Esclavoorã sãga p'anadaipia bù
6
1 Esclavo Cristode ijãa bùpa chipari waaweeipia bù, ichi k'aurepa ijãadak'aa beerãpa ik'achia pedeenaadamerã Tachi Ak'õre ãpùte mãik'aapa taipa jarateedap'edaade. 2 Chipari ichiaba Cristode ijãa bù pùrã, ma esclavopa k'îsiaik'araa bù oo–e pait'ee jõma chiparipa oopi bùk'a, ichi âpema perã Cristo k'aurepa. Ma k'ãyaara audupùara t'ãripa ooipia bù chiparipa oopi bùk'a iru k'aripait'ee mãik'aapa ak'ùpiit'ee iru k'inia iru bù Cristo k'ap'ùa pari. Ma jõma jara aupada jãpema ijãapataarãmaa jaratéeji mãik'aapa ûráaji mãga oodamerã.Seewa jarateepataarã<R>mãik'aapa p'arat'a audú ata k'inia p'anùùrã
3 Timoteo, abaapa jarateeru pùrã Tachi Waibùa Jesucristopa pedee wãara jarateeda awara maa–e pùrã iru jùrùt'eradaarãpa jaratee p'anù awara, mãgùpa ooamaa bù Tachi Ak'õrepa k'inia bùk'a. 4 Jãgee eperã audua bù mãik'aapa wãara maarepida k'awa–e bù. Aupedeei awaa bapari Ak'õre Ûraade pedee jara k'inia bù k'aurepa mãik'aapa ichi t'ãridepai k'achia k'îsiapari. Ichi jaratee bù k'aurepa ijãapataarã k'îra unuamaa para beepari; k'îraupik'a para beepari; ik'achia pedee para beepari mãik'aapa chîara pedee ijãada–e para beepari. 5 Ichi mãik'aapa ichi jîak'aarã k'îsia k'awada–ee p'anù. Jîp'a aupedee k'inia p'anù, Tachi Ak'õre wãarata waa k'awa k'iniada–e p'anadairã. Jara wãpata “taita ijãa p'anùda” apata, p'arat'a ata k'inia p'anadairã ãchia jaratee p'anù pari.
6 Jõdee Cristode wãara ijãapataarã nãga p'anapata: t'ãri o–îa; k'ãiwee; awaraarã k'inia iru p'anapata. P'arat'a iru p'anù jida wa wêe p'anù pùjida, auk'a t'ãri o–îa p'anapata. 7 Tachi t'odak'ãri, maarepida net'aa wêe t'ojida mãik'aapa waya mãga p'anadait'ee piudak'ãri. 8 Maperã ne–inaa k'opari mãik'aapa p'aru jâpari iru p'anù pùrã, tachi ijãapataarã t'ãri o–îa p'anadait'ee. 9 Mamîda eperãarã ûk'uru, audú p'arat'a ata k'iniapa, k'îsia k'awa–eedaipata mãik'aapa k'achiade baaipata. Maap'eda bigi p'oyaa lazodeepa uchia–e bùk'a, mãga pùk'a ãra ma k'achiadeepa p'oyaa uchiada–e p'aneepata. Mãgapù eperãarã atua wãpata. 10 Mapa chi audú p'arat'a ata k'inia bùpa k'achia k'îra t'ãdoode baaiit'ee. Wãara, p'arat'a ata k'iniapa ûk'uru ijãapataarãpa paara Cristode waa ijãa k'iniada–e. Mãùrã k'îsia p'ua p'anapata mãik'aapa ãchi t'ãride mia chitoonù, k'achiade baaidap'edaa perã.
