Ûraa p'ãda ijãa amaadap'edaarãde
4
1 Mamîda Tachi Ak'õre Jaurepa jîp'a jara bù: Ak'õre ewari waibùa ewate pai naaweda, eperãarã ûk'uru ma wãarade ijãa amaadait'ee. Cristode ijãadai k'ãyaara, k'ûrapidait'ee netuaraarãmaa mãik'aapa ijãadait'ee ma netuaraarãpa jarateepirutade. 2 Ma netuaraarã jua ek'ari jarateepataarãpa jarapata: “Tachi Ak'õre Ûraa jarateemaa p'anùda” apata. Mamîda seewamaa p'anù. Ãchi–it'ee p'ua–e bù ijãapataarã k'ûradait'ee. Tachi Ak'õre Jaurepa jarateepi bùk'a p'oyaa jarateeda–e, netuaradeerã perã. 3 Jãgùùrãpa ûraapata miak'ãidaik'araa bù mãik'aapa chik'o ûk'uru k'odaik'araa bù. Mamîda tachia Ak'õre Ûraa wãarade ijãapata perã, k'awa p'anù irua ne–inaa jõma ooji, gracias jaradap'eda k'odamerã. 4 Jõmaweda Tachi Ak'õrepa ooda pia bù.a Maperã tachia ùt'aa t'âruta pùrã gracias jaradait'ee Tachi Ak'õremaa nek'opata pari, chik'o jõmaata k'odaipia bù. 5 Tachi Ak'õre k'îrapite tachi nek'opata pia bù, irua mãga jarada perã mãik'aapa tachia gracias jarapata perã irumaa ma chik'o pari.Sãga ooit'ee Cristopa oopi k'inia bùk'a
6 Arii p'anù âpemaarãmaa mù ûraa jaratéeji. Mãga ooru pùrã, pia ooit'ee Jesucristopa oopi k'inia bùk'a. Iru mimiapari pia bait'ee ijãa bù misa Tachi Ak'õrepa jara pëida iru k'ap'ùa pari mãik'aapa k'awaa wãru misa irua jarapida ichia jùrùt'eradaarãmaa.
7 Mamîda t'îunáaji ma chonaarãweda nepùrùdap'edaa jarateepataarã ome. Jãgùùrãpa jarateeda–e Tachi Ak'õrepa jarapidak'a. Jarateepata chõtrãarãpa ûri k'inia p'anapata cuentok'a. Ãchi ome aupedeei k'ãyaara, jùràji pipùara k'awaait'ee Tachi Ak'õrepa jara pëida mãik'aapa óoji irua oopi bùk'a. 8-9 Jõmaarãpa nãgà pedee ijãadaipia bù, wãara perã. Tachi p'iradak'ãri juataura p'aneedait'ee, tachi k'ap'ùa k'aripapata. Mamîda Tachi Ak'õrepa jara pëida k'awaa wãdak'ãri, tachi jaure paara k'aripapata. Mãgá na p'ek'au eujãde p'anù misa, k'ãiwee p'anapata mãik'aapa k'awaapata tachi piudak'ãri, ùt'aa wãdait'ee. 10 Ma–it'eeta tachi choopata na mimiade, eperãarãpa ma ûraa jara pëidade ijãadamerã. Eperãarã ûk'uruurãpa tachia jarateepata ûridaamaa p'anù mîda, ijãa p'anù Tachi Ak'õre ichita bapari mãik'aapa irua aupaita na p'ek'au eujãdepemaarã jõmaweda ak'ùpari. Wãara, tachi Cristode ijãapataarã pipùara ak'ùpari, tachi o k'achiadeepa k'aripa atapari perã.
11 Mùa jõma jara aupada jaratéeji jãpemaarã ijãapataarãmaa mãik'aapa jaráji mãga oodamerã. 12 K'îsiapináaji apidaamaa pù pedee ûridaik'araa bù, pù mak'ùara chonaa–e bairã. Ma k'ãyaara ak'ùpíji pùa wãara oo k'inia bù Cristopa oopi bùk'a, ãrapa auk'a oodamerã. Nãga baparíiji: ne–inaa pia jarapari; k'îra jîp'a nipapari jõmaarã ome; awaraarã k'inia iru bapari; nepùrade bù mîda, Cristode ijãapari; ne–inaa k'achia oo–ee bapari; jõma oopari Tachi Ak'õrepa k'inia bùk'a. 13 Mù jãmaa wãru misa, ijãapataarã chip'edaidak'ãri, léeji Tachi Ak'õre Ûraa p'ãdap'edaa. Jaratéeji k'asaa jara k'inia bù mãik'aapa ûráaji ijãapataarã p'anapataadamerã ma jara bùk'a. 14 K'irãpáji Tachi Ak'õre pedee jarapataarãpa jaradap'edaa pùmaa, ijãapataarã ak'ùpataarãpa ãchi jua bùdak'ãri pù ârù. Mãga oodak'ãri, Tachi Ak'õre Jaurepa ne–inaa oopiji pùmaa k'awaamerã k'ãare mimia ooit'ee Tachi Ak'õre–it'ee. Mãga óoji Ak'õre Jaurepa oopi bùk'a.
15 K'îsíaji mùa ûraadade na k'art'a p'ãdade mãik'aapa t'ãripa óoji aùde jara bùk'a. Mãga ooru pùrã, awaraarãpa ak'ùdait'ee pùa naawedapema k'ãyaara pipùara oomaa bù. 16 K'îra jîp'a óoji Cristopa k'inia bùk'a mãik'aapa jaratéeji irua jarapi bùk'a. Chóoji mãga oo bùde k'awa bairã mãga oo bùpa, pù Ak'õre truadee wãit'ee mãik'aapa pùa jaratee bù ûrirutaarã auk'a wãdait'ee, pù k'aurepa Cristode ijãadak'ãri.