Sãga ùt'aa t'âdaipia bù chip'edaidak'ãri
2
1 Naapùara ûraait'ee parã Cristode ijãapataarã chip'edaidak'ãri, jõmaarã pari ùt'aa t'âdamerã, Tachi Ak'õrepa ãra k'aripamerã. Chupùria iidítù pãchi pari mãik'aapa awaraarã pari mãik'aapa gracias jarátù Tachi Ak'õremaa irua ne–inaa jõma ooda pari. 2 Ichiaba ùt'aa t'âdaipia bù na p'ek'au eujãdepemaarã poro waibùarã pari mãik'aapa jõmaweda eperãarã ak'ùpataarã pari. Mãgá tachi k'ãiwee p'anapataadait'ee. Ma awara mãgá oodait'ee Tachi Ak'õrepa k'inia bùk'a mãik'aapa jõmaarã taide k'îra jîp'a nipadait'ee. 3 Mãgá ùt'aa t'âdak'ãri, pia oopata mãik'aapa Tachi Ak'õre, Tachi K'aripapari, o–îapipata. 4 Ichia eperãarã jõmaweda o k'achiadeepa k'aripa ata k'inia bù. K'inia bù jõmaarãpa ichi wãarata k'awaadamerã. 5 Tachi Ak'õre apai mãik'aapa eperã apaipa eperãarã t'ãri auk'a bùpii iru ome. Mãgà eperã Jesucristo. 6 Tachi Ak'õrepa k'îsia iru bada ewate Cristo ita–aria peepiji jõmaarã pari, eperãarãpa p'ek'au k'achia oopata k'aurepa. Mãga ooji eperãarã uchiapiit'ee ma p'ek'au k'achia jua ek'ariipa ùt'aa wãdamerã. Tachi Ak'õrepa k'inia bù jõmaarãpa mãga k'awaadamerã.a 7 Ma–it'eepù ichia mù bùji mãga jarateemerã. Mù jùrùt'eraji Cristopa pëimerã ichi ûraa jarateede. Audú k'inia bù mùa ma wãara pedee jarateenamerã judio–eerãmaa, ãchia ichiaba ijãadamerã. Wãara jara bù; seewa–e.8 Mùa k'inia bù ijãapataarã chip'edaidak'ãri, ùmùk'îraarã t'ãri pia beerãpa ãchi jua ùt'aa ùadap'eda, ùt'aa t'âdamerã jõmaarã pari. Mamîda ãchidepema k'îrau bù pùrã maa–e pùrã nepùrade bù pùrã awaraa eperã ome, ùt'aa t'âik'araa bù.
9 Ichiaba k'inia bù ijãapataarã wêraarãpa p'aru jâdamerã wêra p'aru jîp'a jâpataarãpa jâpatak'a. K'îra wãree p'anadait'ee mak'ùara chi–oodaik'araa bù jâdait'ee net'aa nêedee ooda, perladee ooda, p'aru âpùadee ooda maa–e pùrã puda pi–ia bida p'anùùpa. 10 Ma k'ãyaara p'anadaipia bù Tachi Ak'õrede wãara ijãapata wêraarãk'a; ne–inaa pia oomaa awaraarã k'aripadait'ee.
11 Ijãapataarã chip'edaidak'ãri Tachi Ak'õre Ûraa ûridait'ee, wêraarãpa k'îup'ee ûridaipia bù, ãchi k'îsia jarada–ee. Ãchi jarateepataarã ichita waawee p'anadaipia bù. 12 Mùa wêraarãmaa ùmùk'îraarã jarateepik'aa maa–e pùrã chok'a pëipik'aa. K'îup'ee p'anadaipia bù ijãapataarã see jõnù misa. 13 Mùa mãga jaraji Tachi Ak'õrepa eperãarã ook'ãri, naapùara Adán oop'eda, Eva ooda perã.b 14 Ma awara Netuara Poro Waibùapa Adán k'ûra–e paji. Evata k'ûrat'aaji. Mãgá Evata naapùara k'achiade baaiji.c 15 Ma k'aurepa eperãarã jõmaweda o k'achiade p'aneejida. Mamîda wêraarã paara ma o k'achiadeepa uchiadai Cristode ijãaruta pùrã mãik'aapa k'îra jîp'a ooruta pùrã Tachi Ak'õrepa k'inia bùk'a; ãchideerã pia ak'ùpataadamerã mãik'aapa awaraarã k'inia iru p'anapataadamerã.