Sãga p'anapataadaipia bù Tachi Ak'õrepa tachi pia ak'ùmerã
4
1 Mãpai âpemaarã, Cristopa tai jùrùt'erada perã ichi ûraa jarateedamerã, nãga ûraa p'anù parãmaa. Taipa mãik'aapa Tachi Waibùa Jesupa k'inia p'anù parã p'anapataadamerã taipa jarateedap'edaak'a. Mãgá p'anadak'ãri, Tachi Ak'õrepa parãpa oopata pia ak'ùit'ee. Ârá wãara mãgá p'anapata. Mamîda taipa k'inia p'anù waapùara oodamerã Cristopa oopi bùk'a parãmaa.2 Parãpa k'awa p'anù taipa jarateedap'edaa, parã t'ãide nipadak'ãri. Jarajida Tachi Waibùa Jesucristopa jarapidak'a. 3 Tachi Ak'õrepa k'inia bù awara p'anapataadamerã ijãadak'aa beerã k'ãyaara. K'inia bù parãpa ne–inaa jõmaweda oodamerã irua oopi bùk'a. Mapa taipa nãga ûraa p'anù. P'ek'au oonáatù awaraarã ome. 4 Ma k'ãyaara k'awaadaipia bù nãga oodait'ee. Wêra k'inia bù pùrã, ma wêra ome béeji mãik'aapa t'ãri pia baparíiji iru ome. Aù ome k'ãiparíiji, awaraa jùrù–ee. Parãpa mãgá ooruta pùrã, pia oodait'ee Tachi Ak'õre k'îrapite mãik'aapa awaraarã k'îrapite. 5 P'ananáatù ijãadak'aa beerã p'anapatak'a. Ãchi pariatua p'ek'au oo wãpata chîara wêra ome, Tachi Ak'õre k'awada–e p'anadairã. 6 K'îrak'aupai pãchi âpemaarã Cristo k'aurepa k'ûradai, mãga oo p'anùùpa ãchi wêraarã ome. Mãgá k'achia ooruta pùrã, Tachi Ak'õrepa parã miapiit'ee, taipa naaweda jaradap'edaak'a. 7 Tachi Ak'õrepa tachi jùrù–e paji k'achiade p'anapataadamerã. Jùrùji p'anapataadamerã ichia k'inia bùk'a. 8 Maperã na ûraa jara aupada ijãa k'iniada–e pùrã, mùa jara bù pedee ijãadaamaa p'anù–e. Jîp'a Tachi Ak'õrepa pedee jarada ijãadaamaa p'anù. Ak'õrépata ichi Jaure ba chepipari parã ijãapataarã ome, ijãadamerã ichia jara bù.
9 Taipa parã ûraada–e pait'ee chik'inia p'anapataadamerã awaraa ijãapataarã ome, parãpa mãgá oo p'anadairã, Tachi Ak'õre Jaurepa k'aripap'eda. 10 Mãgá chik'inia p'anapata Macedonia eujãdepema jõmaarã ijãapataarã ome. Mapa âpemaarã, mùa ûraa k'inia bù audupùara mãga p'anapataadamerã. 11 Tachi Ak'õrepa parãmaa oopi k'inia bùde k'îsiadap'eda, jùrùpatáatù k'ãiwee p'anapataadait'ee. Pedee–idaa bùpa chîaramaa ooparik'a ichita jaranáatù ãchia ne–inaa oodaipia bù mãik'aapa k'oo–idaa p'ananáatù. Ma k'ãyaara pãchi mimia óotù pãchi juadoopa, taipa jaradap'edaak'a parã t'ãide nipadak'ãri. 12 Mãga p'anaruta pùrã, nùda–e pait'ee awaraarãpa teedamerã pãchi nek'odait'ee. Ma awara ijãadak'aa beerãpa parã pia unudait'ee.
Jesús waya chek'ãri
13 Ârá, âpemaarã, taipa nãgà wãarata k'awapi k'inia p'anù parãmaa. Tachi Jesucristode ijãapataarã jai–idaadak'ãri, k'ãi pùk'a p'anù. Maperã parã âpemaarã Cristo k'aurepa jai–idaadak'ãri, mak'ùara jêedaik'araa bù ijãadak'aa beerãk'a. Mãùrã Cristode ijãada–e p'anadairã, ijãada–e ãchi k'õp'ãyoorã piudap'eda chok'ai p'irabaidait'ee mãik'aapa p'ananadait'ee Ak'õre eujãde. Mapa audú t'ãri p'ua p'anù ãchi k'õp'ãyoorã piudak'ãri. 14 Mamîda mãga–e tachi ijãapataarã ome, tachia ijãapata perã Jesús piup'eda chok'ai p'irabaiji. Mapa ijãa p'anù Jesús k'aurepa Tachi Ak'õrepa irude ijãapataarã auk'a chok'ai p'irabaipiit'ee. Mãga ooit'ee Jesús waya chek'ãri ãchi jaureerã ome.
15 Tachi Waibùapa parãmaa nãga jara pëiru: ichi na p'ek'au eujãdee waya chek'ãri ichideerã atade, tachi ijãapataarã at'ãri chok'ai p'anù wãda–e pait'ee jai–idaadap'edaarã naa. 16 Ma ewate Tachi Waibùa chek'ãri, naapùara chok'a pëiru pedeeta ûridait'ee mãik'aapa angeleerã poro waibùa pedee ûridait'ee mãik'aapa Tachi Ak'õre trompeta jîwaa nâbù ûridait'ee. Mãga nùde Cristo ùt'ariipa cheru unudait'ee. Mamata Cristode ijãa jai–idaadap'edaarã k'ap'ùa naapùara chok'ai p'irabaidait'ee jãùradeepa. 17 Mãpai Tachi Waibùapa ãchi ùt'aa ateeit'ee tachi chok'ai p'anùùrã ome jâararade, iru ome unudait'ee pajãde. Mãgá tachi jõma ichita p'anapataadait'ee iru ome. 18 O–îa para bátù ma jara pëida ûridap'eda.