù. Mamîda irude ijãa amaa p'aneejida. Barco k'uadák'apù p'anù, jõdait'ee perã. 20 Himeneo mãik'aapa Alejandro mãga p'anù. Mapa mùa ãchi bùji Satanás juade ichia oo k'iniata oomerã ãchi ome. Mãgá k'awaadai ik'achia jaradaik'araa bù Tachi Ak'õre ãpùte.