Sãga ijãapataarã ak'ùpataarã p'anapataadaipia bù
3
1 Eperãarãpa wãarata jarapata jaradak'ãri: “Eperã ijãapataarã ak'ùpari pa k'inia bù pùrã, pia bùda” apata. 2 Maperã ijãapataarã ak'ùpari jõmaarã k'îrapite t'ãri pia baipia bù; wêra apai iru baipia bù; k'îra jîp'a; ne–inaa pariatua oo–ee; awaraarã auteebai k'awaa ichi temãi; pia jaratee k'awaa; 3 toyaa bak'aa; k'îrauyaa mãik'aapa nepùra jùrùyaa bak'aa; ma k'ãyaara ne–inaa pia oopari; p'arat'a ata k'iniayaa bak'aa. 4 Ichi te pidaarã pia ak'ù baipia bù, chi warrarãpa ichi waaweedamerã mãik'aapa chok'ek'ee p'anadamerã. 5 Ùmùk'îrapa ichi te pidaarã p'oyaa pia ak'ù–e bù pùrã, ¿sãga Tachi Ak'õrede ijãapataarã ak'ùima? 6 Eperã ewaa Cristode ijãa bù pùrã, ijãapataarã ak'ùpari paik'araa bù, auduadarii perã mãik'aapa Tachi Ak'õrepa atuapii perã Netuara Poro Waibùa atuapidak'a. 7 Ijãapataarã ak'ùpari t'â pia t'o p'anadaipia bù, Cristode ijãadak'aa beerãpa paara. Mãga–e pùrã, Netuara Poro Waibùapa iru ãpùte ne–inaa k'achia nepùrùpii eperãarãmaa, jõmaarãpa ma k'aurepa iru pia–e ak'ùdamerã.Sãga ijãapataarã k'aripapataarã p'anapataadaipia bù
8 Ijãapataarã k'aripapataarã diácono apata auk'a t'ãri pia p'anadaipia bù; k'îra jîp'a; jîp'a pedeepata; seewa jaradak'aa mãik'aapa chîara ãpùte pedee k'achia pedeedak'aa; toyaa p'anadak'aa; p'arat'a ata k'iniayaa p'anadak'aa. 9 Tachi Ak'õrepa wãarata k'awapida Cristo k'ap'ùa pari t'ãripa ijãadaipia bù, k'îsia p'ua–ee. 10 Ãchi mimiade t'îudai naaweda, awaraa ijãapataarãpa ãchi p'anapata pia ak'ùdaipia bù k'awaadait'ee wãara p'anapata Tachi Ak'õrepa k'inia bùk'a wa mãga–e. Ùmùateeda wêe uchiaruta pùrã, ijãapataarã k'aripapataarã p'aneedai. 11 Wêraarãa ijãapataarãpa awaraa ijãapataarã ichiaba k'aripapataadai. Ãchi t'ãri pia p'anadaipia bù; k'îra jîp'a; chîara ãpùte pedee k'achia pedeeda–ee; ne–inaa pia oopata mãik'aapa ichita oopata ãchia jara p'anùk'a. 12 Ijãapataarã k'aripaparipa wêra apai iru baipia bù. Pia ak'ùipia bù ichi warrarã mãik'aapa awaraarã ichi tede p'anapata. 13 Mãgà k'aripapataarãpa ãchi mimia pia ooruta pùrã, ijãapataarãpa ãra t'â t'o p'anadait'ee. Mãpai ãrapa waawee–ee jaradait'ee ãchia Jesucristode ijãa p'anù.
Tachi Ak'õrepa wãarata jara pëida
14 Taarã–ee mù wã k'inia bù pù ak'ùde. 15 Mamîda taarãru pùrã, na p'ãdapa pùa k'awaait'ee sãga p'anapataadaipia bù apemaarã ijãapataarã ome. K'irãpapíji tachi ijãapataarã jõmaweda Tachi Ak'õredeerã. Iru ichita bapari tachi ome mãik'aapa iru wãarata jara pëiji tachimaa jâadamerã mãik'aapa jõmaarãmaa jarateedamerã. 16 Wãara, awaraarãpa ma wãarata jara pëida k'awada–e p'anù mîda, tachia k'awa p'anù ma k'ãyaara ne–inaa pipùara wê–e. Mapa Tachi Waibùamaa nãga k'aripata:
Na p'ek'au eujãdepemaarãmaa pùa unupipachi eperã jîp'aak'a. K'achia oo–ee bapachi Ak'õre Jaure k'aurepa. Angeleerãpa pù unupachida. Na p'ek'au eujãdepemaarãpa ûripachida pùa ooda eperãarã k'aripait'ee mãik'aapa chok'araarãpa pùde ijãapachida. Tachi Ak'õrepa pù ateeji ùt'aa, ichi trua k'îra wãree nâbùde ichita bapariimerã.