Pablopa t'êe ûraada Timoteomaa
11 Timoteo, oonáaji mãùrãpa oopatak'a, Tachi Ak'õrepa pù jùrùt'erada perã ichi–it'ee. Jîp'a óoji Cristopa oopi bùk'a, irude wãara ijãa bairã. Chóoji Tachi Ak'õrepa jara pëida k'awa bùde mãik'aapa t'ãri pia ma wãarata jaratéeji ãramaa. Ãra k'inia iru báji Tachi Ak'õrepa ãra k'inia iru bùk'a. 12 Ara chõoparipa jùrùparik'a p'oyaait'ee, mãga pùk'a jùràji pipùara ijãapariit'ee Cristode mãik'aapa oopariit'ee irua oopi bùk'a, ijãapari perã mãga oop'eda ichita bapariit'ee Tachi Ak'õre truade. Ma–it'eeta Tachi Ak'õrepa pù jùrùji, eperãarã chok'ara nâbù taide waawee–ee jarak'ãri pù Cristode ijãa bù. 13 Ârá mùa na ûraa jarait'ee Tachi Ak'õre k'îrapite. Irua ne–inaa jõmaweda chok'ai bapipari. Ichiaba nãga jarait'ee Jesucristo k'îrapite. Irua Poncio Pilatomaa waawee–ee pedeeji. 14 Nejõmaata óoji mùa pùmaa jaradak'a. Mãga oo bù misa, parã ijãapataarã t'ãide t'îupináaji k'îsia awara wa jarateeru awara apida. Chóoji mãga oo nâbùde Tachi Waibùa Jesucristo waya cheru misa na eujãdee. Mãgá apidaapa pù ùtrùada–e pai. 15 Tachi Ak'õre Waibùapa iru pëi k'inia bak'ãri, cheit'ee. Tachi Ak'õre aupai t'ãri piara bù mãik'aapa jõmaarã k'ãyaara waibùara bù; jõmaweda reyrã k'ãyaara mãik'aapa jõmaweda na p'ek'au eujãdepemaarã poro waibùarã k'ãyaara. 16 Iru aupai ichita bapari. Apida iru k'ait'a wãda–e pai, iru k'îra wãree âdaa chooda–e pai perã. Mapa apidaapa iru unuda–e pai. ¡Tachi Ak'õre k'îra wãree! Jõmaweda iru jua ek'ari ichita p'anadait'ee. ¡Amén!
Ûraa ijãapataarã p'arat'ara beerã–it'ee
17 Jaráji p'arat'ara beerãmaa na p'ek'au eujãde mãgá p'arat'ara p'anù misa, k'îsianaadamerã ãchi pipùara p'anù awaraarã k'ãyaara. Ichiaba jaráji ijãadai k'ãyaara ãchi ne–inaa k'îra t'ãdoo jõparide, ijãadamerã Tachi Ak'õrede, iru jõk'aa perã. ¡Iru t'ãri pia bapari perã tachi ome, teepari jõma tachia iru p'anù o–îa p'anadamerã! 18 Maperã jaráji ãramaa t'ãri pia teedamerã awaraarãmaa mãik'aapa t'ãripa ne–inaa pia oodamerã awaraarã k'aripait'ee. 19 Mãga ooruta pùrã, t'êepai ne–inaa pipùara iru p'anadait'ee p'arat'a k'ãyaara. ¡Ichita p'anapataadait'ee Tachi Ak'õre ome mãik'aapa iru p'anadait'ee jõmaweda irua k'îsia iru bù ichideerã–it'ee!
20 Timoteo, jçaji Tachi Ak'õrepa wãarata pùmaa jara pëida. Ûrináaji jã pariatua pedee wãpataarã, ãchi k'îsiadeepa seewa jarateepata perã. “K'îsia k'awaa p'anùda” a p'anù. Mamîda mãga p'anù–e. 21 K'îsia k'awaa p'anadai k'ãyaara, Tachi Ak'õrepa wãarata jara pëidade ijãa amaa p'anù, awaraa k'îsiade ijãa k'inia p'anadairã.
Mùa k'inia bù Tachi Ak'õrepa pù pia ak'ù bapariimerã mãik'aapa nejõmaade k'aripamerã.
Mãgapai paji.